ނިޒާމީ ވޯޓު ނަގަން ކުރިންވެސް މަޝްވަރާ ކުރި، ރައީސަށް ޑިމޮކްރެޓްސް މިހާރު އިތުބާރެއް ނުކުރޭ!

ވެރިކަން ކުރުމުގެ ނިޒާމް ބަދަލު ކުރަން މީގެ ކުރިން ވެސް އެމްޑީޕީ އާ އެކި ފަހަރު މަތިން މަޝްވަރާ ކޮށްފައިވާ ކަމަށާއި އެކަން އިތުރަށް ލަސް ކޮށްފި ނަމަ ނިޒާމީ ވޯޓެއް ނަގަން އެ ޕާޓީން މަސައްކަތް ކުރާނެ ކަމަށް ގަބޫލު ކުރަން ދަތި ކަމަށް ދަ ޑިމޮކްރެޓްސްގެ ގިނަ މެންބަރުން ބުނެފި އެވެ.

ޑިމޮކްރެޓްސް އިން މިރޭ ބޭއްވި އިންޓްރިމް ކައުންސިލްގެ ބައްދަލުވުމުގައި އެ ޕާޓީގެ މުސްތަޝާރު އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވަނީ އެމްޑީޕީގެ ކޮންގްރެސް އަށް ފަހު ނިޒާމީ ވޯޓެއް ނަގަން އޭނާ އާއި ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަދި މަޖިލީހުގެ ނައިބު ރައީސް އީވާ އަބްދުﷲ ކުރެއްވި ބައެއް މަސައްކަތްތައް ހާމަ ކުރައްވައިފަ އެވެ.

އޭރު ރައީސް އިބްރާހިމް މުހައްމަދު ސޯލިހާއި ނަޝީދު ބައިވެރިވެވަޑައިގަތް އެމްޑީޕީގެ ކޮންގްރެސް އަށް ނަޝީދު އޮތީ ވެރިކަން ކުރުމުގެ ނިޒާމް ބަދަލު ކުރަން ފެންނަ ނުފެންނަ ވޯޓެއް ނަގަން ކޮންގްރެސް އަށް ގަރާރެއް ހުށަހަޅުއްވައިފަ އެވެ.

ނަމަވެސް ރައީސް އާއި އެމްޑީޕީގެ ޗެއާޕާސަން ފައްޔާޒް އިސްމާއިލް އާ މަޝްވަރާ ކުރެއްވުމަށް ފަހު ނަޝީދު ވަނީ އެ ގަރާރު އަނބުރާ ގެންދަވައިފަ އެވެ.

އެކަމާ ގުޅޭ ގޮތުން ހަސަން ލަތީފް މިރޭ ވިދާޅުވީ އެ ބައްދަލުވުމަށް ފަހު އެކި ފަހަރުގެ މަތިން ނިޒާމް ބަދަލު ކުރުމުގެ މަޝްވަރާތައް އެމްޑީޕީގެ އިސްވެރިންނާއެކު ކުރެއްވި ކަމަށެވެ.

ހަސަން ލަތީފް ވިދާޅުވި ގޮތުގައި ކޮންގްރެސް އަށް ފަހު އޮގަސްޓު 24 ވަނަ ދުވަހާއި ސެޕްޓެމްބަރު ނުވަ ވަނަ ދުވަހާއި ނޮވެމްބަރު ހަ އަކާއި ޑިސެމްބަރު ހައެއްގައި ވެސް އެމްޑީޕީގެ އިސް ބޭފުޅުންނާ މަޝްވަރާ ކުރެއްވި އެވެ.

"ރިޔާސީ އިންތިހާބުގެ ކުރިޔަށް [ނިޒާމް ބަދަލުކުރަން] ފެންނަ ނުފެންނަ ވޯޓެއް ނެގުމުގެ ވާހަކަ ދައްކަމުން ދިޔައީ. އެހެން ނަމަވެސް އެ ބޭފުޅުން ވިދާޅުވީ ނަޝީދާ ނުލައި އިންތިހާބު ކާމިޔާބު ކުރެވޭނެ ކަމަށް،" ހަސަން ލަތީފް ވިދާޅުވި އެވެ.

އެމްޑީޕީން ރިޔާސީ ޕްރައިމަރީ އިއުލާން ކުރީ ވެސް ހަސަން ލަތީފް ވިދާޅުވި ގޮތުގައި އެ މަޝްވަރާތައް ކުރިޔަށް ގެންދަނިކޮށެވެ. އެއީ ތާރީހަށް ޓަަކައި ވެސް އެނގެން ޖެހޭ ވާހަކަތަކެއް ކަމަށް ހަސަން ލަތީފް ވިދާޅުވި އެވެ.

ބޭނުމީ "އިބޫ ނޫން ގޮތެއް"، ނޫނީ ވަކި ކޮޅަކަށް ނޭރުން!

ކައުންސިލް ބައްދަލުވުމުގައި ވާހަކަ ދެއްކެވި ގިނަ މެންބަރުންގެ ވިސްނުން ހުރީ އެމްޑީޕީ އަށް އެއްވެސް ގޮތަކަށް އިތުބާރު ނުކުރުމަށެވެ. އަދި ދެވަނަ ބުރުގައި ވާދަ ކުރާ އެއްވެސް ޕާޓީއަކަށް ތާއީދު ނުކުރަން ނިންމުމަށެވެ.

އެ މައްސަލާގައި ވާހަކަ ދައްކަވަމުން އީވާ ވިދާޅުވީ މި މަހު 30 ގައި ބާއްވާ އިންތިހާބުގެ ދެވަނަ ބުރުގެ ކުރިން ނިޒާމީ ވޯޓެއް ނަގަން އެމްޑީޕީން އެއްބަސް ނުވާނަމަ އެ ޕާޓީއާ އެކު ކުރިޔަށް ނުދެވޭނެ ކަމަށެވެ.

މީގެ ކުރިން ވެސް ނިޒާމް ބަދަލު ކުރަން ވައުދުވެފައިވާ ކަމަށާއި ދެން ވެސް އެކަން ކުރައްވާނެ ކަމަށް ގަބޫލު ނުކުރެވޭނެ ކަމަށް އީވާ ވިދާޅުވި އެވެ.

"ވެރިކަމާ ހަވާލުވެވަޑައިގަތީ ވެސް އެމްޑީޕީ އާ ވަކި ހިސާބަކުން ނިޒާމީ ވޯޓެއް ދެއްވާނެ ކަމަށް ވައުދުވެގެން. ކޮންގްރެސް އަށް ފަހު ވެސް ނިޒާމީ ވޯޓަކާ ބެހޭ ގޮތުން މަޝްވަރާ ކުރައްވާނެ ކަމަށް ވިދާޅުވެ މަޝްވަރާ ފަށާފައި އެކަމެއް ވެސް ނުކުރެވި،" އީވާ ވިދާޅުވި އެވެ.

އެމްޑީޕީން ބޭނުންވާ ގޮތަށް ރިޔާސީ އިންތިހާބުގެ ދެވަނަ ބުރަށް ފަހު ނިޒާމީ ވޯޓެއް ނަގަން އެއްބަސްވެއްޖެ ނަމަ ރައީސް އިބްރާހިމް މުހައްމަދު ސޯލިހު މަސައްކަތް ކުރާނީ އެކަން ފެއިލް ކޮށްލަން ކަމަށް އީވާ ވިދާޅުވި އެވެ.

ވިލުފުށީ ދާއިރާގެ މެންބަރު ހަސަން އަފީފް ވިދާޅުވީ އެމްޑީޕީ ނުވަތަ ޕީޕީއެމް ފަހަތުން ދުވުމަކީ އެންމެ ރަނގަޅު ގޮތް ކަމަށް އޭނާ ގަބޫލު ނުކުރައްވާ ކަމަށެވެ. އިތުރު ދުވަސްތަކެއް ނުވަތަ ވަގުތުތަކެއް ބޭކާރު ނުކުރައްވާ ކުރިޔަށް އޮތް ރައްޔިތުންގެ މަޖިލީހަށް ތައްޔާރުވާން ޖެހޭ ކަމަށް އަފީފް ވިދާޅުވި އެވެ.

"ދެ ދުވަސް ވެސް އަޅުގަނޑަށް ގިނަ. 24 ގަޑިއިރުގެ ތެރޭގައި ޖަވާބެއް ނުދީފިއްޔާ އެ ހިސާބުން ނިންމާލަން އަޅުގަނޑަށް ފެންނަނީ،" އަފީފް ވިދާޅުވި އެވެ.

ޑިމޮކްރެޓްސްގެ ރިޔާސީ ކެންޑިޑޭޓް އަދި ހުޅުދޫ ދާއިރާގެ މެންބަރު އިލްޔާސް ލަބީބް ވިދާޅުވީ އޭނާ ގަބޫލު ކުރައްވާ ގޮތުގައި ރައީސް އިބްރާހިމް މުހައްމަދު ސޯލިހު އިންތިހާބުން ވަނީ ނާކާމިޔާބު ވެފަ އެވެ.

ދެން އެމަނިކުފާނާ ދައްކަން އޮތް ހަަމައެކަނި ވާހަކައަކީ މި މަހު 28 ގެ ކުރިން ނިޒާމީ ވޯޓެއް ނެގުން ކަމަށާއި އެއަށް އެއްބަސް ނުވެވޭ ނަމަ އެއްވެސް ކޮޅަކަށް އެރުމަކީ ރަނގަޅު ގޮތެއް ނޫން ކަމަށް އޭނާ ވިދާޅުވި އެވެ. ޑިމޮކްރެޓްސްގެ އިންޓަރިމް ކައުންސިލުގެ ބައްދަލުވުމުގައި މުހައްމަދު ޝިފާޒް ހުށަހެޅުއްވި ގަރާރުގައި ބުނީ ވެރިކަމުގެ ނިޒާމާ ގުޅޭ ގޮތުގައި 28 ސެޕްޓެމްބަރުގެ ކުރިން ފެންނަ ނުފެންނަ ވޯޓެއް ނަގަން އެމްޑީޕީން އެއްބަސްވާނަމަ، އެ ޕާޓީ އާއެކު މަޝްވަރާ ކުރުމަށެވެ. އަދި ޕީޕީއެމް އާއެކު ސަރުކާޜު އުފެއްދުމަށް ބައިވެރިވާނެ މިންވަރާއި ޑީމޮކްރެޓްސްގެ ސިޔާސަތުތައް ބަޔާން ކުރެވޭ މިންވަރު 20 ސެޕްޓެމްބަރުގެ ކުރިން އެ ޕާޓިން ސޮއިކޮށް އެއްބަސްވާ ނަމަ އެ ޕާޓީއާ އެކުގައި މަސައްކަތް ކުރުމަށް ގަރާރުގައި ބުނެފައި ވެ އެވެ. އެ ޝަރުތުތަކަށް އެއްވެސް ޕާޓީއަކުން އެއްބަސްނުވާ ނަމަ، ދެވަނަ ބުރުގައި އެއްވެސް ޕާޓީއަކަށް ތާއީދު ނުކުރަން ޝިފާޒް ހުށަހެޅުއްވި ގަރާރުގައި ބުންޏެވެ.

މިރޭގެ ބައްދަލުވުމުގައި ޝިއްޕެގެ ގަރާރު ފާސްވީ އިންޓަރިމް ކައުންސިލްގެ 50 މެމްބަރުންގެ އަޣުލަބިއްޔަތުންނެވެ.