ސަރުކާރުން މިދިޔަ އަހަރު މާޒިޔާ އަށް 5.2 މިލިއަން ރުފިޔާ ދިން

ސަރުކާރުން މިދިޔަ އަހަރު އެކަނި މާޒިޔާ އަށް 5.2 މިލިއަން ރުފިޔާދީފައިވާކަން ހާމަކޮށްފި އެވެ.

މައުލޫމާތު ހޯދާ ލިބިގަތުމުގެ ދަށުން އަމިއްލަ ފަރާތަކުން، މައުލޫމާތު ހޯދަން އެދުމުން ސްޕޯޓްސް މިނިސްޓްރީން އާންމު ކުރި މައުލޫމާތުގައިވާ ގޮތުން މިދިޔަ އަހަރު މާޒިޔާ އަށް ސަރުކާރުން 5,226,132.12 ރ. ވަނީ ދީފަ އެވެ.

އޭގެ ތެރޭގައި، އެ ޓީމަށް ގެނައި ބިދޭސީ ކުޅުންތެރިންގެ ހަރަދުތަކަށް ވެސް ސަރުކާރުން ދެ ފަހަރެއްގެ މަތިން، ކޮންމެ ފަހަރަކު އެއް މިލިއަން ރުފިޔާ ދީފައިވާކަން، ސްޕޯޓްސް މިނިސްޓްރީން ހާމަ ކުރި މައުލޫމާތުގައި ވެއެވެ.

މާޒިޔާ އަށް 2023 ގައި ސަރުކާރުން ފައިސާ ދިން ގޮތުގެ ތަފްސީލް

> އޭއެފްސީ ކަޕްގެ ގުރޫޕް ސްޓޭޖްގައި ބައިވެރިވުމަށް އިންޑިއާ އަށް ކުރި ދަތުރު - 368,299.60ރ

> 2023 ވަނަ އަހަރުގެ ސީޒަނަށް ގެންނަ ބިދޭސީ ކުޅުންތެރިންގެ ފައިސާ - އެއް މިލިއަން ރުފިޔާ

> 2023 ގެ ފުޓްބޯޅަ ސީޒަނަށް ކްލަބްތަކަށް ދޭ ފައިސާ - 247،500ރ.

> 2023 ވަނަ އަހަރުގެ ސީޒަނަށް ގެންނަ ބިދޭސީ ކުޅުންތެރިންގެ ފައިސާ - އެއް މިލިއަން ރުފިޔާ

> ޕްރެޒިޑެންޓް ކަޕް 2023 ގެ ޗެމްޕިއަންކަން ހޯދުމުން އިނާމު ފައިސާ - 500،000ރ.

> އޭއެފްސީ ކަޕް 2023 ގުރޫޕް ސްޓޭޖު މެޗުތަކަށް ދަތުރުކުރުމުގެ ހަރަދުގެ 50 ޕަސަންޓް ފައިސާ - 175,695.48

> އޭއެފްސީ ކަޕް 2023 ގުރޫޕް ސްޓޭޖު މެޗުތަކަށް ދަތުރުކުރުމުގެ ހަރަދުގެ 50 ޕަސަންޓް ފައިސާ - 175,695.48

> ފުރަތަމަ ޑިވިޝަނުގެ ކްލަބްތަކަށް ފޯރުކޮށްދން މާލީ އެހީ - އެއް މިލިއަން ރުފިޔާ

> އޭއެފްސީ ކަޕް މެޗު ކުޅުމަށް ބަންގްލަދޭޝް އަށް ކުރި ދަތުރު - 350,558.28ރ.

> އޭއެފްސީ ކަޕް މެޗު ކުޅުމަށް އިންޑިއާ އަށް ކުރި ދަތުރު - 408,383.28ރ.

ސަރުކާރުން ފައިސާ ދިނުމުގައި، އޭރުގެ ސްޕޯޓްސް މިނިސްޓަރު އަހްމަދު މަހްލޫފް މާޒިޔާ އާއި އެހެން ކްލަބްތަކާ ތަފާތު ކުރުން ގެންގުޅޭ ކަމަށް ބުނެ އޭނާ އަށް ވަރަށް ބޮޑަށް ފާޑު ކިޔުން އަމާޒު ވެއެވެ.

ޕްރެޒިޑެންޓް ކަޕްގެ ޗެމްޕިއަންކަން 2022 ގައި ވެލެންސިއާއިން ހޯދި ނަމަވެސް، ސްޕޯޓްސް މިނިސްޓޤރީން އޭރު ނިންމީ، ޕްރެޒިޑެންޓް ކަޕްގެ ޗެމްޕިއަން ޓީމަށް އިނާމު ފައިސާ ނުދިނުމަށެވެ. އެކަމަކު މިދިޔަ އަހަރު މާޒިޔާއިން ޗެމްޕިއަންކަން ހޯދުމުން އެ ކްލަބަށް 500،000ރ. ދީފައި ވެއެވެ. ޕްރެޒިޑެންޓްސް ކަޕްގެ ޗެމްޕިއަން ޓީމަށް އޭގެ ކުރިން ސަރުކާރުން އަބަދުވެސް އިނާމު ފައިސާ ދީފައި ވެއެވެ.