އިންތިޚާބުގައި އެމްޑީޕީއަށް އޮތް ޗެލެންޖަކީ ޑިމޮކްރެޓްސް އެއް ނޫން، ޕީޕީއެމް: ރައީސް

ދެހާސްއަށާރަ ވަނަ އަހަރު ބޭއްވި ރިޔާސީ އިންތިޚާބެކޭ އެއް ފަދައިން އަންނަ ސެޕްޓެމްބަރު މަހު އޮންނަ ރިޔާސީ އިންތިޚާބުގައި ވެރިކަންކުރާ އެމްޑީޕީއަށް ޗެލެންޖަކަށް ވާނީ ޕީޕީއެމް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ރިޔާސީ އިންތިހާބުގެ ކެމްޕެއިނަށް، ވާވު އަދި މީމު އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން ވ. ފުލިދޫގައި ނޫސްވެރިންނަށް ރައީސާ ބައްދަލުވި ވަގުތުކޮޅެއްގައި ވަނީ އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު އެ ޕާޓީން ވަކިވެވަޑައިގެން މިހާރު އުފައްދަވާފައިވާ "ދަ ޑިމޮކްރެޓްސް"ގެ ފަރާތުން އިންތިޚާބުގައި ކިހާ ވަރެއްގެ ގޮންޖެހުމެއް ކުރިމަތިވާނެ ކަމުގެ ސުވާލު އަމާޒުކޮށްފަ އެވެ.

އެ ސުވާލަށް ޖަވާބު ދެއްވަމުން ރައީސް ވިދާޅުވީ އެމްޑީޕީން އެއްވެސް ބޭފުޅަކު ދުރަށް ވަޑައިގެންނެވުމަކީ ގެއްލޭނެ ވޯޓު ކަމަށާއި އެކަމުގެ ނޭދެވޭ އަސަރު އިންތިޚާބުގެ ނަތީޖާއަށް ކުރާނެ ކަމަށެވެ.

އެކަމަކު މި އިންތިޚާބުގައި ތަފާތު ކޯލިޝަނެއްގެ ތެރެއިން، ސިޔާސަތުތަކަށް ގެނެވުނު ބަދަލުތަކާއި ކަން ކުރުމުގެ ވައްޓަފާޅިއަށް ގެނެވުނު ބަދަލާ އެކު ކުރިން އެމްޑީޕީއަށް ތާއީދު ނުކުރާ އެތައް ބަޔެއްގެ ތާއީދު ލިބިފައިވާކަން ވެސް ރައީސް ފާހަގަކުރެއްވި އެވެ.

"އަޅުގަނޑުމެން ބަލާލާއިރު، އަޅުގަނޑުމެންނަށް މި ގެއްލިގެން ދިޔަ އަދަދާ ނޫނީ އެއަށް ވުރެ އިތުރަށް ވޯޓު ލިބޭ ތަން އަޅުގަނޑުމެންނަށް އެބަ ފެނޭ،" އެމަނިކުފާނު ވިދާޅުވި އެވެ.

ޑިމޮކްރެޓްސްގެ ކެންޑިޑޭޓެއްގެ ގޮތުގައި ނަޝީދު އިންތިޚާބަށް ނުކުންނެވި ނަމަވެސް، ނަޝީދުގެ މައްޗަށް ކުރި ހޯއްދެވޭނެ ކަމުގެ ޔަގީންކަން ދެއްވަން ރައީސް ނެންގެވީ އެމްޑީޕީގެ ރިޔާސީ ޕްރައިމަރީގެ ނަތީޖާ އެވެ.

"އަޅުގަނޑަށް ގަބޫލުކުރެވޭ ގޮތުގައި ކުރިއަށް މިއޮތް ރިޔާސީ އިންތިޚާބުގައި ވެސް ވާދަވެރި ދެ ޕާޓީއަކަށް ވެގެންދާނީ އެމްޑީޕީ އާއި ޕީޕީއެމް. އޭގެ ތަފާތެއް އައިއްސަ އޮތް ތަނެއް އަޅުގަނޑަކަށް ނުފެނޭ،"

އެހެންވީމާ އަޅުގަނޑުމެންގެ ޗެލެންޖަކީ ޑިމޮކްރެޓްސް އެއް ނޫން. އަޅުގަނޑުމެންގެ ޗެލެންޖަކީ ޕީޕީއެމް."

ޑިމޮކްރެޓްސްއަށް ސޮއި ކުރެއްވުމަށް މިިދިޔަ ބުރާސްފަތި ދުވަހު ބޭއްވި ޖަލްސާގައި އެމްޑީޕީ ރޫޅާލައްވާނެ ކަމަށް ނަޝީދު ވިދާޅުވި ވާހަކައިގެ ރައްދުގައި ރައީސް ވިދާޅުވީ އެއީ ވާނެ ކަމެއް ނޫން ކަމަށެވެ.

މީގެ ކުރިން ވެސް، އެމްޑީޕީގެ ލީޑަޝިޕުގައި ތިއްބެވި ބޭފުޅުން ޕާޓީން ވަކިވެވަޑައިގެންފައިވާކަން ފާހަގަކުރައްވަމުން ރައީސް ވިދާޅުވީ، އެއް ސިޔާސަތުތަކާއި އެއް ވިސްނުމެއްގައި ޕާޓީ ކުރިއަށްދާ ކަމަށެވެ.

އެހެންކަމުން، އެމްޑީޕީ ރޫޅާނުލެވޭނެ ކަމާމެދު ރައީސް އެއްވެސް ވަރަކަށް ޝައްކު ކުރައްވާ ކަމަށް ވިދާޅުވި އެވެ.

ޑިމޮކްރެޓްސްގެ ކެންޑިޑޭޓެއް މި އިންތިޚާބުގައި ނެރޭނެ ކަމަށް ބުނެފައިވާއިރު، ކެންޑިޑޭޓު ކަނޑައަޅާނީ ޕްރައިމަރީއަކުން ކަމަށް އެ ޕާޓީން ވަނީ ބުނެފަ އެވެ.

އިދިކޮޅު ޕީޕީއެމް/ޕީއެންސީ ގެ ރިޔާސީ ކެންޑިޑޭޓު އެ ކޯލިޝަނުގެ ލީޑަރު އަދި ކުރީގެ ރައީސް އަބްދުﷲ ޔާމީނަށް އަރުވާފައި ވީނަމަވެސް، މަނީ ލޯންޑަރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާތީ، އެމަނިކުފާނަށް މި އިންތިޚާބުގައި ވާދަ ކުރެއްވޭނެ ކަމާމެދު ވަނީ ވަރަށް ބޮޑަށް ސުވާލު އުފެދިފަ އެވެ. އެ ހުކުމްގެ އިސްތިއުނާފު މައްސަލަ ހައި ކޯޓުގައި ކުރިއަށްދާއިރު، އިދިކޮޅުގެ އުއްމީދަކީ އެ މައްސަލަ ކާމިޔާބުވެގެން ޔާމީން މިނިވަންވެ، އިންތިޚާބުގައި ވާދަކުރެއްވުމެވެ.

މިވަގުތު ސަރުކާރު ކޯލިޝަނުގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އިތުރުން އެމްއެންޕީގެ ލީޑަރު އަދި ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު މުހައްމަދު ނާޒިމް ވެސް ވަނީ އިންތިޚާބުގައި ވާދަކުރައްވާނެ ކަން އިއުލާނު ކުރައްވައިފަ އެވެ.