ސަރުކާރުގެ އެންމެ ބޮޑު ކާމިޔާބަކީ ގޮންޖެހުންތަކާ އެކު ވެސް އަމާންކަމުގެ މަތީގައި ހޯދި ތަރައްގީ: މާރިޔާ

މި ސަރުކާރުގެ އެންމެ ބޮޑު ކާމިޔާބަކީ، ގެންޖެހުންތަކާ އެކު ވެސް އަމާންކަމާއި ހަމަޖެހުމުގެ މަތީގައި ގައުމު ބާއްވައިގެން ހޯދި ތަރައްގީ ކަމަށް، ޑިފެންސް މިނިސްޓަރު މާރިޔާ އަހުމަދު ދީދީ މިއަދު ވިދާޅުވެއްޖެ އެވެ.

ދިވެހި ސިފައިންގެ ހިދުމަތަށް 130 އަހަރު ފުރުމުގެ މުނާސަބަތުގައި ދެއްވި ހިތާބުގައި ރާއްޖޭގެ ފުރަތަމަ އަންހެން ޑިފެންސް މިނިސްޓަރު ވިދާޅުވީ ސަރުކާރުން ރާއްޖެ އަށް ގެންނަ ތަރައްގީގައި އަސްކަރީ ދާއިރާ ކުރިއެރުވުމަށް ވެސް ރައީސް އިބްރާހިމް މުހައްމަދު ސޯލިހް ބޮޑު އިސްކަމެއް ދެއްވާ ކަމަށެވެ.

ސިފައިންގެ ކުރިއެރުމާއި ތަރައްގީ އަށް އަދި ސިފައިންގެ ވެލްފެއާއަށް ރައީސް ބޮޑު އަހަމިއްޔަތު ކަމެއް ދެއްވާ ކަމަށް މާރިޔާ ވިދާޅުވި އެވެ.

މިނިސްޓަރު ވިދާޅުވީ ރާއްޖޭގައި މަލްޓި ޕާޓީ ނިޒާމުން 2008 ގައި ވެރިކަން ކުރަން ފަށައި މިހާތަނަށް ރާއްޖެ ދެކެފައވާ އެންމެ އަމާން ހަމަޖެހޭ ދުވަސްވަރަކީ މި ސަރުކާރުން ވޭތުކުރި މިދިޔަ ހަތަރު އަހަރު ކަމަށެވެ.

"މަލްޓި ޕާޓީ ޑިމޮކްރެޓިކް ނިޒާމެއް 2008 ވަނަ އަހަރު ތައާރަފްކޮށް، ޑިމޮކްރެސީގެ މަގަށް ދިވެހިރާއްޖޭގެ ވެރިކަމުގެ ނިޒާމް ބަދަލުކުރި ފަހުން، ފާއިތުވެދިޔަ 4 އަހަރާ 5 މަހަށް ވުރެ، ހަމަޖެހުމާއި ސުލްހަމަސަލަސްކަން ގާއިމްވެފައި އޮތް ދުވަސްތަކެއް ދިވެހިން ދެކިފައި ނުވާނެކަމީ ދެބަސް ނުވެވޭނެ ހަގީގަތެއް،" މާރިޔާ ވިދާޅުވި އެވެ.

"މި ފާއިތުވެ ދިޔަ ހަތަރު އަހަރުގެ ތެރޭގައި ސަރުކާރުން ހާސިލުކުރި އެންމެ ބޮޑު އެއް ކާމިޔާބީއަކީ އަޅުގަނޑުމެން މިދެކޭ ހަމަޖެހުމާއި އަމާންކަން. ގިނަ ގޮންޖެހުންތަކާއެކު ވެސް، ތަރައްގީގެ ދުވެލީގައި، އަސްކަރީ ދާއިރާ ވެސް ހިމެނިގެން، ދިވެހިރާއްޖެ މިއަދު ދެކެމުން މިދަނީ މީގެ ކުރިން ރާއްޖެ ދެކެފައި ނުވާފަދަ ހިތްހަމަޖެހޭ ދުވަސްތަކެއް."

މާރިޔާ ވިދާޅުވީ ތަރައްގީ ގެނައުމުގައި ސަރުކާރުން ކުޑަ ރަށެއް ބޮޑު ރަށެއް ތަފާތު ނުކުރާ ކަމަށެވެ. އެގޮތުން ސިފައިންގެ ހިދުމަތުގެ އެކިއެކި ހަރަކާތްތަކާއި ޕްރޮގްރާމްތައް ރާއްޖޭގެ ކުދި ބޮޑު އެކި ރަށްރަށަށް ފުޅާވެގެން ދިއުމަކީ ރަށްރަށް ތަފާތު ކުރުމެއް ނެތް ސިޔާސަތުގެ ތެރޭގައި ހިމެނޭ ކަމެއްގެ ގޮތުގައި މާރިޔާ ސިފަ ކުރެއްވި އެވެ. އަދި ސިފައިންގެ އިތުރު މަރުކަޒުތައް އެކި ސަރަހައްދުތަކުގައި ގާއިމްކުރުމަށް ވެސް ސަރުކާރުން މަސައްކަތް ކުރަމުން އަންނަ ކަމަށް ވިދާޅުވި އެވެ.

މިނިސްޓަރު ވިދާޅުވި ގޮތުގައި ސިފައިންގެ ހިދުމަތުގައި ސަރުކާރުން އެންމެ ބޮޑު އިސްކަމެއް ދެނީ ދިވެހި ރައްޔިތުންގެ އިހްތިރާމާއި، ލޯތްބާއި ގަދަރު ލިބޭނޭހެން ސިފައިންގެ އަމަލުތައް ބަހައްޓައިގެން ޕްރޮފެޝަނަލިޒަމް އެންމެ މަތީ މިންގަނޑުގައި ހިދުމަތް ކުރުމަށެވެ.