ވަގަށް އަނބު ބިންނަ މީހާ މިފަހަރު ހައްޔަރުކުރީ އިންޑިއާ ހައިކޮމިޝަން ހިންގި އިމާރާތުގެ ފުރާޅުމަތިން

މާލޭގެ އެކި ތަންތަނުގައި ހުންނަ އަނބު ގަސްތަކުން ވަގަށް އަނބު ބިނދެގެން މީގެ ކުރިން ވެސް އެކި ފަހަރު މަތިން ހައްޔަރުކޮށްފައިވާ އަޒްނީފް މުހައްމަދު އަނެއްކާވެސް އޭގެ މައްސަލައެއްގައި ހައްޔަރުކޮށްފި އެވެ.

މިދިޔަ ޑިސެމްބަރު މަހު ވެސް 200 އަނބު ވަގަށް ބިނދެެ ދަބަހަކަށް އަޅައިގެން ފިލަން އުޅެނިކޮށް އޭނާ ހައްޔަރުކުރި އެވެ.

އުމުރުން 34 އަހަރު އަޒްނީފް އާދީއްތަ ދުވަހުގެ ރޭ ހައްޔަރުކުރީ އިންޑިއާ ހައި ކޮމިޝަން ކުރިން ހިންގި އިމާރާތް ކަމަށްވާ ހ. އަތިރީގޭ ފުރާޅުމަތިންނެވެ. އަނބުގަސްތައް ހެދިފައި އޮންނަ އެ ތަނުން އަޒްނީފް ހައްޔަރުކޮށް ބަންދުގެ މުއްދަތު އިތުރުކޮށް ނެރުނު އަމުރުގައިވާ ގޮތުން އޭނާ ފުރާޅުމަތީގައި ހުއްޓާ ފެނިފައިވެ އެވެ.

އެހެންވެ، އޭނާގެ މައްޗަށް ކުރާ، ހުއްދަ ނޫން ތަނަކަށް ވަނުމުގެ ތުހުމަތު އުފެދޭ ވަރަށް ހެކި ހުރި ކަމަށް ނިންމައި 15 ދުވަހު ބަންދުގައި ބަހައްޓަން ވަނީ އަމުރުކޮށްފަ އެވެ.

ކޯޓު އަމުރުގައި ވެސް ބުނީ އަޒްނީފަކީ ހައްޔަރު އަދި ބަންދުގެ ގިނަ ރެކޯޑްތަކެއް އޮތް މީހެއް ކަމަށާއި ތަންތަނުން ވަގަށް އަނބު ބިނުމުގެ ތުހުމަތުގައި މީގެ ކުރިން ވެސް އެތައް ފަހަރަކު ހައްޔަރުކޮށްފައިވާ ކަމަށެވެ.

މިދިޔަ ޑިސެމްބަރު މަހުގެ ނިޔަލަށް ބަލާއިރު އަޒްނީފް ވަނީ 38 ފަހަރު ހައްޔަރުކޮށް 19 ފަހަރު ބަންދުކޮށްފަ އެވެ.