އެސްޓީއޯގެ އަހަރީ އާއްމު ޖަލްސާ މި މަހުގެ 31 ގައި

އެސްޓީއޯގެ އަހަރީ އާއްމު ޖަލްސާ މި މަހުގެ 31 ގައި ބާއްވަން ނިންމައިފި އެވެ.

އެ ކުންފުނިން ބުނީ، ޖަލްސާ އަށް ހާޒިރުވެގެންނާއި ޕްރޮކްސީކޮށް އަދި އޮންލައިންކޮށް މައިކްރޮސޮފްޓް ލައިވް އިވެންޓްސް މެދުވެރިކޮށް ވެސް ބައިވެރިވެވޭނެ ކަމަށެވެ.

ޖަލްސާގައި ބައިވެރިވެވޭނީ މިދިޔަ މަހުގެ 24 ވަނަ ދުވަހުގެ ނިޔަލަށް އެސްޓީއޯގެ ހިއްސާދާރުންގެ ދަފްތަރުގައި ހިމެނޭ މީހުންނަށެވެ. ހުޅުމާލޭގެ ސެންޓްރަލް ޕާކްގައި ބާއްވާ ޖަލްސާގައި ބައިވެރިވާން ބޭނުންވާ މީހުން މި މަހުގެ 30 ވަނަ ދުވަހުގެ ރޭ 8:30 ގެ ކުރިން އެސްޓީއޯގެ ޕޯޓަލް މެދުވެރިކޮށް ރަޖިސްޓަރީ ކުރަން ޖެހެ އެވެ.

އޮންލައިންކޮށް ބައިވެރިވާން ބޭނުންވާ މީހުން ނަމަ ޖަލްސާ އޮންނަ ރޭގެ 8:25 ގެ ކުރިން ލޮގިން ވުމަށް އެސްޓީއޯ އިން އެދުނެވެ.

އެސްޓީއޯގެ ފައިދާއިން 2022 ވަނަ އަހަރު ހިއްސާދާރުންނަށް ބަހަން ހުށަހެޅުމަށް، ޑިރެކްޓަރުންގެ ބޯޑުން ފާސްކުރީ ހިއްސާއަކަށް 77ރ. އެވެ. ހިއްސާގެ ފައިދާ ލިބޭނީ މިދިޔަ މަހުގެ 24 ގެ ނިޔަލަށް އެ ކުންފުނީގެ ހިއްސާދާރުންގެ ދަފްތަރުގައި ހިމެނުނު މީހުންނަށެވެ.