ބައްޕާފުޅުގެ ވެރިކަމުގައި ބަޔަކަށް އަނިޔާއާ ކުރިމަތިވިކަން ގަބޫލުކޮށް ފާރިސް މާފަށް އެދިވަޑައިގެންފި

ބައްޕާފުޅު، ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގައި ރައްޔިތުންނަށް ކުރިމަތިވި އަނިޔާތަކާއި ހިތްދަތިކަމަށް ދަރިކަލުން ފާރިސް މައުމޫން މާފަށް އެދިވަޑައިގެންފި އެވެ.

އަންނަ ހޮނިހިރު ދުވަހު އޮންނަ ރިޔާސީ އިންތިހާބުގައި އަމިއްލަ ގޮތުން ވާދަކުރައްވާ ފާރިސް މާފަށް އެދިވަޑައިގަތީ މައުމޫންގެ ވެރިކަމުގައި ރައްޔިތުންނަށް ދިން އަނިޔާތަކާ ގުޅޭގޮތުން އާންމުގެ މީހަކު ކުރި ސުވާލެއްގެ ޖަވާބުގައި، އޭރު ހިނގީ އަނިޔާވެރިކަމެއް ނޫން ކަމަށް ފާރިސް ވިދާޅުވުމުން ސޯޝަލް މީޑިއާގައި އަމާޒުވި ފާޑުކިޔުންތަކާ އެކުގަ އެވެ.

ފާޑުކިޔުންތަކާ ގުޅިގެން ސޯޝަލް މީޑިއާގައި އާންމުކުރެއްވި ކުރު ވީޑިއޯއެއްގައި ފާރިސް ވިދާޅުވީ، ބައްޕާފުޅުގެ ވެރިކަމެއްގައި ބަޔަކަށް އަނިޔާތަކާއި ހިތާމަތަކެއް ކުރިމަތިވިކަން އެއީ ހަގީގަތެއް ކަމަށާއި އެކަން ގަބޫލުކުރައްވާ ކަމަށެވެ. އަދި އޭރު ލިބުނު އަނިޔާތަކުގެ ހިތާމާގައި އެތައް ބަޔަކު އަދިވެސް ތިބިކަން ގަބޫލުކުރައްވާ ކަމަށް ވެސް މައުމޫންގެ އެންމެ ދޮށީ ދަރިކަލުން ފާރިސް ވިދާޅުވި އެވެ.

"އެއީ އަޅުގަނޑު ދޮގުކުރާ ކަމެއް ނޫން. އަދި މިކަމަށްޓަކައި ތިޔަ ބޭފުޅުންގެ އަރިހުން އަޅުގަނޑު ނިހާޔަތަށް މާފަށް އެދެން،" ފާރިސް ވިދާޅުވި އެވެ.

މީގެއިތުރުން، މައުމޫންގެ ވެރިކަމުގައި ހިނގީ އަނިޔާވެރި ކަމެއް ނޫން ކަމަށް ވިދާޅުވެވުނީތީ ވެސް ފާރިސް މާފަށް އެދިވަޑައިގަތެވެ. އަދި އޭނާއަށް ވެރިކަން ލިބިވަޑައިގެންފި ނަމަ، އެ ހުރިހާ ފަރާތްތަކަށް "ތަސައްލީ"އެއް ހޯދައި ދެއްވައި ދެން އެފަދަ ކަމެއް ކުރިމަތިނުވާނެ ކަން ކަށަވަރުކުރުމަކީ އަމިއްލަ ޒިންމާއެއް ކަމަށް ހައްދަވާނެ ކަމަށް ވިދާޅުވި އެވެ.