މާރާމާރީއަށް ތުހުމަތުކޮށް ޝުމްބާ ހައްޔަރުކޮށްފި

ސިއްރު ކެމެރާ ހަރުކޮށްގެން ކުޑަކުދިންގެ ވީޑިއޯ ރެކޯޑްކުރި ކަމުގެ ތުހުމަތުކުރެވޭ މީހަކު މަގުމަތިން ހިފަހައްޓައި އަނިޔާކުރި ކަމަށް ބުނާ މައްސަލައެއްގައި ސޯޝަލް މީޑިއާ އެކްޓިވިސްޓް އަހުމަދު އަޝްރަފް (ޝުމްބާ ގޮންގް) ހައްޔަރުކޮށްފި އެވެ.

ވަކި މީހެއްގެ ނަން ހާމަނުކޮށް ފުލުހުން ބުނީ ކެނެރީމަގުގައި މާރާމާރީއެއް ހިންގާކަމަށް ރޭ 10:00 ހާއިރު ލިބުނު ރިޕޯޓަކާ ގުޅިގެން ދިވެހި ފިރިހެނަކު ހައްޔަރުކޮށްފައިވާ ކަމަށާއި އެކަމާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ.

މޯލްޑިވްސް ތާޑް ވޭ ޑިމޮކްރެޓްސް (އެމްޓީޑީ)ގެ ކައުންސިލް މެމްބަރު ޝުމްބާ ވަކީލު މުހައްމަދު ހަލީމް ކުރެއްވި ޓްވީޓެއްގައި ވިދާޅުވީ ޝުމްބާ ހައްޔަރުކުރީ ބަޔަކު އެއްވެގެން އުޅޭތީ އެކަން ކަވަރުކުރަން ގޮސް ހުއްޓާ ކަމަށެވެ. ޝުމްބާ މާރާމާރީއެއް ނުހިންގާ ކަމަށް ވަކީލް ވިދާޅުވި އެވެ.

ކުޑަ އަންހެންކުދިންގެ ކޮޓަރީގައި ސިއްރު ކެމެރާ ހަރުކޮށް ވީޑިއޯ ރެކޯޑްކުރާ ކަމަށް ތުހުމަތުކޮށް ސިފައިންގެ މީހެއްގެ ފޮޓޯ ސޯޝަލް މީޑިއާގައި ވަނީ އާންމުކޮށްފަ އެވެ. އެ މީހާ ކެނެރީމަގުން ހިފަހައްޓައި ގައިގައި ދެލި އުނގުޅާފައި ހުއްޓާ ނަގާފައި ހުރި ފޮޓޯތަކެއް ވެސް އާންމުކޮށްފައިވެ އެވެ. މި މީހާއަށް ކުރާ ތުހުމަތާ ގުޅިގެން ފުލުހުން އަދި ވާހަކައެއް ނުދައްކަ އެވެ.