ފަރުކޮޅަށް ދަތުރު ދިޔަ ބަޔަކަށް ފެނުނު 10 ފޫޓުގެ ކިނބުލެއް ހިފައިފި

ށ. އަތޮޅު ފަޅުރަށެއް ކަމަށްވާ ފަރުކޮޅުން 10 ފޫޓުގެ ކިނބުލެއް ހިފައިފި އެވެެ.

އެ ރަށާ އިންވެގެން އޮތް ށ. ފުނަދޫ ކައުންސިލްގެ ރައީސް އަހުމަދު އިބްރާހިމްފުޅު "މިހާރު" އަށް ވިދާޅުވީ އެ ކިނބޫ ފެނުނީ އެ ރަށަށް ދަތުރު ގޮސް އުޅުނު ބަޔަކަށް ކަމަށެވެ.

އެ މީހުން ފުނަދޫ ޕޮލިހަށް ރިޕޯޓު ކުރުމުން، ޕޮލިހުންނާއި ދަތުރުދިޔަ މީހުން ގޮސް އެ ކިނބޫ ހިފީ ކަމަށް އޭނާ ވިދާޅުވި އެވެ.

"އޭގައި ގާތްގަނޑަކަށް 10 ފޫޓު ހުންނާނެ. މިހާރު އޮތީ މި ރަށު [ފުނަދޫ] ޕޮލިހުގައި. އެމްއެންޑީއެފް މީހުންނާ ހަވާލުކުރާނީ، އެ މީހުން ވެސް އައިސް ތިބީ މިހާރު،" އޭނާ ވިދާޅުވި އެވެ.

އެ ކިނބޫ ހިފަން އުޅޭ ވީޑިއޯތަކެއް ސޯޝަލް މީޑިއާގައި ވެސް ދަނީ ދައުރުވަމުންނެވެ.

އެއް ވީޑިއޯގައި ފެންނަނީ އެ ރަށުގެ ގޮނޑުދޮށުގެ ހޭޅިފަށުގައި ހެދިފައިހުރި ގަސްތަކެއްގެ ކައިރީގައި ބަޔަކު ބަލަން ތިބޭ މަންޒަރެވެ. ކުއްލިއަކަށް ހަޅޭއްލަވައިގަނެފައި ދުއްވައިގަންނަ މަންޒަރު ފެންނަ އެ ވީޑިއޯގައި ކިނބޫ އެ ގަސްތަކުގެ ތެރެއިން ނިކުމެގެން ދުވެފައި ގޮސް ވިލު ތެރެއަށް ފީނައިގަންނަނީ އެވެ.

އެހެން ވީޑިއޯއެއްގައި ފެންނަނީ ޑިންގީގައި ތިބި ބަޔަކު އެ ކިނބުލުގެ އަނގަ އައްސަން އުޅޭ މަންޒަރެވެ.

ކިނބުލަކީ ރާއްޖޭގައި އާއްމުކޮށް އުޅޭ އެއްޗެއް ނޫނަސް، ދޭތެރެދޭތެރެއިން ރާއްޖޭގެ ރަށްރަށުން ފެނެ އެވެ. މިދިޔަ މަހު، ކަނޑިންމަ ރިސޯޓު ކައިރިން ވެސް ވަނީ 9 ފޫޓުގެ ކިނބުލެއް ހިފައިފަ އެވެ.