ތިނަދޫގައި ހެޕީމާކެޓްގެ ޑިސްޓްރިބިއުޝަން ސެންޓަރެއް ހުޅުވައިފި

ރާއްޖޭގައި ފުޅާ ދާއިރާއެއްގައި ހޯލްސޭލް އަދި ރީޓެއިލްގެ ވިޔަފާރި ކުރާ ހެޕީ މާކެޓްގެ ޑިސްޓްރިބިއުޝަން ސެންޓަރެއް ގދ. ތިނަދޫގައި އިއްޔެ ހުޅުވައިފި އެވެ.

އެ ރަށުގައި ބޭއްވި ހާއްސަ ރަސްމިއްޔާތެއްގައި އެ ސެންޓަރު ހުޅުއްވައި ދެއްވީި ގދ. އަތޮޅުގެ ކައުންސިލް ރައީސް ހަސަން ފައިހަތު ގުދުރަތުﷲ އާއި ތިނަދޫ ކައުނސިލްގެ ރައީސް ސައުދު އަލީ އާއި ހެޕީމާކެޓްގެ ސީއީއޯ އަލީ އިހުސާން އަދި ސީއޯއޯ އަބްދުﷲ ނައީމެވެ.

އެ ރަސްމިއްޔާތުގައި އެ ކުންފުނީގެ ސީއީއޯ އިހުސާން ވިދާޅުވީ، ދެ މަހެއްހާ ދުވަހުގެ ކުރު މުއްދަތެއްގައި އެ ތަން ހުޅުވުުނީ އެ ކުންފުނީގެ މުވައްޒަފުންނާއި މެނޭޖުމަންޓުގެ ބުރަ މަސައްކަތުން ކަމަށެވެ. އެ ފަދަ ހޯލްސޭލް ސެންޓަރެއް އެ ސަރަހައްދުގައި ހުޅުވުމަކީ ހެޕީމާކެޓަށް ލިބުނު ކުރިއެރުމެއް ކަމަށާއި އެ ސަރަހައްދުގެ ކަސްޓަމަރުންނަށް ލިބުނު ބޮޑު ލުޔެއް ކަމަށް ވިދާޅުވި އެވެ.

އިހުސާން ވިދާޅުވިގޮތުގައި، ހެޕީމާކެޓްގެ އަމާޒަކީ ކާބޯތަކެތީގެ ވިޔަފާރިކުރާ ފަރާތްތަކާއި ކަސްޓަމަރުންނާ އޮތް ގުޅުން އިތުރަށް ބަދަހިކޮށް، ކުންފުނިން އެތެރެކުރަނީ ގިނަ ބައެއްގެ އިތުބާރާއި މަގުބޫލުކަން ލިބިފައިވާ އުފެއްދުންތަކަކަށް ހެދުމަށެވެ. ރާއްޖޭގެ އިތުރު ސަރަހައްދުތަކުގައި ވެސް އެ ފަދަ ޑިސްޓްރިބިއުޝަން ސެންޓަރުތަކެއް ހެދުމުގެ މަސައްކަތް އެ ކުންފުނިން ކުރަމުން އަންނަ ކަމަށް ވިދާޅުވި އެވެ.

ހެޕީމާކެޓްގެ ޑިސްޓްރިބިއުޝަން ސެންޓަރެއް ތިނަދޫގައި ހުޅުވުމާ ގުޅިގެން އެ ސަރަހައްދުގައި އެ ކުންފުނިން އިއްޔެ ވަނީ ހާއްސަ ހަވީރެއް ވެސް ބާއްވަފަ އެވެ. ހެޕީމާކެޓުން ވިއްކާ ގިނަ އުފެއްދުންތަކުގެ ރަހަތައް އެ ހަވީރުގައި އާއްމުންނަށް ދެއްކި އެވެ. އެ ކުންފުނީގެ ޕްރިމިއަމް ބައެއް ބްރޭންޑުތަކުގެ އުފެއްދުންތައް ވެސް އާއްމުންނަށް ހަދިޔާ ކުރި އެވެ.

އެ ހަވީރު ކުރިއަށް ދިޔައީ ރޮބޯމޭންގެ ހަރަކާތްތަކަކާ އެކު އެވެ.

ރާއްޖޭގެ އެކި ސަރަހައްދުތަކުގައި ހެޕީމާކެޓުގެ ފަސް ޑިސްޓްރިބިއުޝަން ސެންޓަރެއް ހުރެ އެވެ. އެ ކުންފުނިން 13 ގައުމެއްގެ މަގުބޫލު 22 ބްރޭންޑެއްގެ ގިނަ އުފެއްދުންތައް ރާއްޖޭގައި އަންނަނީ ވިއްކަމުންނެވެ.