އަމާންކަން ގެއްލޭ ވާހަކަ މަނާކުރި މާއްދާ ބާތިލްކުރުމުން ސުޕްރީމް ކޯޓަށް

އަމާންކަން ގެއްލޭ ވާހަކަ ދެއްކުން މަނާކުރަން އާންމު ގާނޫނުތަކުގައި ބަޔާންކޮށްފައިވާ މާއްދާ ހައި ކޯޓުން ބާތިލްކުރި މައްސަލަ ދައުލަތުން ސުޕްރީމް ކޯޓުގައި އިސްތިއުނާފްކޮށްފި އެވެ.

ރާއްޖޭގައި 1968 ވަނަ އަހަރުން ފެށިގެން އަމަލުކުރަމުން އަންނަ އާންމު ގާނޫނުތަކުގެ އަށް ވަނަ މާއްދާގެ ދެވަނަ ނަމްބަރުގެ ދަށުން، އަމާންކަން ގެއްލޭ ވާހަކަތައް ދެއްކުމަކީ މަނާ ކަމެކެވެ. އިންޑިއާ އައުޓް ހަރަކާތްތައް ހުއްޓުވަން މިދިޔަ އަހަރު ރައީސް ނެރުއްވި ގަރާރު ބާތިލްކުރަން ހައި ކޯޓަށް ހުށަހެޅި ދުސްތޫރީ މައްސަލައިގެ ތެރޭގައި ގާނޫނުގެ އެ ބައި ބާތިލްކުރަން އެދުމުން ހައި ކޯޓުގެ ނިންމީ ގާނޫނުގެ އެ ބައި ބާތިލް ކަމަށެވެ. ނަމަވެސް އިންޑިއާ އައުޓް ގަރާރުގެ މައްސަލައަކީ ދުސްތޫރީ މައްސަލައެއް ނޫން ކަމަށް އެ މައްސަލާގައި ކޯޓުން ނިންމި އެވެ.

ގާނޫނުގެ އެ ބައި ބާތިލްކުރި މައްސަލަ އިސްތިއުނާފް ކުރަން ދައުލަތުން ސުޕްރީމް ކޯޓަށް ހުށަހެޅީ އިއްޔެ އެވެ. އެ މައްސަލަ ބަލައިގަތުމާ މެދު އެ ކޯޓުން އަދި ވަކި ގޮތެއް ނުނިންމަ އެވެ.

ގާނޫނުގެ އެ މާއްދާ އިސްލާހު ކުރަން ދައުލަތަށް ފުރުސަތު ދިނުމަށް ދައުލަތުން ހައި ކޯޓުގައި އެދުނަސް، ފަނޑިޔާރުންގެ އަގުލަބިއްޔަތުން ނިންމީ ގާނޫނު އަސާސީއާ ހިލާފްވާ ގާނޫނުތައް އިސްލާހުކުރަން 15 އަހަރުގެ މުއްދަތެއް ދައުލަތަށް ލިބުނުމުން ވެސް އެކަން އިސްލާހު ކުރެވިފައި ނެތް ކަމަށެވެ.

އެހެންވެ، އިތުރު ފުރުސަތެއް އެކަމަށް ދޭން ނުޖެހޭނެ ކަމަށް ނިންމައި، އެ މާއްދާ ބާތިލްކުރަން ހަތަރު ފަނޑިޔާރުންގެ އަގުލަބިއްޔަތުން ނިންމި އެވެ. ނަމަވެސް ރައުޔު ތަފާތުވި ފަނޑިޔާރު މުހައްމަދު ނިޔާޒް ނިންމެވީ އެ ބައި ބާތިލް ނުކުރެވޭނެ ކަމަށެވެ.