މެޗުގައި 1000 ޕާސް ދޭން ގާޑިއޯލާ ކަނޑައެޅި ޓާގެޓް ސިޓީއަށް ހާސިލެއް ނުވި

ކޯޕަންހޭގަން (ފެބްރުއަރީ 14) - ޔޫއެފާ ޗެމްޕިއަންސް ލީގުގައި ދެވަނަ ބުރު މެޗުގައި ރޭ ކޯޕަންހޭގަންއާ ދެކޮޅަށް 1000 ޕާސް ދޭން، މެންޗެސްޓާ ސިޓީގެ ކޯޗު ޕެޕް ގާޑިއޯލާ ދިން ޓާގެޓް ސިޓީ އަށް ހާސިލު ނުކުރެވުނަސް މެޗުން މޮޅުވެއްޖެ އެވެ.

ޑެންމާކުގެ ވެރިރަށަށް ނިސްބަތްވާ ކްލަބާ ދެކޮޅަށް އެ ސިޓީގައި ކުޅުނު މެޗު ރޭ ސިޓީން ކާމިޔާބު ކުރީ 3-1 ންނެވެ.

މެޗުން މޮޅުވިޔަސް ގާޑިއޯލާ ދިން ޓާގެޓް ހާސިލެއް ނުވި އެވެ. މެޗުގެ ކުރިން ގާޑިއޯލާ ބުނީ ކޯޕަންހޭގަން ކުޅޭނީ ޑިފެންސިވް ގޭމެއް ކަމަށެވެ. އެގޭމް ރޫޅާލަން ސިޓީން ގިނަ ޕާސްތަކެއް ޖަހަން ޖެހޭނެ ކަމަށެވެ.

"1000 ޕާސް ދޭން ޖެހޭނެ،" ގާޑިއޯލާ ބުންޏެވެ.

އެކަމަކު ސިޓީން އުފެއްދީ 835 ޕާހެވެ. އޭގެ ތެރެއިން މިސް ނުވެ ފުރިހަމަ ކުރެވުނީ 786 ޕާހެވެ.

މެޗުން މޮޅުވުމުން، އެކަހަލަ އެއްވެސް ވާހަކައެއް ގާޑިއޯލާ ނުދައްކަ އެވެ. އޭނާ ބުނީ މެޗުގެ ފުރަތަމަ މިނެޓުން ފެށިގެން ސިޓީން ކުޅުނީ ވަރަށް ރަނގަޅަށް ކަމަށެވެ.

"މިއަދަކީ ވަރަށް ފުރިހަމަ ދުވަހެއް. ރަނގަޅު ވަގުތުތަކުގައި ކުޅުންތެރިން ތިބީ ކެތްމަދުވެފަ. ހަގީގަތުގައި ވެސް ރަނގަޅު. ޓީމާ މެދު ވަރަށް ފަހުރުވެރިވޭ. ތިން ވަނަ ގޯލުން އަހަންނަށް ވަރަށް ބޮޑު އެހީތެރިކަމެއް ލިބުނު. އުއްމީދަކީ އަމިއްލަ ދަނޑުގައި އެކަން ނިންމައިގެން ކުރިއަށް އޮތް މެޗަށް ދެވޭނެ ކަމަށް،" މެޗަށް ފަހު ގާޑިއޯލާ ބުންޏެވެ.

"މިތަނުގައި ބަލި ނުވެ ދިއުން ވަރަށް މުހިންމު ކަމެއް. މެޗުގެ ފުރަތަމަ މިނެޓުން ފެށިގެން ވަރަށް ރަނގަޅަށް ކުޅެފަ ވަނީ. ގޯލެއް ވަން ނަމަވެސް އެއީ ބައެއް ފަހަރު ދިމާވެދާނެ ގޮތެއް. ދެ ވަނަ ހާފުގައި ފަހަތުގައި ފަސް ކުޅުންތެރިން ތިބެގެން ކުޅުނު ނަމަވެސް މެޗުގެ ބޮޑު ބައެއްގައި އަހަރެމެން ރަނގަޅު ކުޅުމެއް ދެއްކިން.... އަހަންނަށް ވަރަށް ފުރިހަމަ ޓެމްޕޯއެއްގައި ކުޅެވުނީ. މި ހުރީ ވަރަށް އުފަލުން."

މިސްޓަ ޗެމްޕިއަންސް ލީގުގެނަމުގައި ސިޓީގެ ސަޕޯޓަރުން މަޝްހޫރު ކުރަމުން އަންނަ އާލިންގް ހާލަންޑަކަށް ރޭ ލަނޑެއް ނުޖެހުނެވެ. މެޗުގެ ކުރިން ގާޑިއޯލާ ބުނީ ހާލަންޑްގެ ބޮޑީ ލެންގްއޭޖް ރަނގަޅު ކުރަން ޖެހޭ ކަމަށެވެ. ސިޓީގެ ލަނޑުތައް ޖެހީ ކެވިން ޑި ބްރޭނާ، ބެނާޑޯ ސިލްވާ އަދި ފިލް ފޯޑެން އެވެ.

ސިޓީ އާއި ކޯޕަންހޭގަން ބައްދަލުކުރާ ދެވަނަ ލެގް މެޗު އޮންނާނީ އަންނަ މަހު ހަތްވަނަ ދުވަހު އެވެ.