އުރީދޫ މަސްރޭހުގެ ކުޅުދުއްފުށި ޗެމްޕިއަންކަން ޓީމް "ބުޅިކެނޑި"އަށް

އުރީދޫ މަސްރޭހުގެ ކުޅުދުއްފުށީގެ ޗެމްޕިއަން ޓީމަކަށް ޓީމް "ބުޅިކެނޑި" ހޮވިއްޖެ އެވެ.

އެ ޓީމު ވަނީ މި މަސްރޭހުގައި މިހާތަނަށް އެންމެ ގިނަ ޕޮއިންޓު ހޯދުމުގެ ރެކޯޑު ވެސް ހަދައިފަ އެވެ. އެ ޓީމުން 1214.25 ޕޮއިންޓު ހޯދައިފަ އެވެ.

އެ ސިޓީގައި އޮތް މަސް ރޭހުގެ ރަނަރަޕްކަން ހޯދީ 659.05 ޕޮއިންޓު ހޯދި ޓީމު "ލައްޓި" އެވެ. މި ރޭހުގެ ތިން ވަނަ ހޯދީ 612.35 ޕޮއިންޓާ އެކު "ކުރިބިއަންސް" ޓީމެވެ.

މި މުބާރާތުގެ އެންމެ ބަރު މަސް ބޭނީ "ބުޅިކެނޑި" ޓީމުގެ ހަސަން އަލީ އެވެ. އޭނާ ވަނީ 25.85 ކިލޯގެ ހިބަރެއް ބާނައިފަ އެވެ.

އުރީދޫއިން ބުނީ މި ފަހަރަކީ އުރީދޫ މަސްރޭހުގެ ތާރީހުގައި އެންމެ ގިނަ ހިބަރު ބޭނި ފަހަރުކަމަށެވެ. ޓީމު "ބުޅިކެނޑި"އިން ތިން ހިބަރު އަދި ޓީމް "ލައްޓި"އިން ދެ ހިބަރު ބޭނި އެވެ.

މި މުބާރާތުގެ އެންމެ މޮޅު ކެޔޮޅަކަށް ހޮވުނީ ޓީމް "ލައްޓި"ގެ އާދަމް ހިލްމީ އަށެވެ. އޭނާ ވަނީ 16 މަސް ބާނާފަ އެވެ. މުބާރާތުގެ އެންމެ މޮޅު އަންހެން ކެޔޮޅަކަށް ހޮވުނީ "ދަމާނަގާ" ޓީމުގެ ހަދީޖާ މޫސާ އެވެ.

އުރީދޫ މަސްރޭހުގެ މާލެ އަދި ކުޅުދުއްފުށީ މުބާރާތް ނިމިފައި ވާއިރު އަންނަ ހުކުރު ދުވަހު އައްޑޫގައި މި މުބާރާތް ކުރިއަށް ދާނެ އެވެ. އަދި މި މަހުގެ 25 ވަނަ ދުވަހު ފުވަމުލައް ސިޓީގައި މުބާރާތް އޮންނާނެ އެވެ.

މި މުބާރާތަށް ހޫނު ތަރުހީބެއް އަންނަނީ ލިބެމުންނެެވެ.