އަމީނިއްޔާ ސްކޫލުގައި ހުރި ބައިގަރުނުވީ މަޑިމަސް ވަކަރު ގަސް ވެއްޓިއްޖެ

އަމީނިއްޔާ ސްކޫލުގެ ގޯތި ތެރޭގައި ހުރި ބައި ގަރުނުވީ މަޑިމަސްވަކަރު ގަސް ވެއްޓިއްޖެ އެވެ.

އަހަރުގެ ވަކި ދުވަސްވަރެއްގައި ގިނަ އަދަދަކަށް މާ އަޅާތީ ގިނަ ބައެއްގެ ސަމާލުކަން ލިބޭ މި ގަސް ވެއްޓުނީ މިއަދު ހެނދުނު ކަމަށާއި އެ ވަގުތު ދަރިވަރުން ސްކޫލްގައި އުޅުނަސް ކުއްޖަކަށް އަނިޔާއެއް ނުވާ ކަމަށް އަމީނިއްޔާ ސްކޫލުގެ ޕްރިންސިޕަލް ނާޒްލީން ވާފިރު ވިދާޅުވި އެވެ.

"ކުނިކަހާ މުވައްޒަފުން އެތަން ކުނި ކަހައި ނިންމާފައި ހަމަ ދިޔަ ތަނާ ވެއްޓުނީ، އެއީ ހެނދުނު 8 ޖަހާ އެހާއިރު. ގަސްގަނޑުގެ އެތެރެ އެއްކޮށް ހިކި ހޮއި ހެދިފައި އޮތީ. މުލުން ލުހެވިގެން ވެއްޓުނީ،" ނާޒް ވިދާޅުވި އެވެ.

މިހާރު ގަސް ނަގައި ސާފުކުރުމަށް ވެމްކޯ، ސިޓީ ކައުންސިލާއި އެޑިޔުކޭޝަން މިނިސްޓްރީން މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

"އެހާ ގިނަ ދުވަސްވީ ގަހެއް ވެއްޓުނީމާ އަޅުގަނޑަށް ހަމަ ރޮވުނު. ވަރަށް ދިގު ތާރީހެއް އޮންނާނެ، ރީތި މާ އަޅާ، ފޮޓޯނަގަން ވެސް އެތައް ބައިވަރު ކުދިންނެއް އަންނާނެ މާ އަޅާ ދުވަސްކޮޅު، އެހާ ބޮޑު ހިޔާގަނޑެއް އޮތް ގަހެއް އެއީ،" އޭނާ ވިދާޅުވި އެވެ.

ރާއްޖޭގެ ތާރީހު ދިރާސާ ކުރައްވާ ބޭފުޅުން ވިދާޅުވަނީ އެ ގަހަކީ ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި އިންދާފައިވާ ގަހެއް ކަމަށެވެ. އެ ތަނުގައި އެ ގަސް ހުންނަތާ ފަންސާހަކަށް އަހަރު ވާނެ ކަމަށް ވެސް އެ ބޭފުޅުން ވިދާޅުވެ އެވެ.

މަޑިމަސް ވަކަރު (ރޯޒީ ޓްރަމްޕެޓް) އަކީ ހޫނު މޫސުން އެއްކޮށް އޮންނަ ގައުމުތަކުގައި ހެދޭ، ބަހާރުމޫސުމުގެ ދުވަސްތަކުގައި މާ އަޅާ ގަހެކެވެ. އެއީ ކުރީގައި ރާއްޖޭގައި އެހާ ގިނައިން ނެތް ނަމަވެސް މިހާރު ވަރަށް ގިނައިން ރަށްރަށުގަ އާއި މާލޭގައި ވެސް ހެދިފައި ހުންނަ ގަހެކެވެ.

މަޑިމަސް ވަކަރު ގަސް ގިނަ މީހުންނަށް އެނގެން ފެށީ މީގެ ދެ އަހަރެއްހާ ދުވަސް ކުރިން މާލެ އާއި ހުޅުމާލޭގައި ހުރި އޭގެ ގަސްތަކުގައި އާދަޔާހިލާފަށް ގިނައިން މާ އެޅުމުންނެވެ. ކޮވިޑްގެ ދުވަސްވަރު ނަމަވެސް އެ ބެލުމަށް ގިނަ ބަޔަކު ދިޔަ އެވެ.

އޭގެ ފަހުން ކޮންމެ އަހަރަކު ވެސް މާ ފޮޅޭ ދުވަސްވަރު ފޮޓޯ ނަގަން ގިނަ ބަޔަކު މީގެ ގަސްތައް ހުންނަ ހިސާބުތަކަށް ދެ އެވެ.