ބޮޑީބޯޑިން ދުނިޔޭގެ ޖޫނިއާ ރޭންކިންގެ ގަދަ 10 ގައި ރާއްޖޭގެ އާމިން

ބޮޑީބޯޑިން ދުނިޔޭގެ ޖޫނިއާ ރޭންކިންގެ ގަދަ 10 ގައި މިފަހަރު ވެސް ރާއްޖޭގެ އާމިން އުމަރު މޫސާ ހިމެނިއްޖެ އެވެ.

އިންޓަނޭޝަނަލް ބޮޑީބޯޑިން ކޮންފެޑެރޭޝަން (އައިބީސީ) ން އާންމު ކުރި ރޭންކިންގެ 10 ވަނައިގައި އާމިން ހިމެނުނީ 2.417 ޕޮއިންޓް ހޯދައިގެންނެވެ.

ޖޫނިއާ ރޭންކިންގެ އެއްވަނަ ހޯދީ ޕެރޫގެ މައިކަލް ޔެންސީ އެވެ. އޭނާ ވަނީ 4.250 ޕޮއިންޓް ހޯދައިފަ އެވެ. ދެވަނަ ހޯދީ ބްރެޒިލް ގިލްރެމޯ މޮންޗެނީގުރޯ އެވެ. އޭނާ އަށް ލިބިފައި ވަނީ 3.655 ޕޮއިންޓެވެ. ޖުމުލަ 3.125 ޕޮއިންޓް ހޯދައިގެން ތިންވަނައިގައި އޮތީ ސްޕެއިންގެ ކެނެރީ އައިލެންޑްސްގެ ޖޯޖް ހެނާންޑޭޒް އެވެ.

މިދިޔަ އަހަރު ޖޫނިއާ ރޭންކިންގެ ތިންވަނައިގައި ހިމެނުނު އާމިން އަށް މިފަހަރު އެ މަގާމުގައި ހިފަހައްޓާ ނުލެވުނީ މިދިޔަ އަހަރު އޭނާ ހޯދި ކާމިޔާބު ދެމެހެއްޓޭ ގޮތް ނުވުމުންނެވެ.

މިދިޔަ އަހަރު ރާއްޖޭގައި ބޭއްވި އައިބީސީ ވޯލްޑް ޓްއާގެ ޖޫނިއާ ބައިން ފައިނަލަށް އާމިން ދަތުރު ކުރި އެވެ. އެކަމަކު މި އަހަރު މުބާރާތުން އޭނާ އަށް ފައިނަލާ ހަމައަށް ނުދެވުނެވެ. އޭނާ އަށް ފުރުސަތު ގެއްލުނީ ސެމީ ފައިނަލުގައި މިދިޔަ އަހަރުގެ ޖޫނިއާ ވޯލްޑް ޗެމްޕިއަން ޖޯޖް ހެނާންޑޭޒް އަތުން ބަލި ވުމުންނެވެ.

އޯގަސްޓް މަހު ރާއްޖޭގައި ބޭއްވި މުބާރާތުގެ ސެމީގެ ހީޓުގައި އާމިން އަށް 7.75 ޕޮއިންޓް ލިބުނުއިރު ހެނާންޑޭޒް ވަނީ 12.25 ޕޮއިންޓް ހޯދައިފަ އެވެ.