އިހަވަންދޫގެ ބޮޑު ތާއީދެއް މުއިއްޒަށް، ދިގުފަރު ހިއްކައި އިހަވަންދުއާ ގުޅާލަދޭނެ ކަމުގެ ވައުދު!

ހއ. ދިގުފަރު ހިއްކައި މި އަތޮޅު އިހަވަންދުއާ ގުޅާލައި ސިނާއީ މަސައްކަތް ކޮށްދޭ ގޮތް ހަދައިދޭނެ ކަމަށް، އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

އަންނަ މަހުގެ 9 ގައި ބާއްވާ ރިޔާސީ އިންތިހާބުގެ ކެމްޕެއިނަށް ރާއްޖޭގެ އުތުރަށް ފައްޓަވާފައިވާ ދަތުރުގައި، އިހަވަންދޫގައި ބޭއްވި ބައްދަލުވުމުގައި ޕީޕީއެމް/ޕީއެންސީ ކޯލިޝަންގެ ކެންޑިޑޭޓް ވިދާޅުވީ މި ރަށުގައި މީހުން ދިރިއުޅޭ ހިސާބުގައި ދޯނި ފައިބަރު މަސައްކަތް ކުރުމަކީ ސިއްހަތަށް ގެއްލުން ލިބޭ ކަމެއް ކަމަށެވެ.

ދުޅަހެޔޮ މުޖުތަމައެއް ބިނާކުރުމަށް އެކަން ބަދަލުކުރަން ޖެހުނަސް އޭގެ ހައްލު ގެންނާނެ ބިމެއް ނެތްކަން އޭނާ ފާހަގަކުރެއްވި އެވެ. އެހެންވެ، ބިމުގެ މައްސަލަ ހައްލުކުރުމަށް ދިގުފަރު ހިއްކައި ދެ ރަށް ގުޅާލައި ސިނާއީ މަސައްކަތަށް ހާއްސަކޮށްދިނުމަށް ވައުދުވެވަޑައިގެންނެވި އެވެ.

އިހަވަންދުއަކީ ރާއްޖޭގައި މަސްވެރިކަމުގައި އެއް ހަބެވެ. ނަމަވެސް، މަސްވެރިކަން ކުރިއަރުވައި، އެ ދާއިރާގައި ހުރި ޝަކުވާތައް ހައްލު ކޮށްދިނުމަށް އެކަށީގެންވާ މަސައްކަތެއް ނުކުރާތީ، މުއިއްޒު ވަނީ އިހަވަންދޫގެ މަސްވެރިކަމުގެ ސިނާއަތް ކޮޅަށް ޖަހާނެ ކަމަށް ވިދާޅުވެފަ އެވެ.

އޭގެ އިތުރުން، ފިޝް ކަލެކްޝަން ސެންޓަރެއް ހަދައި އައިސްޕްލާންޓް ބަހައްޓައި ފަސޭހައިން ތެޔޮ ލިބޭނެ ގޮތް ހަމަޖައްސައިދޭނެ ކަމަށް ވެސް ވިދާޅުވި އެވެ.

ސިއްހީ ނިޒާމަކީ ހުރިހާ ހިސާބެއްގައި ވެސް ޔާމީން އިސްކަންދިން އެއް ދާއިރާ ކަމަށާއި މި ރަށުގެ އާބާދީ ބޮޑުއިރު، އެކަށީގެންވާ ވަރުގެ ހޮސްޕިޓަލެއް ނެތް ކަމަށެވެ. އެއްވެސް ބަޔަކު ސުވާލު އުފައްދައިގެން ނުވާނެ ކަމަށް ވިދާޅުވެ، މުއިއްޒު ވަނީ އޭނާ ވެރިކަމަށް ހޮވިއްޖެ ނަމަ ވެރިކަމުގެ ފުރަތަމަ އަހަރު އިހަވަންދޫގައި ރަނގަޅު ފެންވަރުގެ ހޮސްޕިޓަލެއް އިމާރާތް ކޮށްދޭނެ ކަމުގެ ވައުދުވެވަޑައިގެންފަ އެވެ.

މި ރަށުގެ މަގުތައް ހަދާފައި ނުވާތީ ވެސް މުއިއްޒު ކަންބޮޑުވުން ފާޅުކުރެއްވި އެވެ. ވިދާޅުވީ މަގު ހެދުމަކީ ތަރައްގީ ހާސިލްކުރަން ބޭނުންވާނަމަ ކުރަންޖެހޭ ކަމެއް ކަމަށެވެ.

"މަގުތައް ހެދުމަކީ އޭގެ ސަބަބުން އިގުތިސޯދީ މަސައްކަތްތަކަށް ވެސް ވަރަށް ބޮޑު ކުރިއެރުމެއް ލިބޭ ކަމެއް. މަގުތައް ރަނގަޅަށް ހެދުމުގެ ސަބަބުން އާއްމު ދިރިއުޅުމަށް ވަރަށް ބޮޑު ފަސޭހައަކަށް ވެގެންދޭ...ރައީސް ޔާމީންގެ ވެރިކަމުގައި ރާއްޖޭގެ އެތައް ރަށެއްގައި މަގު ހެދުމުގެ މަސައްކަތް ކޮށްފައިވޭ،" އަލަށް ހުޅުވި ޖަގަހައިގައި ބޭއްވި ބައްދަލުވުމުގައި މުއިއްޒު ވިދާޅުވި އެވެ.

"މަގު ހެދުމަކީ އަޅުގަނޑުމެންނަށް ވަރަށް ފަރިތަ ކަމެއް. އެހެންވީމާ ޔަގީން ކުރައްވާ. މި ރަށުގެ މަގުތައް އަޅުގަނޑުމެން ހަދައިދޭނެކަން."

އިހަވަންދޫގައި ރަނގަޅަށް ކުނި މެނޭޖްކުރެވޭނެ ގޮތެއް ނެތް ކަމަށް މި ރަށު މީހުން ބުނާތީ ހައިރާންވެވަޑައިގެންނެވި ކަމަށް މުއިއްޒު ވިދާޅުވި އެވެ. އެއީ، ގާނޫނުން އާއްމު ހިދުމަތްތަކުގެ ތެރެއިން މަޖުބޫރު ކަމަކަށް ވިޔަސް ސަރުކާރުން މަގުފަހި ނުކޮށްދޭތީ އެކަން ކުރިއަށް ނުގެންދެވޭ ކަމަށް ވިދާޅުވި އެވެ. އެކަމަށް ވެސް މުއިއްޒު ވަނީ އުއްމީދެއް ގެނެސްދެއްވައިފަ އެވެ.

"...މިހާ އާބާދީ ބޮޑު ރަށެއްގައި ކުނި މެނޭޖު ކުރެވޭނެ ގޮތެއް ނެތުމަކީ ވަރަށް ބޮޑު އިހުމާލެއްގެ ގޮތުގައި އަޅުގަނޑަށް ގަބޫލުކުރެވޭ. އެހެންވީމާ، ޔަގީން ކުރަންވީ ކަމަކީ ކުނި މެނޭޖު ކުރުމަށް ރަނގަޅު ނިޒާމެއް މި ރަށުގައި ގާއިމް ކޮށްދޭނަން،" މުއިއްޒު ވިދާޅުވި އެވެ.

ގެދޮރު ބިނާކުރުމަކީ ކޮންމެ ރައްޔިތެއްގެ އަސާސީ ހައްގެއް ކަމަށާއި އެ ކަންކަމަށް ވެސް ހައްލުތަކެއް ގެނެސްދެއްވާނެ ކަމަށް މާލޭގެ މޭޔަރުކަން ވެސް ކުރައްވާ މުއިއްޒު ވިދާޅުވި އެވެ.

ކުރީގެ ރައީސް އަބްދުﷲ ޔާމީން އެންމެ އިސްކަން ދެއްވީ ޒުވާނުންނަށް ކަމަށާއި އެއީ އަބުރުވެރި ދިރިއުޅުމެއް އުޅޭ ބަޔަކަށް ހަދަންޖެހޭ ކަމަށް މުއިއްޒު މިރޭ ވިދާޅުވި އެވެ. އެ މީހުން ހިތްހަމަޖެހިލައިގެން އުޅެ، ރަނގަޅު ފަރުވާއަކާއި ވަޒީފާ އަދި ކުޅިވަރު ކުޅޭނެ ތަންތަން ވެސް ހަދައިދޭން ޖެހޭ ކަމަށް ވިދާޅުވި އެވެ. އެގޮތުން، މި ރަށުގައި މަލްޓި ސްޕޯޓްސް ކޮމްޕްލެކްސް ހަދައިދޭނެ ކަމަށް އޭނާ ވިދާޅުވި އެވެ.

ރިޔާސީ ކެމްޕެއިނަށް އިހަވަންދު އަށް މުއިއްޒު ވަޑައިގަތުމުން ވަރަށް ގިނަ ބަޔަކު ނުކުމެ އޭނާ އަށް މަރުހަބާ ކިޔާފައި ވެ އެވެ. މިއީ ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީގެ ހަބެއް ކަމަށް ކުރިން ބުނަމުން އައި ނަމަވެސް މި ވެރިކަމުގެ ފަސް އަހަރުގައި މިހާ ހިސާބަށް އައި އިރު އެކަން ބަދަލުވެ، އިދިކޮޅު ޕީޕީއެމް/ޕީއެންސީ އަށް ތާއީދު އަނބުރާލާފައިވާ ކަމަށް ވެ އެވެ.

މިރޭގެ ޖަލްސާގައި ޕީއެންސީގެ ރައީސް އަބްދުއްރަހީމް އަބްދުﷲ ވެސް ވިދާޅުވީ، މުޅި ރާއްޖޭގައި ވެސް މިހާރު ޕީޕީއެމް/ޕީއެންސީގެ އެންމެ ބޮޑު "އައްޑާ" އަކީ އިހަވަންދޫ ކަމަށެވެ.