ށ. އަތޮޅަށް ކުރީގެ ސަރުކާރުތަކުން އޮތީ ވަރަށް ބޮޑަށް އިހުމާލުވެފައި: ރައީސް

އާބާދީ ކުޑަވުމުން ކުރީގެ ސަރުކާރުތަކުން ށ. އަތޮޅަށް އޮތީ ވަރަށް ބޮޑަށް އިހުމާލުވެފައި ކަމަށް، ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

އަންނަ މަހު ބާއްވާ ރިޔާސީ އިންތިހާބުގެ ކެމްޕެއިނަށް، މި އަތޮޅުގެ އެންމެ ފަހު ރަށަށް ވަޑައިގެން، ކަނޑިތީމުގެ ބަނދަރުގައި ބޭއްވި ބައްދަލުވުމުގައި އެމްޑީޕީގެ ކެންޑިޑޭޓް ވިދާޅުވީ މިއީ ތަރައްގީގެ މަޝްރޫއުތައް އެންމެ މަދުން ހިންގި ރަށްތައް ކަމަށެވެ.

މީހުން ދިރިއުޅޭ 16 ރަށުގައި މި ސަރުކާރުން އެހާ ބައިވަރު މަޝްރޫއުތައް ހިންގަން ޖެހުނީ އެ ސަބަބާ ހެދި ކަމަށް އެ މަނިކުފާނު ވިދާޅުވި އެވެ.

"ކުރީގެ ދެ ސަރުކާރަށް ބަލާއިރު ހިންގާފައިވާ މަޝްރޫއުތައް އެހާމެ މަދު. މުޅި ށ. އަތޮޅަށް 2009-2011 އަށް މުޅިއަކުން ހިންގިފައިވަނީ 19 މަޝްރޫއު. ދެހާސް ސާދަ އިން 2018 އަށް 56 މަޝްރޫއު. އަޅުގަނޑުމެންގެ މި ދައުރުގައި މިހާތަނަށް 159 މަޝްރޫއު މި އަތޮޅުގައި ހިންގިފައިވޭ." ރައީސް ވިދާޅުވި އެވެ.

ވޯޓަށް އިސްކަންދީގެން މަޝްރޫއުތައް ހިންގާތީ ކުރީގެ ސަރުކާރުތަކުން ކުދި ރަށްރަށަށް ކަމެއް ކޮށްދީފައިނުވާ ކަމަށް އެ މަނިކުފާނު ވިދާޅުވި އެވެ. ކަނޑިތީމާއި ބިލެއްފަހި ހިމެނޭ ގޮތަށް މި އަތޮޅުގެ އެހެން ރަށްރަށުގައި ވެސް ފާއިތުވި އަހަރުތަކުގައި ކަމެއް ނުކުރެވި އޮތީ އެ ކަންތައްތަކުގެ ސަބަބުން ކަމަށް ވިދާޅުވި އެވެ.

ޖަޒީރާ ރާއްޖޭގެ މެނިފެސްޓޯއާއެކު މަސައްކަތް ފަށައިގެން، މީހުން ދިރިއުޅޭ ހުރިހާ ރަށެއްގައި ފެނާއި ނަރުދަމާ ނިޒާމް ގާއިމްކުރަން ފެށިކަން ރައީސް ފާހަގަކުރެއްވި އެވެ. އޭގެ ތެރެއިން، މި ރަށުގައި ގާއިމްކުރި ފެނުގެ ހިދުމަތް އެ މަނިކުފާނު ވަނީ ފައްޓަވައިދެއްވައިފަ އެވެ.

ކުރިއަށް އޮތް ފަސް އަހަރުގެ ތެރޭގައި ކަނޑިތީމުގެ މަގުތައް ޒަމާނީ ފެންވަރަށް ހަދައި، ހޭންޑްބޯޅަ ކޯޓަކާއި މޫދު ކުޅިވަރަށް ހާއްސަ ސަރަހައްދެއް ތަރައްގީކޮށްދިނުމަށް އެ މަނިކުފާނު ވަނީ ވައުދުވެވަޑައިގެންފަ އެވެ. ކަރަންޓު ވިއުގަ ހައްލުކުރަން އާ ނެޓްވޯކެއް އަޅައި، މީގެ ފަސް އަހަރު ކުރިން ބޭނުންކުރަން ފެށި ބަނދަރު އަޕްގްރޭޑު ކުރާނެ ކަމަށް ވެސް ރައީސް ވިދާޅުވި އެވެ.

އޭގެ އިތުރުން، މި ރަށުގައި ހުންނަ ށ. އަތޮޅު މަދަރުސާއަށް ދިމާވެފައިވާ ޖާގައިގެ ދަތިކަން ހައްލުކޮށްދޭނެ ކަމަށް ވިދާޅުވި އެވެ.

މި އަތޮޅު ވެސް ހިމެނޭ ހައްދުންމަތީގައި ފަށާފައިވާ އާރުޓީއެލްއާއެކު މި ސަރަހައްދަށް އަންނާނީ އިންގިލާބީ ބަދަލުތަކެއް ކަމަށާއި ކަނޑިތީމާއެކު މި އަތޮޅުގެ އެހެން ރަށްރަށުގައި ފަށާފައިވާ ތަރައްގީގެ މަޝްރޫއުަތައް ނިންމަން އިތުރު ދައުރެއް ދިނުމަށް އެ މަނިކުފާނު އެދިވަޑައިގެންނެވި އެވެ.