މަޝްވަރާކުރަން ނައިޖަރުގެ އަސްކަރީ ވެރިން އެއްބަސްވެއްޖެ

އަސްކަރީ އިންގިލާބަކުން ސިފައިންގެ އަތްމައްޗަށް ވެރިކަން ފުރޮޅާލާފައިވާ ނައިޖަރުގައި ސިޔާސީ ހާލަތު ހަމައަކަށް އެޅުވުމާ ބެހޭ ގޮތުން، ހުޅަނގު އެފްރިކާ ގައުމުތަކުގެ ވަފުދާ އެކުގައި މަޝްވަރާ ކުރަން، ނައިޖަރުގެ އަސްކަރީ ވެރިން އެއްބަސްވެއްޖެ އެވެ.

ބައިނަލްއަގުވާމީ މީޑިއާތަކުން ބުނާ ގޮތުގައި ނައިޖަރުގެ އަސްކަރީ ސަރުކާރުން އެކަމަށް އެއްބަސްވީ، އެ ގައުމަށް ޒިޔާރަތްކުރި ނައިޖީރިއާގެ އިސްލާމީ އިލްމުވެރިންގެ ވަފުދަކާ އެކުގައި ކުރި މަޝްވަރާތަކުގަ އެވެ. އެ ވަފުދުން އިއްޔެ ބުނި ގޮތުގައި އެފްރިކާގެ 15 ގައުމު ބައިވެރިވާ އިކޮނިމިކް ކޮމިޔުނިޓީ އޮފް ވެސްޓް އެފްރިކަން ސްޓޭޓްސް (އިކޯވަސް)ގެ ވަފުދަކާ އެކުގައި ސީދާ މަޝްވަރާތައް ބޭއްވުމަށް، ނައިޖަރުގެ އަސްކަރީ ވެރިޔާ ޖެނެރަލް އަބްދުއްރަހްމާން ޗިއާނީ އެއްބަސްވެވަޑައިގެންނެވި އެވެ.

އިކޯވަސްއާ އެކުގައި މަޝްވަރާ ކުރަން ނައިޖަރުގެ އަސްކަރީ ވެރިން އެއްބަސްވި އިރު، އެ ގައުމުގައި ކުރިން އޮތް މަދަނީ ސަރުކާރާ އަލުން ވެރިކަން ހަވާލުކުރުމަށް އިކޯވަސް އިން މީގެ ކުރިން މުހުލަތެއް ވެސް ދިނެވެ. އެ މުހުލަތުގައި މަދަނީ ސަރުކާރާ ވެރިކަން ހަވާލުނުކޮށްފި ނަމަ، ބާރުގެ ބޭނުންކުރަން ޖެހިދާނެ ކަމަށް ވެސް އިކޯވަސް އިން އޮތީ އިންޒާރުކޮށްފަ އެވެ.

މުހުލަތު ހަމަވެގެން ދިޔައިރު ވެސް، މަދަނީ ސަރުކާރާ ވެރިކަން ހަވާލު ނުކުރުމާ ގުޅިގެން، އިކޯވަސް އިން މިހާރު މަސައްކަތް ކުރަމުން އަންނަނީ. ޑިޕްލޮމެޓިކް އެހެން ގޮތްތައް މެދުވެރިކޮށްގެން މައްސަލަ އަށް އަވަސް ހައްލެއް ގެނައުމަށެވެ.

އިކޯވަސްއާ އެކުގައި މަޝްވަރާ ކުރުމަށް ނައިޖަރުގެ އަސްކަރީ ވެރިން އެއްބަސްވުމާ ގުޅިގެން، ނައިޖީރިއާގެ އިލްމުވެރިންގެ ވަފުދުން، ނައިޖަރުގެ ވެރިންނަށް މިހާރު އަންގާފައިވަނީ މަޝްވަރާ ބާއްވާނެ ތަނެއް ކަނޑައަޅައިދިނުމަށެވެ. ނައިޖަރު ސަރުކާރުން ބޭނުންވާ ނަމަ އެ ގައުމުގައި ވެސް ނުވަތަ ނައިޖީރިޔާގައި ނުވަތަ އެހެން ގައުމެއްގައި ވެސް މަޝްވަރާތައް ބޭއްވިދާނެ ކަމަށް، އިލްމުވެރިންގެ ވަފުދުން ބުނެ އެވެ.

ނައިޖީރިޔާގެ އިލްމުވެރިން ވަފުދެއް ނައިޖަރުގެ އަސްކަރީ ވެރިންނާ ވާހަކަ ދެއްކުމަށް އެ ގައުމަށް މިދިޔައީ، އިކާވޮސް އިން އެ ވަފުދަށް ރުހުން ދިނުމާ އެކު، އެ ޖަމާއަތުގެ ޗެއާމަންގެ ހައިސިއްޔަތުން ނައިޖީރިޔާގެ ރައީސް ބޯލާ ޓިނޫބޫ އެދިވަޑައިގަތުމުންނެވެ.

ނައިޖީރިޔާގެ އިލްމުވެރިންނާ އެކުގައި ބޭއްވި މަޝްވަރާތަކުގައި ނައިޖަރުގެ އަސްކަރީ ވެރިޔާ ޗިއާނީ ވިދާޅުވީ އިކާވޮސް އިން ނައިޖަރަށް އެންމެ ފަހުގެ އިންޒާރު ދިނީތީ އެކަމާ ވަރަށް ކަންބޮޑުވެ އެވެ. ކަން ހިނގާފައިވާ ގޮތަށް ބެލުމެއް ނެތި، އަދި އިންގިލާބީ ވެރިންގެ ވާހަކަތައް އަޑުއެހުމެއް ނެތި، އެންމެ ފަހުގެ އިންޒާރު ދިނީތީ ހިތާމަކުރާ ކަމަށް ވެސް އޭނާ ވިދާޅުވި އެވެ.

މަޝްވަރާ ކުރުމަށް އަސްކަރީ ވެރިން އެއްބަސްވި އިރު، ވެރިކަމުން ދުރުކޮށް މިހާރު ހައްޔަރުކޮށްފައި ހުރި ރައީސް މުހައްމަދު ބާޒޫމްގެ މައްޗަށް ދައުވާ ކުރުމަށް އަސްކަރީ ސަރުކާރުން ވަނީ ނިންމައިފަ އެވެ. އަސްކަރީ ސަރުކާރުން ބުނި ގޮތުގައި އެންމެ ބޮޑު ޚިޔާނާތުން ގައުމަށް ޚިޔާނާތްތެރިވުމުގެ ކުށުގައި ރައީސް ބާޒޫމްގެ މައްޗަށް ދައުވާ ސާބިތުކުރެވޭ ވަރުގެ ހެކި ލިބިފައި އެބަހުއްޓެވެ.

ޖުލައި 26، 2023 ގައި ސިފައިންގެ އިސް ޖެނެރަލުން ގެނައި އިންގިލާބެއްގައި ރައީސް މުހައްމަދު ބާޒޫމް މަގާމުން ދުރު ކުރުމަށް ފަހު، މިއަދާ ހަމައަށް ވެސް އޭނާ ހުންނެވީ ސިފައިންގެ ބެލުމުގެ ދަށުން ހައްޔަރުކޮށްފައި އެ ގައުމުގެ ރިއާސީ ގަނޑުވަރުގަ އެވެ. އެ ގަނޑުވަރުގައި އޭނާއާ އެކު އޭނާގެ އަނބިކަނބަލުންނާއި ދަރިކަލުން ވެސް އެބަ ތިއްބެވި އެވެ.

އަސްކަރީ ސަރުކާރުން ބުނި ގޮތުގައި ރިއާސީ ގަނޑުވަރުގައި ރައީސް ބާޒޫމް ހުންނެވީ ފުރިހަމަ ހިމާޔަތުގަ އެވެ. ބޭނުން ވަސީލަތަކުން ބޭނުން ކޮންމެ މީހަކާ މުވާސަލާތު ކުރުމުގެ މިނިވަންކަން ވެސް ގަނޑުވަރުގައި ހަމަޖެހިފައިވާ ކަމަށާއި، ގަނޑުވަރުގެ އެތެރޭގައި ސިފައިން ނުތިބޭނެ ކަމަށް ވެސް އަސްކަރީ ސަރުކާރުން ބުންޏެވެ.