ޔޫރަޕްގައި ތިބެގެން ލަންކާއަށް ޑްރަގް ފޮނުވާ ފަސް މީހަކު ދެނެގެންފި

ޔޫރަޕްގައި ތިބެގެން ސްރީ ލަންކާއަށް މަސްތުވާތަކެތި ފޮނުވާ މައިގަނޑު ފަސް މީހަކު ދެނެގަނެވިފައިވާ ކަމާއި މިއީ ބޮޑެތި އަދަދުތަކުން ލަންކާއަށް އެތެރެކުރާ ޑްރަގް ޝިޕްމަންޓުތަކުގެ ފަހަތުގައި ވެސް ތިބި މީހުން ކަމަށް ބެލެވޭ ކަމަށް ލަންކާ ފުލުހުންގެ އެކްޓިން އިންސްޕެކްޓަ ޖެނެރަލް ދެޝަބަންދޫ ޓޭނަކޫން ވިދާޅުވެއްޖެ އެވެ.

ލަންކާގެ ސަންޑޭ ޓައިމްސް އަށް ދެއްވި އިންޓަވިއުއެއްގައި އޭނާ ވިދާޅުވީ މި ފަސް މީހުންނަކީ ލަންކާއަށް އުފަން މީހުން ކަމަށެވެ. މި މީހުން އުޅޭ ގައުމުތަކުގެ ތެރޭގައި ފްރާންސާއި އިޓަލީ ވެސް ހިމެނޭ ކަމަށް ވިދާޅުވި އެވެ.

ދެޝަބަންދޫ ވިދާޅުވީ ލަންކާގައި ޑްރަގް ވިޔަފާރިކުރާ އިސް މީހުން ގިނައިން ތިބީ ހުޅަނގު އޭޝިއާގެ ގައުމުތަކުގައި ކަމަށް ކުރިން ވެސް ބެލެވިފައިވާ ކަމަށެވެ. އޭނާ ވިދާޅުވީ ޔޫރަޕްގައި ތިބެގެން ޑްރަގް ވިޔަފާރިކުރާ މީހުން ހުޅަނގު އޭޝިއާގެ ގައުމުތަކުގައި ތިބި މީހުން މެދުވެރިކޮށް ލަންކާއަށް ޑްރަގް ފޮނުވާ ކަމަށް ގަބޫލުކުރެވޭ ސަބަބުން އެބަހުރި ކަމަށެވެ.

އެކްޓިން އިންސްޕެކްޓަ ޖެނެރަލް ވިދާޅުވީ ހުޅަނގު އޭޝިއާގެ ގައުމުތައް މެދުވެރިކޮށް ލަންކާއަށް މަސްތުވާތަކެތި އެތެރެކުރަން އެކި ގޮތްތައް ބޭނުންކުރަމުންދާ ކަމަށެވެ. މީގެ ތެރެއިން ވެސް އެންމެ އާންމު ގޮތަކީ އެހެން ގައުމުތަކުގެ އުޅަނދުތަކުގައި ލަންކާއާ ކައިރިއަށް ގެނެސް، މަސްބޯޓުތަކާއި ޑިންގީ ފަދަ ކުދި އުޅަނދުތަކުގައި ލަންކާއަށް އެ ތަކެތި ގެންދިއުން ކަމަށް އޭނާ ވިދާޅުވި އެވެ.

ދެޝަބަންދޫ ވިދާޅުވީ ޑްރަގް ވިޔަފާރިކުރުމަށް ޔޫރަޕްގައި ގާއިމުވެ ތިބި މީހުންނަކީ ކޮބައިކަން މިހާރު އެނގޭ ކަމަށާއި ލަންކާގައި މިހާރު ކުރިއަށް ގެންދާ ބޮޑު ޑްރަގް އޮޕަރޭޝަންގެ ތެރެއިން މި މީހުން ވެސް ހައްޔަރުކުރެވޭނެ ގޮތް ހޯދައި އެކަން ކުރާނެ ކަމަށެވެ.

ލަންކާގެ ހާއްސަ ޑްރަގް އޮޕަރޭޝަނަށް 50 ދުވަސް ވެފައި ވާއިރު 50،000 އަށް ވުރެ ގިނަ މީހުން ވަނީ ހައްޔަރުކޮށްފަ އެވެ. މި އޮޕަރޭޝަންގައި ގާނޫނާ ހިލާފް އެތައް ކަމެއް ހިންގާ ކަމަށް ތުހުމަތުކުރިޔަސް ލަންކާ ފުުލުހުން ބުނީ މި އަހަރުގެ ޖޫންގެ ނިޔަލަށް ލަންކާގެ މަގުތައް ޑްރަގު ނައްތާލުމުގެ އަމާޒުގައި ކުރާ މި މަސައްކަތް އަދިވެސް ދާނީ ކުރިއަށް ކަމަށެވެ.