ސާޖަރީއަށް ބޭނުންކުރާ ސާމާނު 13 އަހަރަށްފަހު އަލުން ފޮނުވަނީ

އަތޮޅު ތެރޭގެ ހޮސްޕިޓަލްތަކާއި ސިއްހީ މަރުކަޒުތަކަށް ބޭނުންވާ ސާޖިކަލް ސާމާނު ހަވާލުކޮށްފި އެވެ.

މިއަދު ވަނީ 15 އަތޮޅެއްގެ ހޮސްޕިޓަލްތަކާއި މަރުކަޒުތަކަށް އޮޕަރޭޝަން ކުރުމަށް ބޭނުންކުރާ ސާމާނު ހަދިޔާ ކޮށްފަ އެވެ. އެއީ ސިއްހީ ހިދުމަތްދޭ 132 މަރުކަޒަށެވެ.

ހެލްތް މިނިސްޓްރީގައި މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ހެލްތް މިނިސްޓަރު އަހުމަދު ނަސީމް ވިދާޅުވީ ސިއްހީ ދާއިރާ ކުރިއަރުވަން ގިނަ މަސައްކަތްތަކެއް ކުރެވިއްޖެ ކަމަށެވެ. އެގޮތުން ސިއްހީ ހިދުމަތްތެރިންގެ ފަރާތުން އަންނަ އެންމެ ބޮޑު މައްސަލަ ކަމަށްވާ ސާޖަރީއަށް ބޭނުންވާ ވަސީލަތްތައް ނެތުމާއި ހަލާކުވެފައިވާ މައްސަލަ ހައްލު ކުރެވިފައިވާ ކަމަށް މިނިސްޓަރު ވިދާޅުވި އެވެ،

"މިހާރު ފެސިލިޓީތަކުގައި ހުރި މިފަދަ ގިނަ ތަކެއްޗަކީ މީގެ 13 އަހަރު ކުރިން ފޮނުވިފައިވާ ތަކެތި. މިހެން ވުމުން ގިނަ ތަކެތި ވަނީ ވަރަށް ބޮޑަށް ބާވެފައި،" މިނިސްޓަރު ވިދާޅުވި އެވެ.

"އަޅުގަނޑު އަތޮޅުތަކަށް ކުރާ ދަތުރުތަކުގައި ސިއްހީ ހިދުމަތްތެރިންގެ ފަރާތުން އަންނަ އެންމެ ބޮޑު ޝަކުވާއަކީ މިފަދަ ކަންކަމުގެ ސަބަބުން ހިދުމަތް ދިނުމަށް ދަތިވާ ވާހަކަ."

މިއީ އެކަން ހައްލު ކުރުމަށާއި އެފަދަ ތަންތަނުންދޭ ހިދުމަތް ރަނގަޅު ކުރުމަށް ކުރެވުނު މުހިންމު ކަމެއް ކަމަށް ނަސީމް ވިދާޅުވި އެވެ.

ސާޖިކަލް އިންސްޓްރޫމަންޓް ހަދިޔާކުރި 15 ތަން:

1. ހއ. އަތޮޅު ހޮސްޕިޓަލް

2. ށ. އަތޮޅު ހޮސްޕިޓަލް

3. ނ. އަތޮޅު ހޮސްޕިޓަލް

4. ބ. އަތޮޅު ހޮސްޕިޓަލް

5. ޅ. އަތޮޅު ހޮސްޕިޓަލް

6. ކ. ތުލުސްދޫ ހޮސްޕިޓަލް

7. އއ. އަތޮޅު ހޮސްޕިޓަލް

8. އދ. އަތޮޅު ހޮސްޕިޓަލް

9. ވ. އަތޮޅު ހޮސްޕިޓަލް

10. މ. މުލީ ރީޖަނަލް ހޮސްޕިޓަލް

11. ފ. އަތޮޅު ހޮސްޕިޓަލް

12. ދ. އަތޮޅު ހޮސްޕިޓަލް

13. ތ. އަތޮޅު ހޮސްޕިޓަލް

14. ގއ. އަތޮޅު ހޮސްޕިޓަލް

15. ފުވައްމުލައް ސިޓީގެ ހޮސްޕިޓަލް

މިނިސްޓްރީން ބުނީ އެ ތަކެތި ހަވާލުކޮށްފައި ވަނީ އެ ތަނެއް ދަރަޖަ ކުރެވިފައިވާ މިންގަނޑަށާއި އެ ތަނެއްގެ ކޭސް ލޯޑަށް ބަލައި، ކުރިއަށް އޮތް ފަސް އަހަރު ދުވަހަށް އެއްވެސް މައްސަލަ އެއް ނެތި މެނޭޖް ކުރެވޭނެ މިންވަރަށް ކަމަށެވެ.