ލަންކާގެ މަގުމަތީ ބަޑީގެ ހަމަލާތައް އިތުރުވަނީ

މަސްތުވާތަކެއްޗާ ދެކޮޅަށް ސްރީ ލަންކާގައި ފެށި "ޔުކްތިޔާ" އޮޕަރޭޝަނާ އެކު ބައެއް ކުށްތައް މަދުވިޔަސް ބަޑީގެ ހަމަލާތައް އިތުރުވެފައިވާ ކަމަށް ލަންކާގެ ފުލުހުން ބުނެފި އެވެ.

ފުލުހުންގެ ރިޕޯޓްތަކުން އެނގޭ ގޮތުގައި ލަންކާގައި މި ފަހުން ވަނީ ބަޑީގެ ހަމަލާތައް އިތުރުވެ އާންމުންގެ ތެރޭގައި ކަންބޮޑުވުން އިތުރުވެފަ އެވެ. ފުލުހުންގެ ތަރުޖަމާނު ޑީއައިޖީ ނިހާލް ތަލްދުވާއާ ހަވާލާދީ ލަންކާގެ ނޫސްތަކުން ބުނެފައިވާ ގޮތުގައި ޖެނުއަރީން ފެބްރުއަރީ 10 އާ ހަމައަށް ބަޑީގެ ހަމަލާތަކުގައި 12 މީހަކު މަރުވެފައިވެ އެވެ.

މި ހަމަލާތަކުގެ އިތުރުން އެތައް ބަޔަކު ޒަހަމްވި އެތައް ހަމަލާތަކެއް ދީފައިވާ ކަމަށާއި އެއްވެސް މީހަކު ޒަހަމްނުވާ ދެ ހަމަލާއެއް ވެސް ދީފައިވާ ކަމަށް ފުލުހުން ބުންޏެވެ.

ފުލުހުންގެ ތަފާސް ހިސާބުން ދައްކާ ގޮތުގައި، މަސްތުވާތަކެއްޗާ ދެކޮޅަށް ޑިސެމްބަރު މަހު ފަހުކޮޅު ފެށި އޮޕަރޭޝަންގެ ފުރަތަމަ މަސް ދުވަހު ކުށުގެ ނިސްބަތް 11 ޕަސެންޓް ދަށަށް ދިޔަ އެވެ. އެކަމަކު ބަޑީގެ ހަމަލާތައް އިތުރުވެ އެ ހަމަލާތައް ބަދަލުކުރި ކުށްވެރިންގެ މީހުންގެ އިތުރުން ކުށެއް ނެތް އެތައް ބަޔަކު ވެސް ޒަހަމްވެފައިވާ ކަމަށް ފުލުހުން ބުންޏެވެ. ބޮޑެތި ސިޓީތައް ކަމަށްވާ ކޮލަމްބޯ އާއި ގޯލްގައި ވެސް ހަމަލާތައް ދީފައިވެ އެވެ.

ބަޑީގެ ހަމަލާތަކުގެ ތެރެއިން އެންމެ ބޮޑު ހަމަލާއެއްގެ ގޮތުގައި ބެލެވިފައިވަނީ ޖެނުއަރީ 22 ވަނަ ދުވަހު ފަސް މީހަކު މަރާލި ހާދިސާ އެވެ. އެ ހަމަލާގައި ސިޔާސީ ޕާޓީއެއްގެ ލީޑަރެއް ކަމަށްވާ ސަމަން ޕެރޭރާ ވެސް މަރާލި އެވެ. މިއީ އޭނާ އާއި ކުށްވެރިންގެ ގޭންގަކާ ޖެހުނު މައްސަލައަކާ ގުޅިގެން ދިން އިންޒާރަކަށް ފަހު ދިން ހަމަލާއެއް ކަމަށް މީޑިއާގައި ރިޕޯޓްކޮށްފައިވެ އެވެ.

މިދިޔަ ހޮނިހިރު ދުވަހު ވެސް ގަލްކަންދާ، ނިގަންބޯ އަދި ސެމްބުކިލިޔާގައި ވެސް ބަޑީގެ ހަމަލާ ދީފައިވެ އެވެ. މި ހަމަލާތަކުގައި ދެ މީހަކު މަރުވި އެވެ. މީގެ ތެރެއިން ނިގަންބޯގައި ދިން ހަމަލާގައި މަރާލީ 60 އަހަރުގެ މީހެކެވެ.

މިދިޔަ އަހަރުގެ ޑިސެމްބަރު މަހުގެ 17 ވަނަ ދުވަހު ލަންކާގައި ޑްރަގާ ދެކޮޅަށް ފެށި އޮޕަރޭޝަންގައި މިހާތަނަށް 60،000 މީހަކު ވަނީ ހައްޔަރުކޮށްފަ އެވެ. ފުލުހުން ބުނީ މީގެ ތެރޭގައި ގިނައީ މަސްތުވާތަކެތީގެ މައްސަލަތަކުގައި ހިމެނޭ މީހުން ކަމަށް ވިޔަސް އެހެން ބައެއް ކުށްތަކަށް ތުހުމަތުވާ މީހުން ވެސް ހިމެނޭ ކަމަށެވެ.