ޓްރެވަލް އެޑްވައިޒަރީ އަޕްޑޭޓްކުރީ މުޅި ދުނިޔެއަށް، ރާއްޖެއަށް ހާއްސައެއް ނޫން: ޔޫކޭ ސަފީރު

އިނގިރޭސި ވިލާތުގެ ރައްޔިތުން ގައުމުތަކަށް ދަތުރުކުރުމުގައި ސަމާލުވާން އެދި ނެރެފައިވާ ޓްރެވަލް އެޑްވައިޒަރީ މި މަހު އަޕްޑޭޓްކުރީ ރާއްޖެއަށް ހާއްސަކޮށް ނޫން ކަމަށާއި އެއީ މުޅި ދުނިޔެއަށް ނެރުނު އަޕްޑޭޓެއް ކަމަށް އިނގިރޭސި ވިލާތުން ރާއްޖެއަށް ކަނޑައަޅާފައި ހުންނަވާ ސަފީރު ކެރޮން ރޮސްލާ ވިދާޅުވެއްޖެ އެވެ.

ޔޫކޭގެ ޓްރެވަލް އެޑްވައިޒަރީ އަޕްޑޭޓާ ގުޅިގެން ރާއްޖޭގެ ނޫސްތަކުން ރިޕޯޓްކޮށްފައިވަނީ ރަނގަޅަށް ނޫން ކަމަށް ވިދާޅުވެ ސަފީރު ކުރެއްވި ޓްވީޓެއްގައި ވަނީ ޓެރަރިޒަމާ ގުޅޭ ގޮތުން މި މަހުގެ 22 ގައި ނެރުނު އަޕްޑޭޓަކީ ހުރިހާ ގައުމެއް ހިމެނޭ ގޮތުން ނެރުނު އަޕްޑޭޓެއް ކަމަށެވެ.

"މިއީ ދިވެހިރާއްޖެއަށް ވަކިން ހާއްސަކޮށް ގެނައި ބަދަލެއް ނޫން،" ސަފީރު ލިޔުއްވާފައިވެ އެވެ.

ޔޫކޭ ސަރުކާރުގެ ވެބްސައިޓްގައި ވެސް މިއީ މުޅި ދުނިޔޭގައި ވެސް ޓެރަރިޒަމްގެ ރިސްކު ބޮޑުވެފައި ވާތީ ގެނައި ބަދަލެއް ކަމަށް ބުނެފައިވެ އެވެ.

ޓްރެވަލް އެޑްވައިޒަރީ އަޕްޑޭޓްކުރި ކަމުގައި ވިޔަސް ރާއްޖެއާ ބެހޭ ގޮތުން ހިމެނޭ ބައިތަކަށް އެއްވެސް ބަދަލެއް ގެނެސްފައެއް ނުވެ އެވެ. މިހާރު ވެސް އޮތީ ރާއްޖެއަކީ ކޮންމެ ވަގުތެއްގައި ވެސް ޓެރަރިސްޓުން ހަމަލާ ދީފާނެ ތަނެއް ކަމަށާއި ބޭރު މީހުން އަދި ހާއްސަކޮށް ޓޫރިސްޓުން ގޮސް އުޅޭ ތަންތަނަށް އަމާޒުކޮށް ހަމަލާ ދޭނެ ކަމަށް ބެލެވޭ ކަމަށެވެ. މިއީ ކުރިން ވެސް ރާއްޖެއާ ބެހޭ ގޮތުން ޔޫކޭ އާއި އެމެރިކާ އަދި އެހެން ގައުމުތަކުން ނެރޭ އެޑްވައިޒަރީތަކުގައި ވެސް އޮންނަ ގޮތެވެ.

ޔޫކޭގެ އެޑްވައިޒަރީގައި ބުނެފައިވަނީ ދުނިޔޭގެ ކޮންމެ ގައުމެއްގައި ވެސް އިނގިރޭސި ވިލާތުގެ މަސްލަހަތު ހިމެނޭ ތަންތަނާއި މީހުންނަށް ހަމަލާ ދިނުމުގެ ބިރު ބޮޑު ކަމަށާއި އެހެންވެ އެކަމަށް ސަމާލުވެގެން އުޅުމަށެވެ.