ސައުދީ ލީގުގައި ވެސް ގަދަ 11 އިން ރޮނާލްޑޯ ބާކީވެއްޖެ

ޖިއްދާ (ޖޫން 9) - މިދިޔަ މަހު ނިމުނު ސައުދީ ޕްރޯ ލީގުގެ ގަދަ 11 ކުޅުންތެރިންގެ ލިސްޓުން އަލް ނަސްރަށް ކުޅުނު ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބާކީވެއްޖެ އެވެ.

ސައުދީ ލީގުގެ ދެ ވަނައިގައި ނިންމާލި އަލް ނަސްރު ޓީމަށް ލީގުގައި ކުޅުނު 16 މެޗުގައި ރޮނާލްޑޯ 14 ގޯލު ޖެހި އެވެ.

ރޮނާލްޑޯ، 38، ގެ ބަދަލުގައި ގަދަ 11 އިން ފުރުސަތު ހޯދީ އަލް ހިލާލް ޓީމަށް ކުޅުނު އޮޑިއޮން އިގާލޯ އެވެ. ކުރިން މެންޗެސްޓާ ޔުނައިޓެޑަށް ކުޅުނު އިގާލޯ، ލީގުގައި ކުޅުނު 27 މެޗުގައި 19 ގޯލު ޖެހި އެވެ.

މެންޗެސްޓާ ޔުނައިޓެޑް ދޫކޮށް ރޮނާލްޑޯ އަލް ނަސްރަށް ބޮޑުއަގުގައި ބަދަލުވީ ޑިސެމްބަރު މަހު އޮތް ފީފާ ވޯލްޑް ކަޕަށް ފަހު އެވެ. އޭރު ސައުދީ ލީގު އޮތީ މެދަކާ ހަމައިގަ އެވެ. ލީގު ނިމުނުއިރު ރޮނާލްޑޯ އަކީ ތިން ވަނަ އަށް އެންމެ ގިނަ ގޯލު ޖެހި ކުޅުންތެރިޔާ އެވެ.

އިގާލޯ މި ސީޒަނަށް ފަހު އަލް ހިލާލް ދޫކޮށްލާނެކަމަށް ބެލެވޭތީ، ބަދަލުގައި އަލް ހިލާލުން މަސައްކަތްކުރީ ލިއޮނެލް މެސީގެ ސޮއި ހޯދުމަށެވެ. އެކަމަކު ހިލާލްގެ ބޮޑު ހުށަހެޅުން ދޫކޮށް މެސީ މިހާރު ވަނީ އެމެރިކާ ލީގުގެ އިންޓަ މިއާމީ އަށް ބަދަލުވެފަ އެވެ.

ފުރަތަމަ ސީޒަނަށް ފަހު ރޮނާލްޑޯ ވަނީ އަލް ނަސްރުގައި އަންނަ ސީޒަނުގައި މަޑުކުރަން ނިންމައިފަ އެވެ. ރޮނާލްޑޯ ފުރަތަމަ ފުލް ސީޒަނުގައި އަލް ނަސްރު ނުކުންނާނީ އަލް އިއްތިހާދު ފަހަތަށް ޖައްސާލައި އަލުން ޗެމްޕިއަންކަން ހޯދާށެވެ. އެކަމަކު އަލް އިއްތިހާދުން މިހާރު ވަނީ ކަރީމް ބެންޒެމާ ގެންގޮސް ވަރުގަދަކޮށްފަ އެވެ.