ރޮހިންޔާ މުސްލިމުންގެ ހައްގުގައި އައިސީޖޭއަށް ހުށަހެޅި މައްސަލައަށް ރާއްޖޭން ވަންނަން ހުށަހަޅައިފި

މިއަންމާގެ ބައި މަދު ރޮހިންޔާ ދަރިކޮޅުގެ މުސްލިމުންނާ ދެކޮޅަށް އެ ގައުމުގައި ހިންގާ ގަތުލުއާންމު ހުއްޓުވުމަށް، އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އަށް ހުށަހަޅާފައިވާ މައްސަލައަށް ތަދައްހުލުވާން ރާއްޖޭން ހުށަހަޅައިފި އެވެ.

މިއަންމާގައި ރޮހިންޖާ މުސްލިމުންނާ ދެކޮޅަށް ހިންގަމުންދާ އަނިޔާވެރި ލާ އިންސާނީ އަމަލުތަކާ ގުޅިގެން އައީސީޖޭއަށް 2019 ވަނަ އަހަރުގެ ނޮވެމްބަރު ހުށަހެޅީ ގެމްބިއާ ސަރުކާރުންނެވެ.

އެ މައްސަލައިގައ،ި މިއަންމާގެ ރާކީން ސްޓޭޓްގައި ރޮހިންޔާ މުސްލިމުންނާ ދެކޮޅަށް 2016 ވަނަ އަހަރުން ފެށިގެން އެ ގައުމުގެ ސިފައިންނާއި އެހެން ފަރާތްތަކުން ހިންގަމުން އަންނަ އަމަލުތަކަކ،ީ 1948 ވަނަ އަހަރުގެ ޖެނޮސައިޑް ކޮންވެންޝަނާ ހިލާފު އަމަލުތަކެއް ކަމަށް ވަނީ ހުށަހަޅާފަ އެވެ.

ރާއްޖޭން މި މައްސަލައަށް ތަދައްހުލްވާން ނިންމައި، އެ ކަން އިއުލާނުކުރީ 2020 ވަނަ އަހަރުގެ ފެބްރުއަރީ މަހު ބޭއްވި އދ.ގެ ހިއުމަން ރައިޓްސް ކައުންސިލް ބައްދަލުވުމުގަ އެވެ.

ބަންޑާރަ ނައިބުގެ އޮފީހުން ބުނީ، މި މައްސަލައަށް ތަދައްހުލުވާނެކަމަށް އިއުލާނުކޮށްފައިވާ އިތުރު ހަ ގައުމަކާ ރާއްޖޭން ވެސް އެކަމަށް ބޭނުންވާ ލިޔެކިޔުންތައް މިއަދު ހުށަހަޅާފައިވާ ކަމަށެވެ.

އެ އޮފީހުން ބުނީ ރާއްޖޭގެ އިންޓަވެންޝަން މައިގަނޑު ގޮތެއްގައި ބިނާކޮށްފައިވަނީ ޖެނޮސައިޑް ކޮންވެންޝަންގެ ދަށުން "ޑިއުޓީ ޓު ޕަނިޝް ޖެނޮސައިޑް" މާނަކޮށްފައިވާ ގޮތުގެ މައްޗަށް ކަމަށެވެ.

މި މައްސަލާގައި ރާއްޖެ ތަމްސީލުކުރުމަށް އައްޔަންކޮށްފައިވާ ބައިނަލްއަގުވާމީ ވަކީލުންގެ ޓީމުގައި ހިމެނެނ،ީ އިނގިރޭސިވިލާތުގެ ޑައުޓީ ސްޓްރީޓް ޗޭމްބާސްގެ ވަކީލު އަމާލް ކްލޫނީ އާއ،ި އިނގިރޭސިވިލާތުގެ ޓްވެންޓީ އެސެކްސްގެ ވަކީލު ޕްރޮފެސަރު ފިލީޕާ ވެބް ކަމަށް ވެސް އޭޖީ އޮފީހުން ބުންޏެވެ.

މިއަންމާގައި ރޮހިންޔާ މުސްލިމުންނާ ދެކޮޅަށް ހިންގަމުންދާ ޖަރީމާތަކާ ގުޅިގެން ރާއްޖޭން ވަނީ 2017 ވަނަ އަހަރު އެ ގައުމާ އެކު ވިޔަފާރީގެ ހުރިހާ ގުޅުމެއް ކަނޑާލައިފަ އެވެ. އަދި މި މައްސަލައާ ގުޅޭ ގިނަ ރެޒޮލިއުޝަންތަކެއް ކޯ-ސްޕޮންސާކޮށް އދ.ގެ އާންމު މަޖިލީހާއި ހިއުމަން ރައިޓްސް ކައުންސިލަށް ރާއްޖޭން ހުށަހަޅާފައި ވެ އެވެ.

މިއަންމާގެ އަސްކަރިއްޔާގެ އަނިޔާތަކުން ސަލާމަތްވުމަށް 2017 ވަނަ އަހަރު ގައުމުދޫކޮށް ދިޔަ، ގާތްގަނޑަކަށް އެއް މިލިއަން ރޮހިންޔާ މުސްލިމުން މިހާރު ދިރިއުޅެމުންދަނީ ބަންގްލަދޭޝްގެ ތޮއްޖެހިފައިވާ ކޭމްޕްތަކުގައި ވަރަށް ނިކަމެތި ހާލުގަ އެވެ.

ރާކައިން ސްޓޭޓްގައި ތިބި ކަމަށް ލަފާކުރެވޭ 600،000 އެއްހާ ރޮހިންޔާ މުސްލިމުންނަށް މިއަންމާ ސަރުކާރުން ގޯނާތަކާއި އަނިޔާވެރިކަން ދަނީ ކުރިމަތިވަމުންނެވެ. ދަތުރުފަތުރު ކުރުމުގެ މިނިވަންކަން ނެތް ކޭމްޕްތަކުގައި، އެކަށީގެންވާ ކާނާއާއި ސިއްހީ ފަރުވާއާއި ތައުލީމާއި އާމްދަނީ ހޯދުމުގެ ފުރުސަތުތައް ވަނީ ކަނޑާލައިފަ އެވެ.