އޮޅުންބޮޅުން: ސަރުކާރުގެ މުއައްޒަފުންނަށް ފުލެޓް ދިނުން

ފަހަކަށް އައިސް ވަރަށް ގިނައިން އިވޭ އަޑެކެވެ. ސަރުކާރުގެ މުއައްޒަފުންނަށް ސަރުކާރުން ތަފާތު ލުއިތައް ދެއްވުމުގެ ގޮތުން އެކިއެކި ކަންތައް ކުރައްވާ ވާހަކައެވެ. ޢާއްމު ގޮތެއްގައި ތަަފާތު އޮފީސްތަކުން ތަފާތު ޚިދުމަތް ދޭ ވާހަކައިގެ އަޑެވެ. ބައެއް އޮފީސްތަކުން އެތަނުގައި މަސައްކަތްކުރާ މުއައްޒަފުންނަށް ހައްޖަށް ދެވޭ ގޮތަށް ހަމަޖައްސަވައިދެއްވައެވެ. އަނެއް ބައި އޮފީސްތަކުން އެތާގައި މަސައްކަތްކުރާ މީހުންނަށް ގެދޮރު ލިބިގަތުމަށް މަގު ފަހިކޮށްދެއްވައެވެ. މިކަހަލަ ކަންތައްތަކުގައި ސަރުކާރުން ގެންގުޅުއްވާ ސިޔާސަތެއް ޢާއްމެއް ނުކުރައްވައެވެ. މިހެންވުމުގެ ސަބަބުން މި ކަންތައްތައް ހިނގަނީ ކިހިނެއްކަމެއް ސާފުވެފައެއް ނުއޮވެއެވެ.

ސަރުކާރުން ދޭން ބޭނުންވާ އެއްޗެއް ބޭނުން ގޮތަކަށް ދެވިދާނެކަމަށް ބުނެވިދާނެއެެވެ. މިހާރު އެފަދަ ވާހަކަތައް ބަލައިގަންނަން ވަރަށް އުނދަގޫވާނެއެވެ. އެއީ ސަރުކާރުން ޚަރަދުކުރަނީ ރައްޔިތުންގެ ފައިސާ ކަމަށް ވާތީވެއެވެ. ރައްޔިތުން އެކިއެކި ނަންނަމުގައި ކޮންމެ ދުވަހަކު އެތައް ބައިވަރު ފައިސާއެއް ޓެކްސްގެ ގޮތުގައި ދައްކައެވެ. ޓެކްސް ބަލައިގަންނަ އޮފީހުގެ އާމްދަނީ ދަނީ ކޮންމެ މަހަކުހެން އިތުރުވަމުންނެވެ. އަހަރު ދުވަހަށް ބަލައިލާއިރު އެތައް މިލިއަނުން އިތުރުވަމުން ގޮސް އެތައް ބިލިއަން ރުފިޔާ އަށް އަރައެވެ. އެއީ ރައްޔިތުންގެ ބޭނުންތަކަށް ޚަރަދުކުރުމަށް ރައްޔިތުން ސަރުކާރަށް ދައްކާ ފައިސާއެވެ. ސަރުކާރުން އެދިގެން ރައްޔިތުންގެ މަޖިލީހުން ފާސްކުރާ ޤާނޫނެއްގެ ދަށުން ދައްކަން ޖެހޭ ފައިސާއެވެ. ތެދުފުޅެކެވެ. މިކަންތައްތައް ބެލެހެއްޓުމަށް ޤާނޫނުން ތަފާތު މުއައްސަސާތައް އުފައްދާފައިވެއެވެ. ރާއްޖޭގެ ޤާނޫނީ ސަޤާފަތަކީ ޤާނޫނުން މުސްތަޤިއްލުކޮށް ހުރިހާ ބާރުތައް ދީފައި، އެތަންތަނުން ވެސް ސަރުކާރުގެ މައި ސޯބު އެނބުރޭ ގޮތަށް އެނބުރުމެވެ. އެއީ ރާއްޖޭގެ ޤާނޫނުތަކުގައި ނުލިއެ އޮންނަ ސަޤާފީ ޤާނޫނެވެ. ދުނިޔޭގެ ވަރަށް ގިނަ ޤައުމުތަކުގައި މިދެންނެވި ސަޤާފީ ޤާނޫނަކީ ކޮންމެހެން މަޖިލީހަކުން ފާސްކުރަން ޖެހޭ ޤާނޫނެއް ނޫނެވެ. އެ ޤާނޫނާ ޚިލާފްވެއްޖެ ނަމަ ރައްޔިތުން ބަލައެއް ނުގަންނާނެއެވެ. އަދި ވަގުތުން ފިޔަވަޅު އަޅާނެއެވެ. އެހެންވުމާ އެކު އެފަދަ ޤާނޫނާ ޚިލާފްވާން އެފަދަ ގިނަ ޤައުމުގެ ރައްޔިތުން ބޭނުމެއް ނުވެއެވެ. ރާއްޖޭގައި ދިމާވަމުން އަންނަ ގޮތަކީ އަދި ދިމާވާނީ މައިސޯބު އެނބުރޭ ގޮތަށް ކުދި ސޯބުތައް ނުއެނބުރޭ ނަމަ މެޝިނުގަނޑު ހުއްޓެނީއެވެ. ދެން ޖެހެނީ އެސޯބުތައް އެއްލާލައިފައި މައިސޯބު އެނބުރޭ ގޮތަށް އެނބުރޭ ސޯބުތަކަކަށް ބަދަލުކުރާށެވެ.

ސަރުކާރުގެ މުއައްސަސާތަކުން ހިނގާ ކަންތައްތައް ބަލަހައްޓަން އޮންނަ އެންމެ އިސް ފަރާތަކީ ރައްޔިތުންގެ މަޖިލީހެވެ. މަޖިލީހުގެ މެންބަރުކަމަށް އެބޭފުޅުން ހޮވިފައި ވަނީ އެންމެ ފަސް އަހަރުދުވަހުގެ މުއްދަތަކަށް ކަމަށް ވުމާ އެކު ސަރުކާރުގެ ތަފާތު ބައިތަކުން ހިންގާ ކަންތައްތައް ބެއްލެވުމަކީ އެބޭފުޅުން ހޮވިފައިވާ ކުރު މުއްދަތުގެ ތެރޭގައި ކުރައްވަން ވަރަށް އުނދަގޫ ކަމަކަށް ވާނެއެވެ. ދާއިރާގެ މީހުންގެ ތެރެއިން ބޭނުން ބަޔަކަށް އިސްކޮލަޝިޕް ދެއްވިޔަސް، ބޭސްފަރުވާކުރުމަށް ޑޮކްޓަރުން ގެންދެވިޔަސް، އިސްކޫލުގައި ކިޔަވައިދިނުމަށް މުދައްރިސުން ގެންދިޔައަސް، އިސްކޫލެއް ހުޅުވިޔަސް، މުބާރާތްތައް އިންތިޒާމްކޮށްދެއްވިޔަސް، ނުފޫޒުގެ ބޭނުންކޮށްގެން ސަރުކާރުގެ ޚަރަދުގައި މަގު ހެދިއަސް، ނަރުދަމާގެ ނިޒާމެއް ހަދައި، ރަށް ބޮޑުކޮށް، ބަނދަރު ހެދިއަސް، އަދި ކޮންމެ ރަށަކަށް އެެއާޕޯޓެއް ހެދިއަސް، މެންބަރުކަމަށް ހޮވޭނެ ކަމުގެ ސައްތައިން ސައްތަ ޔަޤީންކަން އޮތުން އުނދަގުލެވެ. މާޒީގައި ވޯޓުލައިފައި ތިބި ބައެއް މީހުން ކަންތައް ކޮށްފައި އޮންނަ ގޮތުންނެވެ. މިހެންވުމާ އެކު ސަރުކާރުގެ ކޮންޓުރެކްޓްތައް ހޯދުމަށާއި، ސަރުކާރު ކުންފުނިތަކުން މުދާ ގަނެގެން ކުޑަ ފައިދާއަކާ އެކު ދެވަނަ ފަރާތަކަށް ވިއްކާލުމަށް ފުރުޞަތު ހޯދުމާއި، ލުއި ގޮތަކަށް ބިން ހޯދުމާއި، ރަހުމަތްތެރިންނާއި ގާތްތިމާގެ މީހުންނަށް ވަޒީފާ ހޯދައިދިނުމަށް އެހީތެރިވުމާއި، ތަފާތު ހުއްދަ ހޯދުން ފަދަ ކަންކަމަށް ބައިވަރު ވަގުތު ބޭނުންވާނެއެވެ. މިހެންވުމާ އެކު ސަރުކާރުން އެދޭ ގޮތަކަށް މަޖިލީހުގައި ވޯޓު ދިނުމުގެ އިތުރަށް އެހެން ކަންތައްކުރަން މަޖިލީހުގެ މެންބަރުންނަށް ވަގުތެއް ނުވާނެއެވެ.

ސަރުކާރުން ރައްޔިތުންގެ ފަސޭހައަކަށް ބައިވަރު ކަންތައްތައް އަތޮޅުތެރޭގައްޔާއި މާލޭގައި ކުރަމުން ގެންދާއިރު ވެސް ސަރުކާރާ ނުރެހޭ ފަރާތްތަކުން ރައްޔިތުންގެ ހިތުތެރޭގައި ޝައްކު އުފެދޭ ފަދަ ވާހަކަތައް ދައްކައެވެ. ސަރުކާރުން ވަކި ބަޔަކަށް ފުލެޓް ދެއްވާ ވާހަކަ އާއި ކަރަޕްޝަނުގެ އިންޑެކްސްގައި ރާއްޖެ ކުރިއަށް ޖެހިފައި އޮތް ވާހަކައެވެ. މިހުންނަނީ ޤަބޫލުކުރެވޭނޭ ވާހަކައެއް ނޫނެވެ. ކަރަޕްޝަން ހުއްޓުވުމަށް ވެސް ސަރުކާރުން ބައިވަރު ފިޔަވަޅު އަޅުއްވައެވެ. ފަތުރުވެރިކަމަށް ދޫކުރައްވާ ރަށްތައް ބީލަމަކާ ނުލައި ދޫކުރައްވާ ގޮތަށް ހަމަޖެއްސެވުމަކީ ވެސް ސަރުކާރުން އެޅުއްވި މުހިއްމު ފިޔަވަޅެކެވެ. ބީލަމުން ރަށްތައް ދޫނުކުރުމުން، ބީލަން ބަލާ ބަޔަކަށް އެއްވެސް މިންވަރެއްގެ ނުފޫޒެއް މިހާރު ފޯރުވޭކަށް ނުއޮންނާނެއެވެ. ފޭދޫފިނޮޅު ސީނީންނަށް ހަތަރު މިލިއަން ޑޮލަރަށް ވިއްކާލުމަށް ފަހު، މާލޭގައި ދިރިއުޅޭ މީހުން މުނިފޫހިފިލުވަން ދާން ތިމާވެއްޓާ ވަރަށް ރައްޓެހި ގޮތަކަށް ފަޅެއް ހިއްކަވަނީއެވެ. މާލޭ ކައިރީގައި އޮތް ރީތި ފަޅުރަށެއް ބޮޑު އަގުގައި ވިއްކާލުމަށް ފަހު އެ ފައްޓަވަން އުޅުއްވަނީ ކޮން ކަހަލަ ފައިދާ ބޮޑު މަޝްރޫޢުއެއްތޯއެވެ.؟

މުހިއްމު މުއައްސަސާތަކުގައި އުޅުއްވާ ފަރާތްތަކަށް ސަރުކާރުން ފުލެޓް ދޫކުރާ ގޮތަށް ހަމަޖެއްސެވުމަކީ ސަރުކާރުން އެ މުއައްސަސާތަކުގެ މެންބަރުންނަށް ނުފޫޒު ފޯރުވަން ކުރައްވާ ކަމެއްކަމަށް ބެލުމަކީ ވަރަށް ދެކޮޅުނުޖެހޭކަމެކެވެ. ސަބަބަކީ އެ ފުލެޓަކަށް ދައްކަން ޖެހޭ ކުލި ފުލެޓްގެ އަގު ހަމަވަންދެން އެބޭފުޅުން ދައްކަވަން ޖެހޭތީވެއެވެ. އެތައް ސަތޭކަ ބަޔަކު ފުލެޓަށް އެދިފައި ތިއްބާ އެއްވެސް ގުރުއަތަކާ ނުލައި އެބޭފުޅުންނަށް ސަރުކާރުން ފުލެޓް ހަވާލުކުރައްވަނީ ރައްޔިތުންނަށް ރަނގަޅަކަށްޓަކައެވެ. އެއްވެސް ނުފޫޒެއްގެ އޮއިވަރެއްގައި ޖެހިޔަނުދިނުމަށެވެ.

މިހެން މިކަންތައްތައް އޮތް ކަމުގައިވިޔަސް ސަރުކާރުގެ މުއައްޒަފުންނަށް ނުވަތަ މުސްތަޤިއްލު މުއައްސަސާތަކުގައި މަސައްކަތްކުރައްވާ ފަރާތްތަކަށް އެތަނެއްގައި މަސައްކަތްކުރާތީވެ ސަރުކާރުން ފުލެޓް ދޫކުރެވޭ ނަމަ އެކަންތައް ކުރެވެންވާނީ ހަރުދަނާ އުސޫލަކުންނެވެ. ސަބަބަކީ އެތަންތަން އިމާރާތްކުރެވެނީ އަޅުގަނޑުމެން ޓެކްސްގެ ގޮތުގައި ދައްކާ ފައިސާއިން ކަމަށް ވާތީވެއެވެ. ނޫން ނަމަ ރައްޔިތުންގެ އޭތިމީތި ވިއްކައިގެން ލިބޭ ފައިސާއިން ކަމަށް ވާތީވެއެވެ. ފުލުހުންނަށް ނުވަތަ ސިފައިންނަށް، ނުވަތަ ފަނޑިޔާރުންނަށް ނުވަތަ މުސްތަޤިއްލު މުއައްސަސާތަކުގެ މެންބަރަކަށް ވީތީވެ، ފުލެޓް ދޫކުރެވޭ ނަމަ، އެބޭފުޅުން އެ ވަޒީފާ ދޫކޮށްލުމުން ނުވަތަ ވަކިވެވަޑައިގަތުމުން ވާނީ ކިހިނެއްތޯއެވެ؟ އެފަރާތްތަކަށް މިލްކުވެވޭ ގޮތަށް އޮތުމުން ސަރުކާރުން އަބަދުވެސް ކުރިން ދެންނި ތަންތަނުގައި އަލަށް ވަޒީފާ އަދާކުރައްވާ ފަރާތްތަކަށް އަޅުގަނޑުމެންގެ ޓެކްސްގެ ފައިސާގައި އަލުން އާ އިމާރާތްތަކެއް ކުރައްވަން ޖެހޭނެއެވެ. ސަރުކާރުން ވަކި މުއައްސަސާއެއްގައި މަސައްކަތްކުރާތީވެ ދިރިއުޅޭނެ ތަނެއް ދައްކާ ނަމަ އެތަނެއް ދޫކުރެވިފައި ހުންނަންވާނީ އެ މުއައްސަސާ އަކަށެވެ. މިހާރުވެސް ހަމަޖައްސަވާ ގޮތަށް އެތަނެއްގައި ދިރިއުޅޭނެ ބަޔަކު އެ މުއައްސަސާއަކުން ހަމަޖައްސާ އުޞޫލަކުން ހަމަޖައްސާ ދުވަހަކަށް ތިބެވޭ ގޮތަށެވެ. މިސާލަކަށް ދަންނަވާ ނަމަ ސިފައިން ނުވަތަ ފުލުހުންގެ ވަޒީފާގައި މާލޭގައި މަސައްކަތްކުރާ އަތޮޅުތަކުގެ މީހުންނަށް މާލޭގައި ޢާއްމުކޮށް ތަންތަން ކުއްޔަށް ދޫކުރާ އަގުގައި އެމީހުންނަށް ލިބޭ މުސާރައިން ކުއްޔަށް ހިފަން އުނދަގޫވެދާނެއެވެ. އެހެންނަމަވެސް މުއައްސަސާތަކަށް ދޫކުރެވޭ ތަންތާގައި ޚާއްޞަ ގޮތެއް ހަމަޖެއްސިދާނެެއެވެ. ތެދުފުޅެކެވެ. ފަނޑިޔާރުންނަކީ ޚިދުމަތުގައި އުމުރުން 70 އަހަރު ފުރެންދެން ތިއްބެވޭނެ ބޭފުޅުންނެވެ. އެހެންނަމަވެސް ޒުވާނުންނަށް ފުރުޞަތު ދިނުމުގެ ގޮތުން އަޅުގަނޑުމެންނަށް ޤާނޫނުއަސާސީ އަށް ބަދަލެއް ގެނެސްގެން ފަނޑިޔާރުކަމުގައި ހުންނެވުމުގެ އުމުރު 65 އަހަރަށް ތިރިކުރަން މަސައްކަތްކުރަން ވެއްޖެއެވެ. ފަނޑިޔާރުންގެ ތެރެއިން ބައެއް ފުންނާބު އުސް ފަނޑިޔާރުން ނިންމަވާ ނިންމެވުންތަކުގެ ފެންވަރު މަތިކަމުން ސަރުކާރުން އެބޭފުޅުން ވަޒީފާގައި ދިގު މުއްދަތަކަށް ބޭތިިއްބެވުމަށް ބޭނުންވާނެއެވެ. އެހެންނަމަވެސް އެބޭފުޅުންގެ ޤާބިލު ޚިދުމަތް ޤާނޫނު ކިޔަވައިދޭ ތަންތަނުގެ ދަރިވަރުން ވެސް ބޭނުންވާނެއެވެ. އޭރުން މުޅި ޤައުމުގެ ޤާނޫނީ މުސްތަޤްބަލަށް ވެސް އާރޯކަމެއް އަންނާނެއެވެ.

ހުޅުމާލޭ ފުރުމުގެ ކުރިން ސަރުކާރުން ފުލެޓް ނުވަތަ ގެދޮރު ހަމަޖައްސައިދޭން ބޭނުންވާ މުއައްސަސާތަކަށް ޚާއްޞަ ސަރަހައްދުތަކެއް ހަމަޖެއްސުން މުހިއްމެވެ. އެސަރަހައްދުތަކުގައި އުޅުއްވާނީ އަބަދުވެސް ސަރުކާރުގެ ވަޒީފާތަކުގައި އުޅުއްވާ ބޭފުޅުންނެވެ. ފަނޑިޔާރުކަން ކަހަލަ މުހިއްމު ވަޒީފާތައް އަދާކުރައްވާ ބޭފުޅުންނަށް މިފަދަ ސަރަހައްދެއް ހަމަޖެހިއްޖެ ނަމަ އެބޭފުޅުންގެ ސަލާމަތީ ކަންތައްތައް ބަލަހައްޓަވަން ވެސް ސަރުކާރަށް ފަސޭހަވާނެއެވެ.

މިވާހަކަ އަޅުގަނޑުމެން ދައްކަން ޖެހެނީ ކިހިނެއް ވެގެން ހެއްޔެވެ؟ އަޅުގަނޑުމެންގެ މަންދޫބުން މިފަދަ ކަންކަމާ މެދު ވިސްނެވުމުގެ ބައި ސަރުކާރަށް ދޫކުރައްވާފައި، އެބޭފުޅުންގެ ސިކުނޑީގެ އެބައި އަރާމުކުރާ ގޮތަށް ބާއްވާފައި އޮންނަކަމަށް ހީކުރެވޭތީވެއެވެ.