ކާމިޔާބީން އެނގުނީ ރައްޔިތުން ދާން ބޭނުންވަނީ ބުރިޖަކުން ގުޅާލާފައިވާ ތަނަކަށް ކަން: އާޒިމް

މިއަދު ބޭއްވި މާލެ މޭޔަރު އިންތިހާބުން އެނގިގެން ދިޔައީ މާލެ ރައްޔިތުން ދާން ބޭނުންވަނީ ބްރިޖަކުން ގުޅާލާފައިވާ ތަނަކަށް ކަމަށް މާލޭގެ މޭޔަރަކަށް މިއަދު އިންތިހާބުވި އެމްޑީޕީގެ ކެންޑިޑޭޓް އާދަމް އާޒިމް ވިދާޅުވެއްޖެ އެވެ.

އިންތިހާބުގެ ވަގުތީ ނަތީޖާ ދައްކާގޮތުން އާޒިމް ވަނީ ބޮޑު އަގުލަބިއްޔަތަކުން ކުރި ހޯއްދަވައިފަ އެވެ.

ވަގުތީ ނަތީޖާއިން މޭޔަރުކަމަށް ހޮވިވަޑައިގެންފައިވާ އާޒިމް "މިހާރު" އަށް ވިދާޅުވީ މި އިންތިހާބުގައި ލިބުނު ކާމިޔާބީ އަކީ މާލޭގެ ހުރިހާ ރައްޔިތުންނަށް ލިބުނު ކާމިޔާބެއް ކަމަށެވެ.

އަދި މި ނަތީޖާއިން އެނގިގެން ދިޔައީ ބުރިޖަކުން ގުޅާލާފައިވާ ތަނަކަށް މާލެ ރައްޔިތުން ދާން ބޭނުންވާ ކަން ކަމަށް ވެސް އޭނާ ވިދާޅުވި އެވެ.

އާޒިމް ވަނީ އޭނާއަށް ތާއީދު ކުރައްވައި މިއަދުގެ ވޯޓު ދިން މާލެ ރައްޔިތުންނަށް ހާއްސަ ޝުކުރެއް އަދާ ކުރައްވައިފަ އެވެ. އަދި އެމްޑީޕީގެ ލީޑަޝިޕާއި ކެމްޕޭނު ޓީމުތަކަށް ވެސް ޝުކުރު އަދާ ކުރެއްވި އެވެ.

މޭޔަރު އިންތިހާބުގެ ކެމްޕެއިން ޖަލްސާތަކުގައި ވެސް އާޒިމް ވަނީ މި ސަރުކާރުގެ ހައުސިން ޕްރޮޖެކްޓް، ފުށިދިއްގަރަކީ މިވަގުތަށް މުހިންމު ޕްރޮޖެންޓެއް ނޫން ކަމަށާއި އެ ތަނަށް ދާން ބޭނުން ނުވާ ރައްޔިތުން ވޯޓު ދިނުމަށް ގޮވާލައި ވާހަކަ ދައްކަވާފަ އެވެ.

އެމްޓީސީސީގެ ކުރީގެ ސީއީއޯ، އާދަމް އާޒިމްގެ މޭޔަރުކަމުގައި ކުރައްވާނެ ކަންކަމުގެ މެނިފެސްޓޯ އިފްތިތާހު ކުރުމަށް ބޭއްވި ޖަލްސާގައި މާލެއިން 17 މިނެޓުން ދެވޭ، ފުށިދިއްގަރު މަޝްރޫގެ ވާހަކަ ދައްކަވަމުން އޭރު އާޒިމް ވިދާޅުވެފައި ވަނީ ކަނޑެއް ހުރަސްކޮށް ގެދޮރަށް ދިއުމުގެ ބަދަލުގައި މާލޭގައި ދިރިއުޅޭ މީހުންނަށް ގެދޮރަށް ދެވެން ޖެހޭނީ ބުރިޖެއް ހުރަސް ކޮށްފައި ކަމަށެވެ.

އެމްޑީޕީގެ ސިޔާސަތަކީ ސަރުކާރުން ހިއްކަން ފަށާފައިވާ ބިންތަކުގައި އަސާސީ ހިދުމަތްތައް ގާއިމްކޮށް އެތަންތަނުގައި މީހުން އާބާދު ކުރުންކަމަށް ވެސް އޭނާ ވިދާޅުވި އެވެ.

"ފުށިދިއްގަރު ފަޅު ހިއްކުމަކީ ބޭނުމެއް ކަމެއް ނޫން. ބްރިޖެއް ހުރަސްކޮށް މާލެ މީހުންނަށް ދެވެން ޖެހޭނެ، ކަނޑެއް ހުރަސްކޮށްގެން ދާކަށް ނުޖެހޭނެ. ރަސްމާލެ ހިއްކަންދާ ލާރިއަކީ އިސްރާފެއް. މިހާރު ހިއްކާފައިވާ ތަންތަން ތަރައްގީ ކުރުން މާ މުހިންމު،" އޭނާ ވިދާޅުވެފައިވެ އެވެ.

އާޒިމް ވަނީ އޭނާ މޭޔަރުކަމަށް ހޮވިއްޖެނަމަ އެމްޑީޕީ ސަރުކާރުގައި ބިން ލިބުނު ތަންތަން ހޯއްދަވައިދެއްވާނެ ކަމުގެ ޔަގީންކަންް ދެއްވައިފަ އެވެ. އަދި އޭނާ ވަނީ ފްލެޓުގެ ހައްގުވެރިންނަށް އެ ތަންތަން ދިނުމަށް ވެސް މި ސަރުކާރަށް ގޮވާލައްވައިފަ އެވެ.