ނައީމާ މަރާލަން ވަނީ ހެޒްމެޓް ސޫޓުގައި, އެކަކު ހުރީ ފާރައަށް

ނ. މަނަދޫގައި އެކަނިމާއެކަނި ދިރިއުޅެމުން ދިޔަ ނައީމާ މޫސާ މަރާލަން އޭނާ ދިރިއުޅުނު ގޭތެރެއަށް ވަން މީހާ ހުރީ ހެއްކެއް، ނިޝާނެއް ނުލިބޭނެކަން ކަށަވަރުކުރަން ހެޒްމެޓް ސޫޓް ލައިގެން ކަމަށާއި އޭރު އެހެން މީހަކު މަގުމަތީގައި ފާރައަށް ހުރިކަން "މިހާރު" އަށް އެނގިއްޖެ އެވެ.

ރަހުމްކުޑަގޮތަކަށް މަރާލާފައި އޮއްވައި މިދިޔަ މަހުގެ ހަތް ވަނަ ދުވަހު އިރުއޮއްސި 6:13 ހާއިރު ނައީމާ ފެނުނު ހިސާބުން ގާތިލުން ހޯދަން ފުލުހުން ހިންގި އުނދަގޫ ތަހުގީގަށް ލިބުނު ކުރިއެރުންތަކުން މިހާތަނަށް ތިން މީހަކު ވަނީ ހައްޔަރުކޮށްފަ އެވެ.

ހައްޔަރުކުރި 3 މީހުން

● އަހްޒަމް އަބްދުއްޝަކޫރު، 23

● އަބްދުލްވާހިދު ރިފާސް، 20

● ހަސަން ފަވާޒް، 21

ވަޅި ހިފައިގެން ނައީމާގެ ގޭދޮށަށް ފޭބީ ކާރުގައި

ޑްރަގުގެ މައްސަލައެއްގައި ހައްޔަރުކޮށް ބަންދުގެ މުއްދަތަށް ކޯޓަށް ހާޒިރުކުރުމުން, ނައީމާ މަރާލި ކަމަށް މަނަދޫ ކޯޓުގައި އެއްބަސްވީ މީގެތެރެއިން އަހްޒަމް އެވެ. ދިރިއުޅޭ ކޮޓަރި ތެރެއިން މަސްތުވާތަކެތި ފެނިގެން އޭނާ ހައްޔަރުކުރިއިރު ނައީމާގެ މަރަށް ތުހުމަތުކުރެވި އޭނާއަށް ފުލުހުން ފާރަލަމުން ދިޔަތާ ދުވަސްކޮޅެއް ވެފައިވާ ކަމަށް ވެ އެވެ.

އިތުރު ދެ މީހަކު ހައްޔަރުކުރީ ކޯޓުގައި އަހްޒަމް އިއުތިރާފުވެ، އެކަމުގައި ބައިވެރިވާ މީހުން ކިޔައިދިނުމުންނެވެ. އަހްޒަމް ކޯޓުގައި ބުނި ގޮތުގައި ރިފާޝް އާއި ފަވާޒް އެ ގަތުލުގައި ބައިވެރިވި އެވެ.

މި މަރާ ގުޅޭ ގޮތުން "މިހާރު" އަށް ލިބުނު ބައެއް މައުލޫމާތުން އެނގޭ ގޮތުގައި ނައީމާގެ މަރާލަން ދުރާލައި ތައްޔާރުވެ ސާމާނު ހޯދި އެވެ. އޭގެ ތެރޭގައި ކޮވިޑް ތެރޭ އެ ރަށަށް ގެންގޮސްފައި ހުރި ޕާސަނަލް ޕްރޮޓެކްޓިވް އިކުއިޕްމަންޓްސް (ޕީޕީއީ)ގެ ސާމާނުތައް ހޯދި އެވެ. އެ ރަށުގައި އެ ސާމާނު ބޭނުންކުރަން ހުއްޓާލި ފަހުން ވެސް ބައެއް ގޭގޭގައި އެ ތަކެތި ގެންގުޅުނު ކަމަށްވެ އެވެ.

އެނގިފައިވާ ގޮތުގައި ނައީމާ މަރާލި ރޭ ދަންވަރު ދެ މީހުން އެ ގެކައިރަށް ފޭބީ ޒުވާން ގްރޫޕްތަކުން އަބަދުވެސް ދުއްވާ ކާރުގަ އެވެ. ކޯޓު އަމުރެއްގެ ދަށުން މާލެ އިން ރޭ ހައްޔަރުކުރީ އެ ކާރުގެ ވެރިފަރާތެވެ.

އޭނާ އަކީ ކޮންމެ މަހަކު ދެ ފަހަރު ލޭއަޅަން ޖެހޭ ތެލެސީމިޔާ މީހެކެވެ.

ޑްރަގުގެ ވިޔަފާރިއަށް ތުހުމަތުވާ އޭނާގެ ކާރު، ބައެއް ފަހަރަށް އެހެން މީހުން ވެސް ދުއްވަ އެވެ. ފުލުހުން ވަނީ ކާރު ބަލައި ފާސްކޮށް ތަހުގީގަށް ބޭނުންވާ ހެކި ހޯދައިފަ އެވެ.

ނައީމާ މަރާލަން ކޮޓަރި ތެރެއަށް ވަދެ ނިދާފައި އޮއްވައި ވަޅި ހެރި ކަމަށް އިއުތިރާފުވީ އަހްޒަމް ކަމަށް ވެ އެވެ. ނައީމާ އަށް ހަމަލާދިން ކަމަށް އޭނާ ހައްޔަރުކުރުމުގެ ކުރިން މީހެއްގެ ގާތުގައި ބުނެފައިވާ ކަމަށް ވެސް ވެ އެވެ. އެކަން ފުލުހުންނަށް ރިޕޯޓް ވެސް ކުރި އެވެ.

"ބޮއެގެން [މަސްތުވާތަކެތި ބޭނުންކޮށްގެން] ހުރެ އޭނާ މީހެއްގެ ގާތުގައި ބުނެފައިވޭ އެކަން ކުރި ކަމަށް،" މަނަދޫން ވާހަކަ ދެއްކި މީހަކު ކިޔައިދިނެވެ.

ނައީމާގެ ހަށިގަނޑު ފެނުނުއިރު ގައިގެ އެކި ތަންތަނަށް އަނިޔާވެރިކޮށް ވަޅި ހަރާފައި ހުއްޓެވެ. އެކަމަކު ފުލުހުންގެ ތަހުގީގު ދެމަހެއްހާ ދުވަހު ދިގުލައިގެން ގޮސް ރަށުގެ ގިނަ އަދަދެއްގެ ބައެއްގެ ފިންގާ ޕްރިންޓާއި ޑީއެންއޭ ސާމްޕަލް ނަގަން ޖެހުނީ ކުށުގެ ވެށިން ލިބުނު ފޮރެންސިކް ހެކިތަކާ ގުޅުވާލެވޭ މީހަކު ފެނޭތޯ އެވެ. އެކަމަކު ގާތިލް ހައްޔަރުކުރެވޭ ވަރުގެ ސާފު ހެކިތަކެއް ހޯދުންވީ ދަތި އުނދަގޫ ކަމަކަށެވެ.

ފޭރުމާއި ވައްކަމުގެ އަމަލަކަށް ވުރެން ނަފުރަތާއި ރުޅިވެރިކަމުގައި ހަމަލާދީފައިވާ ކަން އެނގެނީ ނައީމާ މަރުވެފައި އޮއްވައި ފުރަތަމަ ފެނުނު ހާލަތުންނާއި ގަހަނާ އާއި ފައިސާ ފަދަ އެއްވެސް އެއްޗެއް އެ ކޮޓަރިން ގެންގޮސްފައި ނުވާތީ އެވެ.

ނައީމާއަށް ހަމަލާދިނުމަށް ފަހު އަހްޒަމް އާއި، ފާރަލީ މީހާ ގޮސް އެރީ އެނގިފައިވާ ގޮތުގައި އަނެއްކާވެސް ކާރަށެވެ. އެ ކާރުގައި، އެ ރޭ ރަށުގެ އެކި ސަރަހައްދުތަކުގައި ދުއްވި އެވެ. އަދި ބައެއް ސަރަހައްދުތަކަށް ފޭބިކަމަށް ވެ އެވެ.

ނައީމާ މަރާލަން ބޭނުންކުރި ކަމަށް ބެލެވޭ ވަޅި ފުލުހުން ވަނީ ހޯދައިފަ އެވެ. އަދި ހަމަލާދިން އިރު ލައިގެން ތިބި ހެދުން ރަށުގެ އަތިރިމަތީގައި ވަޅުލާފައި ހުއްޓައި ވަނީ ހޯދައިފަ އެވެ. އެ ހެދުންތައް އަންދާލަން ވެސް ވަނީ މަސައްކަތްކޮށްފަ އެވެ.

ނައީމާގެ މަރަށް ފަހު ހައްޔަރުކުރުމާ ހަމައަށް މި ތިން މީހުން އެކުގައި އެއް ތަނަކުން ނުފެނެ އެވެ. ރަށު ތެރޭގައި އެ މީހުން އުޅުނީ އެ މީހުންގެ ދުނިޔޭގަ އެވެ. އެ މަރަށް ފަހު ވެސް މި މީހުންގެ މައްޗަށް އެންމެން ކުރަނީ މަސްތުވާތަކެތި ވިއްކުމާއި ވިޔަފާރިކުރުމުގެ ތުހުމަތެވެ.

ނައީމާގެ މަރާ ގުޅިގެން މިއިން އެއްވެސް މީހަކަށް ތުހުމަތުގެ އިނގިލި ދިއްކޮށްލެވޭ ވަރުގެ އެއްވެސް ކަމެއް ހިނގާފައި ނެތް ކަމަށް ވެ އެވެ.

ގަތުލުގެ ސަބަބަކީ ކޮބާ؟

ތިން މީހުން ހައްޔަރުކޮށް ފުލުހުންގެ ހާއްސަ ޓީމުން އަދިވެސް ތަހުގީގު ކުރިއަށް އެބަގެންދެ އެވެ. ތަހުގީގަށް ލިބުނު ކުރިއެރުމާ އެކު މިއީ ކާމިޔާބު ތަހުގީގަކަށް ވާނެ ކަމުގެ ޔަގީކަން ވެސް ފުލުހުން ދެ އެވެ.

އެންމެންނަށް ވެސް މުހިންމު ވާނީ މި މަރުގެ ވެސް "މޯޓިވް" ދެނެގަތުމެވެ.

މި ތިން މީހުންނާ ގުޅޭ ގޮތުން "މިހާރު"އާ ވާހަކަ ދެއްކި ބައެއް މީހުން ބުނި ގޮތުގައި ނައީމާއާ ވާހަކަ ދައްކައި ނުހެދިޔަސް އަދި އެއްވެސް ގުޅުމެއް ނެތަސް ރަށު ތެރޭގައި އޭނާއާ ބެހޭ ގޮތުން ފެތުރިފައި އޮންނަ ސިހުރު ހެދުމުގެ ވާހަކަ މި ތިން މީހުން ވެސް ގަބޫލުކުރެ އެވެ. އެކަމަކު ނައީމާއާ ގުޅޭ ސިހުރު ހެދުމުގެ މި ތުހުމަތުގެ ހަގީގަތެއް އަދި ނޭނގެ އެވެ.

އޭނާއާ ބެހޭ މިފަދަ މައްސަލައެއް ޕޮލިހަށް ހުށަހަޅާފައެއް ނުވެ އެވެ. އަދި ސިހުރު ހަދަން ގެންގުޅޭ ސާމާނެއް އެގެއިން ފެނުނު ކަން ވެސް އެނގިފައެއް ނުވެ އެވެ.

ނައީމާ ދެކެ ރުޅި އަންނަ މީހުން ދައްކާ ވާހަކައިގެ ތެރޭގައި އޭނާ އަކީ "މަރާލަން ޖެހޭ މީހެއް ކަމަށް" ބުނާ ވާހަކަތަކަކަށް، ހައްޔަރުކުރި ދެ މީހަކު ތާއީދުކޮށްފައި އެބަހުއްޓެވެ. މަނަދޫގެ ބައެއް ގޭގޭގެ ގޯތިތެރޭގައި ނައީމާ ހުއްޓައި ފެނުމާއި އަހްޒަމް ދިރިއުޅޭ ގޯތި ތެރެއިން ނައީމާ ފެނިފައިވާތީ އެ ހިތްހަމަނުޖެހުން އަހްޒަމް ވެސް ފާޅުކުރި ކަމަށްވެ އެވެ.

"އަހްޒަމް ބުނާ ގޮތުން އޭނާއަށް އޮތީ ބޮޑު ހުކުމެއް, މަސްތުވާތަކެތީގެ މައްސަލައެއްގައި ވަރަށް އަވަހަށް 25 އަހަރުގެ ޖަލު ހުކުމެއް އަންނަ ގޮތަށް،" މައުލޫމާތު އެނގޭ މީހަކު ކިޔައިދިނެވެ.

އަހްޒަމަށް ދައުވާކުރާ ވައްކަމުގެ މައްސަލައެއްގައި މިހާރު އޮތީ ހުކުމާ ހިސާބުގަ އެވެ. ޑްރަގް ޓްރެފިކިންގެ މައްސަލައެއްގެ މައްސަލަ ވެސް އެބަ ހިނގަ އެވެ.

އޭނާގެ ވިސްނުމާއި ދައްކާ ވާހަކަ އެނގޭ މީހަކު ބުނި ގޮތުގައި އެފަދަ ކަމެއް ކޮށްފައި ޖަލަށް ދިއުމަކީ އޭނާ ދެކޭ ގޮތުގައި އާއިލާ އާއި ނައީމާގެ އުނދަގޫ ޖެހޭ އެހެން މީހުންނަށް ދުނިޔެމަތީގައި ކޮށްދެވޭނެ ހެޔޮކަމެކެވެ.

މިއީ، މަރުގެ މޯޓިވްއަކީ ސިހުރު ކަމަކަށް މުޅިން ނިންމޭނެ ވާހަކަތަކެއް ނޫނެވެ; ޑްރަގްސްގެ ތެރޭގައި އުޅޭ ޒުވާނުންތަކަކަށް ވާތީ އެހެން މަގުސަދެއް ވެސް އޮވެދާނެ އެވެ. އެކަމަކު މި މީހުން ދަންނަ ބައެއް މީހުން ބުނާ ގޮތުގައި ނައީމާ މަރާލަން މާ ބޮޑެތި އަދަދުތަކަކުން ފައިސާ އެ މީހުންނަށް ހުށަހަޅައިގެން ކޮށްފާނެ ކަމަކަށް ގަބޫލެއް ނުކުރެވެ އެވެ.

މިހާތަނަށް ފެންމަތިވި ވާހަކަތަކަށް ބަލާއިރު އެންމެ ރެއަކުން ވަޅި ހަރައި މަރާލީއެއް ނޫނެވެ. އެތައް ދުވަހެއްގައި އެ މީހުން ފާޅުކުރަމުން ދިޔަ ރުޅިވެރިކަމާ ވެސް މި ގަތުލު ގުޅެ އެވެ. އެކަމަކު އަދި ކަށަވަރު ނުވަނީ ހަގީގީ މޯޓިވް އެވެ.