ޔޫކްރޭންގެ ޑްރޯން ހަމަލާތަކުން މޮސްކޯގެ ވައިގެ ދަތުރުތައް ހުއްޓުމަކަށް

ޔޫކްރޭނުން ރޭ ދަންވަރުން ފެށިގެން، ރަޝިޔާގެ ވެރިރަށް މޮސްކޯ އަށް ޑްރޯން ހަމަލާތަކެއް ދިނުމާ ގުޅިގެން، މޮސްކޯގެ ވައިގެ ސަރަހައްދުގައި ކުރަމުން އަންނަ ބައިނަލްއަގުވާމީ ވައިގެ ދަތުރުތަކާއި އެތެރޭގެ އުދުހުންތަކަށް ބުރޫ އަރައިފި އެވެ.

ރަޝިޔާގެ ދިފާއީ ވުޒާރާ އިން ބުނި ގޮތުގައި މޮސްކޯގެ ވައިގެ ސަރަހައްދުގައި ރޭ ދަންވަރުން ފެށިގެން މޮސްކޯގެ ވައިގެ ސަރަހައްދުގައި ގޮތް ނޭނގޭ ފަސް ޑްރޯނެއް އުދުހުނެވެ. އަދި އެ ޑްރޯންތަކުން ވެރިރަށް މޮސްކޯގެ އެކި ސަރަހައްދުތަކަށް މިސައިލާއި ރޮކެޓުން ހަމަލާ ދިން ކަމަށް ވެސް ދިފާއީ ވުޒާރާއިން ބުންޏެވެ.

އެ ޑްރޯންތައް މޮސްކޯގެ ވައިގެ ސަރަހައްދުގައި އުޅޭ ކަން އަސްކަރީ އަދި މަދަނީ ރާޑަރުތަކަށް ފާހަގަކުރެވުމާ އެކު، މޮސްކޯގެ ވުނުކޯވޯ ބައިނަލްއަގުވާމީ ވައިގެ ބަނދަރު ވަގުތުތަކަކަށް ބަންދުކޮށް، އެ ވައިގެ ބަނދަރުގެ ދަތުރުތައް މެދުކަނޑައިލަން ޖެހުނެވެ. މޮސްކޯގައި އޮންނަ ތިން ވައިގެ ބަނދަރުގެ ތެރެއިން ވުނުކޯވޯ ވައިގެ ބަނދަރު ބަންދުކުރުމާ ގުޅިގެން، ގިނަ ފްލައިޓްތަކެއް އެހެން ވައިގެ ބަނދަރުތަކަށް ބަދަލުކުރަން ޖެހުނެވެ.

ރަޝިޔާ ސަރުކާރުން ބުނި ގޮތުގައި މޮސްކޯގެ ވައިގެ ސަރަހައްދަށް ވަދެ އުޅުނު ފަސް ޑްރޯން ވެސް، ރަޝިޔާގެ ވައިގެ ދިފާއީ ލަޝްކަރުން ވަނީ ވައްޓާލައިފަ އެވެ. އެ ޑްރޯންތަކަށް ހަމަލާ ދީ ވައްޓައިލިޔަސް، އެ ކަމުގެ ސަބަބުން އެއްވެސް މީހަކަށް ގެއްލުމެއް ނުލިބޭ ކަމަށް ރަޝިޔާ އިން ބުންޏެވެ.

އެ ފަސް ޑްރޯންގެ ތެރެއިން ހަތަރު ޑްރޯން ވައްޓައިލީ ރަޝިޔާގެ ދިފާއީ ލަޝްކަރުން ދިން މިސައިލް ހަމަލާތަކެއްގަ އެވެ. އަނެއް ޑްރޯން ވައްޓައިލީ، އިލެކްޓްރޯނިކް ވަސީލަތްތައް ބޭނުންކޮށްގެން އެ ޑްރޯންގެ ނިޒާމުތައް ފެއިލް ކޮށްލައިގެންނެވެ.

ރަޝިޔާގެ ދިފާއީ ވުޒާރާ އިން ބުނި ގޮތުގައި ޔޫކްރޭނުން މަސައްކަތް ކުރީ ޑްރޯންތައް ބޭނުންކޮށްގެން ރަޝިޔާގެ މަދަނީ އިންފްރާސްޓްރަކްޗަރަށް ހަމަލާ ދޭށެވެ. އެ ގޮތުން މޮސްކޯގެ ވައިގެ ބަނދަރުތަކަށާއި ސަރުކާރުގެ މުހިންމު ބިނާތަކަށް ހަމަލާ ދޭން މަސައްކަތް ކުރި ކަމަށްވެ އެވެ.

މި އަހަރުގެ މެއި މަހުގެ ތެރޭގައި ވެސް، ޑްރޯންތަކެއް ބޭނުންކޮށްގެން މޮސްކޯ އަށް ހަމަލާ ދިނުމަށް ޔުކްރޭނުން މަސައްކަތް ކުރި އެވެ. އެ ފަހަރު ވެސް ރަޝިޔާގެ ދިފާއީ ލަޝްކަރުން ޔޫކްރޭންގެ އަށް ޑްރޯނެއް ވައްޓައިލި އެވެ.