މިދިޔަ މަހު މާލޭގައި 245 ކައިވެނި، 115 ވަރި

މިދިޔަ މަހު ފެމިލީ ކޯޓުން 245 ކައިވެނިކޮށް ދިންއިރު 115 މީހަކު ވަރިކޮށްފައިވާ ކަމަށް ތަފާސްހިސާބުތަކުން ދައްކައިފި އެވެ.

ފެމިލީ ކޯޓުން އާންމުކުރި މިދިޔަ މަހުގެ ތަފާސް ހިސާބުތައް ދައްކާ ގޮތުން މިދިޔަ މަހު 245 ކައިވެނި ކުރިއިރު 115 ވަރީގެ މައްސަލަތަކުގެ ތެރެއިން އެންމެ ގިނައިން ނިންމީ އަދި ހުށަހެޅީ ވެސް ވަރީގެ މައްސަލަތަކެވެ.

އެގޮތުން ވަރީގެ 128 މައްސަލައެއް މިދިޔަ މަހު ހުށަހެޅިއިރު، އޭގެ ކުރީ މަހުގެ ބާކީ ހުރި މައްސަލަތަކާ އެކު ވަރީގެ 149 މައްސަލައެއް މިދިޔަ މަހު ނިންމި އެވެ. އޭގެ ތެރެއިން ގިނައީ ވަރިވުމަށް ހުށަހެޅި މައްސަލަތަކެވެ. ވަރިވުމުގެ 57 މައްސަލައެއް މިދިޔަ މަހު ހުށަހެޅިއިރު 71 މައްސަލައެއް ނިންމި އެވެ.

ދެން އެންމެ ގިނައީ އާއިލީ އެހެނިހެން މައްސަލަތަކާއި ހަރަދުގެ މައްސަލަތަކެވެ. އެއީ ހުކުމް ތަންފީޒު ކުރުމުގެ މައްސަލަތަކާއި ކުޑަކުދިންނާ ގުޅުންހުރި މައްސަލަތައް ވެސް ހިމެނޭ ގޮތުންނެވެ.

ފެމިލީ ކޯޓަކީ ހަމައެކަނި މާލެ ސަރަހައްދުގައި ކައިވެނިކޮށް ދިނުމާއި އާއިލީ މައްސަލަތައް ބަލާ ކޯޓެވެ. ރަށްރަށުގައި ވަރި ކައިވެނީގެ މައްސަލަތައް ބަލާނީ އެރަށެއްގެ ކޯޓުންނެވެ.