އަމީނީ މަގުގެ ބާކީ ބައި ނިންމަވައި ދެއްވާނީ މުއިއްޒު: އަކްރަމް

އަމީނީ މަގުގެ ބާކީ ބައި ނުނިމި ލަސްވަނީ ސްޓޯމް ވޯޓާ ހޮޅިތައް ލިބުން ލަސްވެ އަދި ވެރިކަން ނިމެން ކުޑަދުވަސްކޮޅަކަށް ވެފައިވާތީ ކަމަށާއި އެހެންވެ ދެން އެ މަގުގެ މަސައްކަތް އެއްކޮށް ނިންމައި ދެއްވާނީ އިންތިހާބީ ރައީސް ޑރ. މުހައްމަދު މުއިއްޒު ކަމަށް ޕްލޭނިން މިނިސްޓްރީން މިއަދު ބުނެފި އެވެ.

އެ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން "މިހާރު" އާ ވާހަކަ ދައްކަވަމުން އެހެން ވިދާޅުވިއިރު، އަންނަ މަހުގެ 17 ގައި ރައީސްކަމުގެ ހުވާ ކުރައްވާ މުއިއްޒު ވަނީ އެ މަގު އެއްކޮށް މި ސަރުކާރަށް ނިންމައި ނުލެވޭނެ ކަމަށް ކުރިން ވިދާޅުވެފަ އެވެ.

ނަމަވެސް އަކްރަމް ވިދާޅުވީ، މި ސަރުކާރުން ވަނީ މީގެ ކުރިން ފެންބޮޑުވެ، އެތައް ބަޔަކަށް ބޮޑެތި ތަކުލީފުތަކާ ކުރިމަތިލާން ޖެހުނު އަމީނީ މަގުގައި ތާރު އެޅުމުގެ މަސައްކަތުގެ 95 ޕަސެންޓް ނިންމާފައި ކަމަށެވެ. އެއީ އެއްވެސް ސަރުކާރަކަށް ނުވި ކަމެއް ކަން އޭނާ ފާހަގަކުރެއްވި އެވެ.

"އެ މަގުގެ ބާކީ ބައި ނިންމަން ޖެހޭ ސްޓޯމް ވޯޓާ ހޮޅިތަކެއް ގެންނަން. އެ ކަމަކު އެ ލިބެން ނަގާނެ ތިން މަސް. އެހެންވީމާ އަޅުގަނޑުމެންނަކަށް ދެން އެ މަސައްކަތް ނުނިންމޭނެ. އަމީނީ މަގު ހެދުމުގެ މަސައްކަތް ފަށައިދިނީ އަޅުގަނޑާއި މުއިއްޒު. އެހެންވީމާ ދެން އެ މަސައްކަތް ނިންމަވައި ދެއްވާނީ މުއިއްޒު،" އަކްރަމް ވިދާޅުވި އެވެ.

އޭނާ ކުރިން ވިދާޅުވީ އަލަށް ހަދަމުން އަންނަ މަގުގެ ފަހު ސެގްމެންޓު ފަށަން ފުރަތަމަ ނިންމީ މިދިޔަ މަހުގެ ނުވަ ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރަށް ފަހު ކަމަށެވެ. ނަމަވެސް، އިތުރު ބުރަކަށް ދާން ޖެހުމުން، މިދިޔަ މަހުގެ 30 ވަނަ ދުވަހު ބޭއްވި ފަހު ބުރަށް ފަހު މަގު ހަދަން ފަށާނެ ކަމަށް އަކްރަމް ވިދާޅުވި އެވެ.

އަމީނީ މަގުގައި ދެން ތާރުއަޅަން ޖެހޭނީ ވަރަށް ކުޑަ ސަރަހައްދެއްގަ އެވެ. ނަމަވެސް، އެއީ، އެ މަގުގައި އެންމެ ބާރުބޮޑު ހިސާބެވެ. ވިލިމާލެ ފެރީ ޓާމިނަލާއި އައިޖީއެމްއެޗްގެ ބޭރު މަގާ ގުޅޭ ހިސާބަށް ވުމުން އެ މަގުން ކޮންމެ ދުވަހަކު ވެސް އެތައް ބަޔަކު ދަތުރުކުރެ އެވެ.

ދައުލަތުގެ ބަޖެޓުން 84 މިލިއަން ރުފިޔާ އަށް އާރުޑީސީއާ ހަވާލު ކޮށްގެން ހަދަމުން އަންނަ އަމީނީ މަގުގެ މަސައްކަތް އެއްކޮށް ނިންމާލެވޭނީ މިދިޔަ މަހުގެ ނިޔަލަށް ކަމަށް ޕްލޭނިން މިނިސްޓްރީން ކުރިން ބުނެފައިވެ އެވެ. އެ މަސައްކަތް ފެށީ މިދިޔަ އަހަރުގެ އޮކްޓޯބަރުގަ އެވެ.