ޔާމީނާއި ފާރިސް ބައްދަލެއް ނުކުރޭ: ޕީޕީއެމް

ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ އެމްއާރްއެމްގެ ރައީސް ފާރިސް މައުމޫން އޭނާ ބޮޑުބޭބެ ވިދާޅުވާ ކުރީގެ ރައީސް އަބްދުﷲ ޔާމީންް އާ ބައްދަލު ކުރެއްވި ކަމަށް ބުނާ ވާހަކަތައް ޕީޕީއެމް އިން ދޮގުކޮށްފި އެވެ.

ޕީޕީއެމް އިން މިރޭ ނެރުނު ބަޔާނެއްގައި ބުނީ ޔާމީނާއި ފާރިސް ބައްދަލު ކުރެއްވި ކަމަށް ބުނެ ބައެއް މީޑިއާތަކުގައި ފަތުރާފައި ވަނީ ދޮގު ހަބަރެއް ކަމަށާއި އެއީ ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒަށް ޔާމީން ތާއީދު ކުރެއްވުމުން އެކަން ހަޖަމު ނުވެގެން ފަތުރާފައިވާ ހަބަރެއް ކަމަށެވެ.

ޔާމީން ވަނީ ޕީއެންސީގެ ކެންޑިޑޭޓު މުއިއްޒަށް ތާއީދުކުރައްވައި އޭނާ އަށް ވޯޓު ދެއްވުމަށް އެދިވަޑައިގެންފައި ކަމަށާއި ނަމަވެސް ކޯލިޝަންގެ މެންބަރުން ބައިބައި ކުރަން ސަރުކާރުން މަސައްކަތް ކުރަމުން އަންނަ ކަމަށް ޕީޕީއެމް އިން ތުހުމަތު ކުރި އެވެ.

"...[ފާރިސް އާ ޔާމީން ބައްދަލު ކުރި ވާހަކައަކީ] މި ކޯލިޝަންގެ މެންބަރުން ބައިބައިކޮށް ފިތުނަ އުފެއްދުމުގެ ބޭޏުމުގައި ބަޔަކު ފަތުރަމުން ގެންދާ ދޮގު ހަބަރެއް،" ޕީޕީއެމްގެ ބަޔާނުގައި ބުނެފައި ވެ އެވެ.

ފާރިސް ޔާމީނާ ބައްދަލު ކުރި އަޑުފެތުރުމާއެކު "މިހާރު"ން ވަނީ އެ ކަން ސާފު ކުރުމަށް ފާރިސް އަށް ތަކުރާރުކޮށް ގުޅައިފަ އެވެ. ނަމަވެސް އޭނާ ފޯނަށް ޖަވާބު ދެއްވާފައި ނުވާތީ އެކަމުގައި ފާރިސްގެ ބަހެއް ނުލިބެ އެވެ.