ބޮޑުބޭބެކިޔާ ކުއްޖަކާ ބެހި ސަލާމަތްވެފައި ހުއްޓާ 15 އަހަރަށް ޖަލަށް

އުމުރުން 15 އަހަރުގެ އަންހެން ކުއްޖަކާ ބެހުނު އެ ކުއްޖާގެ ބޮޑުބޭބެގެ މައްޗަށް ކުށް ސާބިތުނުވާ ކަމަށް މެޖިސްޓްރޭޓް ކޯޓަކުން ހުކުމް ކުރިތާ ތިން އަހަރު ފަހުން އެ ހުކުމް ހައި ކޯޓުން ބާތިލްކޮށް 15 އަހަރަށް ޖަލަށް ލާން އިއްޔެ ހުކުމްކޮށްފި އެވެ.

ރަށެއްގެ މެޖިސްޓްރޭޓް ކޯޓަކަށް އޯގަސްޓް 15، 2017 ގައި މި މައްސަލަ އެންމެ ފުރަތަމަ ހުށަހެޅީ އާއިލީ މައްސަލައެއްގެ ތެރެއިން، ޖިންސީ ގޯނާގެ ވާހަކަ ފަޅާއެރުމުންނެވެ. އެއީ ކުއްޖާގެ މަންމަ އާއި ބައްޕަ އެ ކުއްޖާއަށް އަނިޔާކުރާ ކަމަށްބުނެ ގެއިން ނުކުމެގެން ގޮސް އެކަން ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓަށް ހުށަހެޅުމުން އާއިލާގެ މީހަކާ ކުއްޖާ ހަވާލުކުރުމުން ކުއްޖާ ދެއްކި ވާހަކަތަކުން ހާމަވި ކަމެކެވެ. އެ ކުއްޖާ ވަނީ މަންމަ ފަރާތު މީހުން ރަނގަޅު ނުވާނެ ކަމަށާއި އެ މީހުން ޖިންސީ ގޯނާ ކޮށްފައިވާ ކަމަށް ބުނެފަ އެވެ.

މިހާރު އުމުރުން 20 އަހަރުން މައްޗަށް ގޮސްފައިވާ ކުއްޖާ ދެތިން ދުވަސް ފަހުން އަލުން މަންމަ އާއި ބައްޕަގެ ގާތަށް ދިޔައިރު އެ ވާހަކަ ބައްޕައާ ހިސާބަށް އައިސްފައި އޮތުމުން އިތުރަށް އެކަން އޮޅުންފިލުވައި ފުލުހުންނަށް މައްސަލަ ހުށަހެޅީ އެވެ.

ކުއްޖާ ބުނެފައިވާ ގޮތުގައި މާލޭގައި ދިރިއުޅެމުން އައީ މަންމަ އާއި ބައްޕަ އަދި އެއްބަނޑުއެއްބަފާ ތިން ކުދިންނާ އެކު އެއް ކޮޓަރީގެ އެޕާޓްމަންޓެއްގަ އެވެ. ކުއްޖާގެ މަންމަ ފަރާތު އާއިލާގެ މީހުން މާލެ އަންނަ ފަހަރުތަކުގައި އެ ގޭގައި ތިބޭ ކަމަށް ބުނެފައިވެ އެވެ. މިހެން އައި ބޮޑުބޭބެއަކު 2015 ވަނަ އަހަރުގެ އެއް ރެޔަކު ކުއްޖާއާ އެންމެ ފުރަތަމަ ބެހުނީ ސިޓިންރޫމް ސޯފާގައި ނިދާފައި އޮއްވައި ކަމަށާއި ފަހުން ވެސް އެކި ފަހަރުމަތިން ޖިންސީ ގޯނާތައް ކޮށްފައިވާ ކަމަށް ވަނީ ބުނެފަ އެވެ.

އެކަމަކު ނޮވެމްބަރު 28، 2019 ގައި މެޖިސްޓްރޭޓް ކޯޓުން ހުކުމް ކުރީ ބޮޑުބޭބެގެ މައްޗަށް އުފުލި، އިތުބާރުކުރެވޭ މަގާމެއްގައި ހުރެ ކުޑަކުއްޖަކާ އެކު ޖިންސީ އަމަލެއް ހިންގުމުގެ ކުށުގެ ދައުވާ، ގާނޫނުގައި ބުނާ މިންގަނޑުން ސާބިތު ނުވާ ކަމަށެވެ. އެއީ ކުޑަކުދިންނަށް ޖިންސީ ގޯނާކުރާ މީހުންނާ މެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގައި ބުނާ ފަސް ހެކި ހުށަހަޅާފައި ނެތް ކަމަށާއި ތުހުމަތާ ގުޅުވާލެވޭ ހަރުދަނާ އިތުރު ހެއްކެއް ގަރީނާއެއް ނުވަތަ ފޮރެންސިކް ހެއްކެއް ވެސް ހުށަހަޅާފައި ނެތް ކަމަށް ބުނެ އެވެ.

އެކަމަކު ދައުލަތުން މި މައްސަލަ އިސްތިއުނާފުކޮށް ބުނެފައިވަނީ ކުށް ސާބިތުނުވާ ކަމަށް ނިންމީ؛

● ކުއްޖާގެ ސައިކޮލޮޖިކަލް ރިޕޯޓަށް ވެސް ނުބަލައި ކަމަށް

● ޖިންސީ ހާނީއްކަކުރުމާ އެކު ގަދަކަމުން ޖިންސީ ގުޅުން ހިންގަން މަސައްކަތްކޮށްފައިވާކަން މެޑިކޯ ލީގަލް ރިޕޯޓުން އެނގެން އޮތަސް އެކަމަށް ރިއާޔަތް ނުކޮށް ކަމަށް

ދައުވާ ލިބުނު މީހާ ބުނެފައިވަނީ ކުއްޖާ އެކި މީހުން ގާތުން މި ވާހަކަ ދައްކާފައިވާ ގޮތުގައި ބޮޑެތި ތަފާތުތަކެއް އެބަހުރި ކަމަށެވެ. ސައިކޮލޮޖިކަލް ރިޕޯޓުން ފާހަގަވާން ހުރި ކަންކަމަކީ ކުއްޖާގެ މައިންބަފައިން އަނިޔާކުރާނީ ދިމާވެފައިވާ ގޮތް ކަމަށާއި ޖިންސީ އަނިޔާ ލިބިފައި ހުރި ކަމަށް މެޑިކޯ ލީގަލް ރިޕޯޓުން އެނގުނަސް އެއީ ދައުވާ ލިބޭ މީހާގެ ފަރާތުން ލިބުނު އަނިޔާއެއް ކަމަށް ނުބުނެވޭނެ ކަމަށް ވެސް ބުނެފައިވެ އެވެ. އަދި ޖިންސީ ގޯނާކުރި ކަމަށް ބުނެ ދައްކާ ވާހަކަ އަކީ ކުއްޖާއަށް މައިންބަފައިން އަނިޔާކުރާކަން އެނގުމުން އެ ވާހަކައިގެ މިސްރާބު އަނބުރާލަން ދެއްކި ވާހަކައެއްގެ ގޮތުގައި ވެސް އޭނާ ސިފަކުރި އެވެ.

ހައި ކޯޓުން ފަނޑިޔާރު ފާތިމަތު ފަރުހީޒާ ރިޔާސަތުގައި އިންނަވައިގެން ފަނޑިޔާރު ހުސައިން ޝަހީދު އާއި ފަނޑިޔާރު ދީބާނާޒް ފަހުމީގެ އިއްތިފާގުން އިއްވެވި ހުކުމުގައި ބުނެފައިވަނީ މިއީ ކުއްޖާ ނުބައި ނިޔަތެއްގައި ހަދައިގެން ދެއްކި ވާހަކައެއް ކަމަށް، ދައުވާ ލިބޭ ފަރާތުން ބުނާ ބުނުމެއްގެ މައްޗަށް އެކަނި ނުނިންމޭނެ ކަމަށެވެ. ޖިންސީ އަނިޔާ ލިބުނު ގޮތް ކަމަށް ކުއްޖާ ކިޔައިދީފައިވާ ގޮތާއި މެޑިކޯ ލީގަލް ރިޕޯޓުން ފެންނަން ހުރި އަނިޔާތަކާ ދިމާވާތީ ކުއްޖާގެ ވާހަކައާ ހެކިތަކާ ގުޅުވާލެވޭ ކަމަށް ހުކުމުގައިވެ އެވެ.

ކުއްޖާ ގެއިން ނުކުމެގެން ދިޔައީ މައިންބަފައިން އަނިޔާކުރާތީ ކަމަށް ފުރަތަމަ ބުނި ނަމަވެސް ކުއްޖާ އެންމެ ފުރަތަމަ އެކަމާ ގުޅޭ ގޮތުން ދިން ބަޔާނާއި ވީޑިއޯ އިންޓަވިއުގައި ވެސް، ގައިގައި އަތްލުން ފަދަ ކަމެއް ކުރި ކަމަށް ބުނެފައެއް ނުވެ އެވެ. ކުއްޖާގެ މަންމަ ބުނެފައިވަނީ އަނިޔާކުރާ ކަމަށް ބުނެ ކުއްޖާ ނުކުމެގެން ދިޔައީ ޖިންސީ ގޯނާއާ ކުރިމަތިވާތީކަން ފަހުން އެނގުނު ކަމަށެވެ. އެ ދުވަސްވަރު ކުއްޖާގެ އުޅުމަށް ބަދަލުތަކެއް އައި ކަމަށާއި މަންމަ ފަރާތު އާއިލާގެ މީހުން ގެޔަށް އަންނާތީ އެކަމާ ހިތްހަމަ ނުޖެހިގެން އުޅޭ ކަމަށް ވެސް މަންމަ ބަޔާން ދީފައިވެ އެވެ.

މިފަދަ އެތައް ކަމަކާއި ހައި ކޯޓާއި ސުޕްރީމް ކޯޓުގެ ނިންމުންތަކަށް ރިއާޔަތްކޮށް ފަނޑިޔާރުން ނިންމެވީ އިތުބާރުކުރެވޭ މަގާމެއް ހުރެ ކުޑަކުއްޖަކާ އެކު ޖިންސީ އަމަލެއް ހިންގުމުގެ ކުށުގެ ދައުވާ ކުއްޖާގެ ބޮޑުބޭބެގެ މައްޗަށް ސާބިތުވާ ކަމަށެވެ. އަދި ކުށުގެ އަދަބެއްގެ ގޮތުން 15 އަހަރަށް ޖަލަށް ލުމަށް ހުކުމްކުރީ އެވެ. ކުށްވެރިވި މީހާ ތަހުގީގު މަރުހަލާގައި 32 ދުވަހު ބަންދުގައި ހުރެފައި ވާތީ ހުކުމް އެ މުއްދަތު އުނިވާނެ އެވެ.

ކުޑަކުދިންގެ ކަރާމާތާ ގުޅުން ހުންނަ މިފަދަ މައްސަލަތަކުގެ ޝަރީއަތް ހިންގަނީ އާންމުކޮށް ހުޅުވާލައިގެންނެއް ނޫނެވެ. އަދި ހުކުމްތަކުގައި ވެސް ކުއްޖާގެ ވަނަވަރު ހާމަވެދާނެ އެއްވެސް މައުލޫމާތެއް ހާމަކުރުމަކީ ގާނޫނުން މަނާ ކަމެކެވެ.