ބައިޑެންގެ ފަރާތުން ރަނގަޅު ކަމަކަށް އުންމީދެއް ނުކުރަން: ހަމާސް

ފަލަސްތީނުގެ މިނިވަން ދައުލަތެއް އުފައްދަން އިޒްރޭލުން އަދިވެސް އެއްބަސްވެދާނެ ކަމަށް އެމެރިކާގެ ރައީސް ޖޯ ބައިޑެން ވިދާޅުވުމުން ހަމާސް އިން އެ ވާހަކައަށް ރައްދު ދީފި އެވެ.

އިޒްރޭލުން ފަލަސްތީނުގެ ޣައްޒާއަށް ކެނޑިނޭޅި ހަމަލާ ދެމުން ދާއިރު މިދިޔަ މަހެއްހާ ދުވަސް ތެރޭ އިޒްރޭލާއި އެމެރިކާގެ ވެރިން ފުރަތަމަ ފަހަރަށް ފޯނުން ކުރެއްވި މަޝްވަރާތަކަށް ފަހު ބައިޑެން ހުކުރު ދުވަހު ވިދާޅުވީ ފަލަސްތީނުގެ މިނިވަން ދައުލަތެއް "ކޮންމެވެސް ސިފައެއްގައި" އުފެއްދުމަށް އިޒްރޭލު އެއްބަސްވެދާނެ ކަމަށެވެ.

"ފަލަސްތީނުގެ މިނިވަން ދައުލަތެއްގެ ވާހަކައިން އަވާމެންދުރު ދައްކަން އުޅުނަސް ފަލަސްތީނު ރައްޔިތުން މޮޔައެއް ނުހެއްދޭނެ،" ހަމާސްގެ ސިޔާސީ ގޮފިން ނެރުނު ބަޔާނެއްގައި އެ ޖަމާއަތުގެ އިސް އޮފިޝަލެއް ކަމަށްވާ އިއްޒަތު އަލްރިޝްގް ވިދާޅުވި އެވެ.

"ބައިޑެން އަކީ އިޒްރޭލުން ފަލަސްތީނުގެ ނަސްލު ނައްތާލަން ހިންގާ ޖަރީމާގެ ބައިވެރިއެއް. އަހަރެމެން ބައިޑެންގެ ފަރާތުން ރަނގަޅު އެއްވެސް ކަމަކަށް އުންމީދެއް ނުކުރަން."

ފަލަސްތީނުގެ ދައުލަތެއް އުފައްދަން އެއްބަސް ނުވާނެ ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެފައި ވިޔަސް ބައިޑެން ފޯން ކޯލަށް ފަހު ވިދާޅުވީ އިޒްރޭލާއި ފަަލަސްތީނަށް ވެސް ދައުލަތެއް އުފެއްދުމަށް ގެންގުޅޭ ޒަމާންވީ ވިސްނުމަށް އިޒްރޭލުން އަދިވެސް އެއްބަސްވެދާނެ ކަމަށެވެ.

"ދެ ދައުލަތް އުފެއްދިދާނެ ކިތަންމެ ގޮތެއް އެބަ އޮތް. އަމިއްލަ އަސްކަރިއްޔާއެއް ނެތް އދ.ގެ މެންބަރު ގައުމުތައް ވެސް އެބަ ތިބި،" ބައިޑެން ވިދާޅުވި އެވެ.

ހަމާސް އިން މިދިޔަ އަހަރުގެ އޮކްޓޫބަރު 7 ވަނަ ދުވަހު އިޒްރޭލަށް ދިން ހަމަލާތަކުގައި 1،140 މީހަކު މަރާލުމާ އެކު ހަމާސް ނައްތާލުމުގެ ނަމުގައި ދޭން ފެށި ހަމަލާތަކުގައި ފަލަސްތީނުން މިހާތަނަށް ވަނީ ގާތްގަނޑަކަށް 25،000 މީހުން ޝަހީދުކޮށްލައިފަ އެވެ. އެކަމަކު އަދިވެސް އިޒްރޭލުން ބުނަމުން ދަނީ ހަމަލާތައް ނުހުއްޓާނެ ކަމަށެވެ. --އޭއެފްޕީ