ޓީޗަރުންނަށް ލައިސަންސް ދޭ ގަވައިދު ގެޒެޓު ނުކުރެވި ދިގުލައިގެން ހިނގައްޖެ

ދިރާސީ އާ އަހަރު ފަށަން ދެ މަސް ދުވަހަށް ވެފައިވާއިރު ވެސް، ޓީޗާސް ރަޖިސްޓްރޭޝަން ގަވައިދު ގެޒެޓު ނުކުރެވި ދިގުލައިގެން ހިނގައްޖެ އެވެ.

އޮގަސްޓް، 2021 ގައި އަމަލުކުރަން ފެށި ތައުލީމުގެ ގާނޫނުގައިވާ ގޮތުން، އެ ގާނޫނަށް އަމަލުކުރަން ފަށާތާ ދެ އަހަރުގެ ތެރޭގައި ރާއްޖޭގައި މަސައްކަތްކުރާ ހުރިހާ ޓީޗަރުން ރަޖިސްޓްރީކޮށް، ކިޔަވައިދިނުމުގެ ލައިސެންސް އެ މީހުންނަށް ދޭންޖެހެ އެވެ.

އެގޮތަށް ބަލާނަމަ އަންނަ އޮގަސްޓް 6 ގައި ފަށާ ދިރާސީ އާ އަހަރުގެ ކުރިން 9،000 އަށްވުރެ ގިނަ ޓީޗަރުން ރަޖިސްޓްރީކުރަން ޖެހޭނެ އެވެ.

އެކަން ކުރުމަށް ހާއްސަ ގަވައިދެއް ހަދައި ގެޒެޓުކުރަން ޖެހެ އެވެ. އެނގިފައިވާ ގޮތުގައި އެ ގަވައިދު ހަދައި ނިންމުމަށްފަހު މިދިޔަ އޭޕްރީލް މަހު އެ ގަވައިދު އާއްމުކުރަން އެޑިއުކޭޝަން މިނިސްޓްރީން މަސައްކަތްކުރި އެވެ.

އެޑިއުކޭޝަން މިނިސްޓްރީގެ މީޑިއާ އޮފިޝަލަކު ވިދާޅުވީ ޓީޗަރުން ރަޖިސްޓްރޭޝަންގެ ގަވައިދު އޮތީ އޭޖީ އޮފީހުގެ ލަފައަށް ފޮނުވައިފަ އެވެ. އެކަމަކު، އެ ގަވައިދު އާއްމުކުރެވޭނެ ދުވަހެއް އަދި ނޭނގެ އެވެ.

ޓީޗަރުންނަށް ލައިސެންސް ދިނުމުގެ ހުރިހާ ކަމެއް ކުރުމަށް ފަސް މެމްބަރުންގެ ޓީޗާސް ރަޖިސްޓްރޭޝަން ބޯޑެއް ވެސް ވަނީ އެކުލަވާލައިފަ އެވެ.

ޓީޗަރުންގެ ރަޖިސްޓްރޭޝަން ގަވައިދު އަދި އާއްމުނުކުރިޔަސް، އެޑިއުކޭޝަނުން ނިންމާފައިވަނީ، 2028 ވަނަ އަހަރުން ފެށިގެން ޓީޗަރުކަމުގެ ލައިސެންސް ދޭނީ ފޭސް-ޓު-ފޭސްކޮށް ހަތަރު އަހަރުގެ ޓީޗިން ޑިގްރީ ފުރިހަމަކުރުމުން ކަމަށް ކަނޑައަޅައިފަ އެވެ.