ސްކައުޓާއި ގާލް ގައިޑް ކުދިން ކޭމްޕު ދާނެ ރަށެއް މި ދައުރު ނިމުމުގެ ކުރިން ހަމަޖައްސާނަން: ރައީސް

ރައީސް އިބްރާހިމް މުހައްމަދު ސޯލިހުގެ މި ދައުރު ނިމުމުގެ ކުރިން ސްކައުޓާއި ގާލް ގައިޑް ކުދިން ކޭމްޕު ދާނެ ރަށެއް ހަމަޖައްސައިދޭނެ ކަމަށް އެމަނިކުފާނު މިއަދު ވިދާޅުވެއްޖެ އެވެ.

އަންނަ މަހު ދެކުނު ކޮރެއާގައި ބާއްވާ ދުނިޔޭގެ 25 ވަނަ ސްކައުޓް ޖަމްބޮރީގައި ރާއްޖޭގެ ފަރާތުން ބައިވެރިވާ ސްކައުޓާއި ގާލް ގައިޑްގެ ވަފުދާ ބައްދަލުކުރެއްވުމަށް، ޗީފް ސްކައުޓް، ރައީސް އިބްރާހިމް މުހައްމަދު ސޯލިހާއި ޗީފް ގައިޑް، ފަސްޓް ލޭޑީ ފަޒްނާ އަހްމަދު މިއަދު ހެނދުނު ސޯޝަލް ސެންޓަރުގައި ހާއްސަ ރަސްމިއްޔާތެއް ވަނީ ބާއްވަވައިފަ އެވެ.

އެ ރަސްމިއްޔާތުގައި ރައީސް ވިދާޅުވި ގޮތުގައި، ސްކައުޓް އެސޯސިއޭޝަނާއި ގާލް ގައިޑް އެސޯސިއޭޝަނުން، މި ދައުރުގެ ކުރީކޮޅުގައި ވަރަށް ގިނަ ކަންކަން ހައްލުކޮށްދޭން އެދުނެވެ. އެކަންކަން ހަމަޖައްސައިދޭން ސަރުކާރުން ބޭނުންވި ނަމަވެސް ކޮވިޑް-19އާ ގުޅިގެން ބައެއް ކަންކަން ދިގުލައިގެން ދިޔައީ ކަމަށް ވިދާޅުވި އެވެ.

އެސޯސިއޭޝަންތަކުން އެދުނު އެއް ކަމަކީ ކުދިން ކޭމްޕު ދާނެ ރަށެއް ހަމަޖައްސައިދިނުމެވެ.

"މިއަދު ވެސް އަޅުގަނޑު ތި ބޭފުޅުންނަށް ޔަގީންކޮށް އަރުވަން، އިރާދަކުރެއްވިޔާ އަޅުގަނޑުމެންގެ މި ދައުރު ތެރޭގައި ތިބޭފުޅުންނަށް ކޭމްޕު ދާނެ ރަށެއް، ހާއްސަކޮށް، އެޑިއުކޭޝަން މިނިސްޓްރީގެ ބެލުމުގެ ދަށަށް ރަށެއް އަޅުގަނޑުމެން ހަވާލުކޮށްދޭނެ ވާހަކަ،" ރައީސް ވިދާޅުވި އެވެ.

ސްކައުޓް ޖަމްބޮރީގައި ރާއްޖޭގެ ފަރާތުން ބައިވެރިވާ ސްކައުޓާއި ގާލް ގައިޑްގެ ލީޑަރުންނާއި ދަރިވަރުން، ބައިނަލްއަގުވާމީ މުޖުތަމައުގައި ރާއްޖެއަށް ރީތި ނަން ލިބޭނެ ގޮތަށް ގައުމު ތަމްސީލުކޮށްދެއްވުމަށް ރައީސް އެދިވަޑައިގަތެވެ. އަދި ދީނާއި ތައުލީމީ ކަންކަމަށް ހާއްސަ އަހައްމިއްޔަތު ކަމެއް ދެއްވުމަށް ވެސް ރައިސް ނަސޭހަތްތެރިވެވަޑައިގަތެވެ.