މުއިއްޒުގެ ސަރުކާރުގެ މަގާމުތަކުގައި ޑިމޮކްރެޓްސްގެ ބޭފުޅުން ތިބޭނެ: ހަސަން

އިންތިހާބީ ރައީސް ޑރ. މުހައްމަދު މުއިއްޒުގެ ސަރުކާރުގެ އެކި މަގާމުތަކުގައި ޑިމޮކްރެޓްސްގެ މެމްބަރުން ތިއްބަވާނެ ކަމަށް އެ ޕާޓީގެ މުއައްސިސް ހަސަން ލަތީފް މިއަދު ވިދާޅުވެއްޖެ އެވެ.

ޑިމޮކްރެޓްސް އިން މިއަދު މެންދުރު ފަހު ބޭއްވި ނޫސްވެރިންގެ ބައްދަލުވުމއްގައި ނޫސްވެރިއަކު ކުރި ސުވާލެއްގެ ޖަވާބުގައި ހަސަން ވިދާޅުވީ މުއިއްޒުގެ ސަރުކާރު ހިންގުމުގައި އެ ޕާޓީގެ ބައިވެރިވުން އޮންނާނެ ކަމަށެވެ.

"އުއްމީދު ކުރަނީ އެ ސަރުކާރު ހިންގުމުގައި ވެސް ބައިވެރިވުން. ކޮންމެހެން ސަރުކާރަށް މަޝްވަރާ އާއި ލަފާ ދިނުމަށް އެ ގޮތްގޮތުން ބައިވެރިވުން އެކަންޏެއް ނޫން، ސަރުކާރު ހިންގުމުގައި ވެސް ބައިވެރިވުން. އެ މާނައިގައި ކުރިން ވެސް އެ ވާހަކަ ދެންނެވީ،" ހަސަން ވިދާޅުވި އެވެ.

"ސަރުކާރު ހިންގުމުގައި އޭގެ މާނައަކީ ސަރުކާރުގެ އެކި މަގާމުތަކުގައި ވެސް ޑިމޮކްރެޓްސްގެ މެންބަރުން ވެސް ތިއްބެވުން."

އަންނަ މަހުގެ 17 ގައި ރައީސްކަމުގެ ހުވާ ކުރައްވާ މުއިއްޒު ބައެއް އިންޓަވިއުތަކުގައި ވިދާޅުވެފައިވާ ގޮތުގައި، އެއްވެސް ޕާޓީއަކަށް ވަކި މަގާމެއް ދޭން ނިންމާފައި ނުވާނެ އެވެ. އެކަމަކު، އެކަށީގެންވާ ތައުލީމެއް ލިބި، ގާބިލް ބޭފުޅެއްގެ ނަން ހުށަހަޅައިފި ނަމަ އެ ފުރުސަތު އޮންނާނެ ކަމަށް އެ މަނިކުފާނު ވިދާޅުވެފައި ވެ އެވެ.

މުއިއްޒު ނިންމަވާފައި ވަނީ "މަތި ބަރު ނޫން" ސަރުކާރެއް އެކުލަވައިލާށެވެ. މަގާމުތަކަށް އައްޔަން ކުރައްވާނީ ވެސް ތައުލީމީ، ގާބިލު ބޭފުޅުން ކަމަށް އެ މަނިކުފާނު ވިދާޅުވެފައި ވެ އެވެ.

ރިޔާސީ އިންތިހާބު މުއިއްޒު ކާމިޔާބު ކުރެއްވި ފަހުން، މިދިޔަ އާދިއްތަ ދުވަހު އެކްސްގައި ކުރެއްވި ޕޯސްޓެއްގައި ހަސަން ވަނީ މުއިއްޒުގެ ސަރުކާރު ހިންގުމުގައި އެ ޕާޓީން ބައިވެރިވާނެ ކަމަށް ވިދާޅުވެފަ އެވެ. ނަމަވެސް، އިތުރު ތަފުސީލު އޭރަކު ނުދެއްވަ އެވެ.

ރިޔާސީ އިންތިހާބުގެ ފުރަތަމަ ބުރުގައި ވާދަކުރި ޑިމޮކްރެޓްސްގެ ކެންޑިޑޭޓް ހުޅުދޫ ދާއިރާގެ މެމްބަރު އިލްޔާސް ލަބީބަށް ވަނީ ތިންވަނަ އަށް އެންމެ ގިނަ ވޯޓު ހޯއްދަވައިފަ އެވެ. އެއީ 15،000 ވޯޓެވެ. ނަމަވެސް، ދެވަނަ ބުރުގައި އެ ޕާޓީން ނިންމީ އެއްވެސް ކޮޅަކަށް ތާއީދު ނުކުރުމަށެވެ. އެކަމަކު، އެ ޕާޓީގެ ބައެއް އިސް ބޭފުޅުންނާއި ގޮފިތަކުންނާއި އާންމު މެންބަރުން ވަނީ ދެ ވަނަ ބުރުގައި މުއިއްޒަށް ތާއީދު ކޮށްފަ އެވެ.

ޑިމޮކްރެޓްސް އަކީ އެމްޑީޕީއާ ހިޔާލު ތަފާތުވެ، އެ ޕާޓީން ވަކިވެވަޑައިގެންނެވި ބައެއް ބޭފުޅުން އިސްވެ އުފެއްދި ޕާޓީއެކެވެ. ނަޝީދު އިސްކޮށް ހުންނަވާ އުފެއްދި އެ ޕާޓީ ދޫކުރައްވައި، އަލުން ވެސް އެމްޑީޕީއާ ގުޅިވަޑައިގަތުމުގެ ޝައުގުވެރިކަން އެމަނިކުފާނު ވަނީ ފާޅުކުރައްވައިފަ އެވެ.

ޑިމޮކްރެޓްސް އިން އެންމެ ބޮޑަށް ވަކާލާތު ކުރަނީ ރާއްޖޭގެ ވެރިކަމުގެ ނިޒާމު ބަރުލަމާނީ އަށް ބަދަލުކުރުމަށެވެ. އެކަމަށް ރައްޔިތުންގެ މަޖިލީހުގެ ތެރެއިން މަސައްކަތް ކުރަމުންދާއިރު، އެމްޑީޕީގެ ގިނަ މެންބަރުން އިންތިހާބަށް ފަހު ގެންދަނީ އެކަމާ ދެކޮޅު ހަދަމުންނެވެ. އަދި ނިޒާމު ބަދަލުކުރުމުގެ ފުރުސަތު ނުދޭން އެ ޕާޓީގެ ގައުމީ މަޖިލީހުން ވެސް ވަނީ މިދިޔަ ހަފުތާގައި ނިންމައިފަ އެވެ.