އާލިއާ އާއި ރަންބީރުގެ ދަރިފުޅު މީޑިއާއަށް ދައްކާލައިފި

އާލިއާ ބަޓް އާއި ރަންބީރް ކަޕޫރުގެ ހަމައެކަނި ދަރިފުޅު ރަހާ މީޑިއާ އަށް ފުރަތަމަ ފަހަރަށް ދައްކާލައިފި އެވެ.

އެ ދެމަފިރިންގެ އެއް އަހަރުގެ ދަރިފުޅު މީޑިއާތަކަށް ރަހާ ދައްކާލީ، ކްރިސްމަސްއާ ދިމާކޮށް އިއްޔެ އެވެ. އާލިއާ ވިހެއީއްސުރެ ރަހާ ގެންގުޅެމުން އައީ މީޑިއާތަކަށް ފޮރުވައިގެން، ސިއްރުންނެވެ. އަދި އެ ދެމަފިރިން އެކުގައިދާ އެއްވެސް އިވެންޓަކަށް ވެސް ރަހާ ނުގެންދެ އެވެ. އެކަމަކު، އިއްޔެ އޮތް ކަޕޫރު އާއިލާގެ ކްރިސްމަސް ލަންޗަށް ފަހު ޕަޕަރާޒީންގެ ކުރިމައްޗަށް ނުކުމެ އާލިއާ އާއި ރަންބީރު ވަނީ ރަހާއާ އެކު ފޮޓޯއަކަށް ޕޯޒްކޮށްފަ އެވެ.

އާލިއާ އާއި ރަންބީރު ދަރިފުޅާ އެކު ޕޯޒްކޮށްފައިވާ ފޮޓޯތައް މީޑިއާތަކުން ޕޯސްޓުކުރުމުން އެ ދެ ތަރިންގެ ފޭނުން ވަނީ ރަންބީރުގެ ބައްޕަ ރިޝީ ކަޕޫރާއި ރަހާ ވައްތަރު ކަމަށް ބުނެފަ އެވެ. ގިނަ ބަޔަކު ބުނެފައި ވަނީ ރަހާގެ ލޯ ރާޖް ކަޕޫރާ ވަރަށް ވައްތަރު ކަމަށެވެ. އަދި އޭނާގެ ނޫ ކުލައިގެ ލޮލުގެ ކަޅިއަށް ގިނަ ބަޔަކު ވަނީ ތައުރީފުކޮށްފަ އެވެ.

މީޑިއާތަކަށް ސިއްރުން ރަހާ ގެންގުޅެނީ ކީއްވެތޯ އެހުމުން އާލިއާ މީގެ ކުރިން ބުނެފައި ވަނީ އޭނާ އާއި ރަންބީރުގެ ފުރަތަމަ ދަރިފުޅަށްވާތީ މީޑިއާތަކަށް ރަހާ ދައްކާލަން ޖެހިލުންވާ ކަމަށެވެ. އަދި މީޑިއާގެ ކުރިމައްޗަށް ރަހާ ގެންނަން ނިންމުން އެކަން ކުރާނެ ކަމަށް އޭނާ ބުނެފައިވެ އެވެ.