އިސްލާމް ދީން ނޫން ދީނެއް އޮތުމުގެ ފިކުރު އުފެދުނަކަ ނުދޭނަން: ރައީސް

އިސްލާމް ދީން ނޫން އެހެން ދީނެއް އޮތުމުގެ ވިސްނުން އުފެދުނަ ނުދެއްވާނެ ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.

ޕީޕީއެމުން ލޯކަލް ކައުންސިލް އިންތިހާބުގެ ކެމްޕެއިން ފެށުމަށް، "ހޭވައްލާ" ނަމުގައި ކާނިވާ ސަރަހައްދުގައި ބޭއްވި ޖަލްސާގައި ރައީސް ޔާމީން ވިދާޅުވީ ސަރުކާރުން ބޭނުންވަނީ ގައުމިއްޔަތާއި އިސްލާމް ދީނަށް ލޯބިކުރާ ކުދިންތަކެއް ބިނާ ކުރަން ކަމަށެވެ. އޭގެ ބޭނުމަކީ އިސްލާމް ދީން ނޫން އެހެން ދީނަކަށް ޖާގަ އޮތުމުގެ ވިސްނުން އަޅުގަނޑުމެން ފިކުރުގެ "10 މޭލު" ކައިރިއަށް އަޔަ ނުދިނުން ކަމަށެވެ.

"ކީއްކުރަންތޯ އިސްލާމީ ދައުލަތެއްގައި، އިސްލާމް ދީން ނޫން އެހެން ދީނަކަށް ޖާގަ އޮތްތޯ ބަލަންވީ؟" ޕީޕީއެމް ޓިކެޓުގައި އިންތިހާބުގައި ކުރިމަތިލާ ކެންޑިޑޭޓުން ބައިވެރިވި ޖަލްސާގައި ރައީސް ވިދާޅުވި އެވެ.

ރައީސް ޔާމީން ވަނީ އިސްލާމީ ވަހުދަތު ވަރުގަދަ ކުރަން ސަރުކާރުން ކުރާ ބައެއް މަސައްކަތްތައް ފާހަގަކުރައްވައިފަ އެވެ. އެ ގޮތުން އިސްލާމިކް ޔުނިވާސިޓީއެއް ގާއިމުކޮށް ގިނަ ސްކޫލްތަކެއްގައި އަރަބި ބަސް ކިޔަވައިދޭން ފެށުމާއި އެޑިއުކޭޝަން މިނިސްޓްރީ އާއި ޔުނިވާސިޓީ ގުޅިގެން އަރަބި ބަސް ކިޔަވައިދޭ 5000 މުވައްޒަފުން ތަމްރީން ކުރުމުގެ ޕްރޮގްރާމެއް ފެށިގެން ކުރިއަށްދާކަން ރައީސް ފާހަގަކުރެއްވި އެވެ.

"މިއީ ގައުމިއްޔަތަށް ލޯބިކުރުމާއި އިސްލާމް ދީނަށް ލޯބިކުރާ ޖީލެއް ބިނާކުރަން އަޅުގަނޑުމެން ސަރުކާރުން ކުރާ މަސައްކަތް، މީގެ ނަތީޖާއަކަށް ވާނީ ފެންވަރުގެ ދިރިއުޅުމެއް އުޅޭނެ ޒުވާން ޖީލެއް އައުން،" ގިނަ އަދަދެއްގެ އާންމުން ބައިވެރިވި ޖަލްސާގައި ރައީސް ވިދާޅުވި އެވެ.

ރައީސްގެ ވާހަކަފުޅުގައި މިރޭ ވެސް ވިދާޅުވީ ސަރުކާރުގެ އަމާޒަކީ ހަމަޖެހޭ ދިރިއުޅުމެއް އުޅޭ އެކެއްގެ ފަރާތުން އަނެކަކަށް އުފާވެރިކަން ގެނެސް ދޭނެ ޒިންމާދާރު މުޖުތަމައުއެއް ބިނާކުރަން ކުރުމެވެ. އަދި ސަރުކާރުން އެއްވެސް ބައެއް ހަވާސާއެއް ނުވާނެ ކަމަށާއި ސަރުކާރުން ޒުވާނުންނަށް ކޮށްދެމުން އަންނަ ކަންކަމަކީ އިންވެސްޓްމަންޓެއް ކަމަށް ވެސް އެ މަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި ސަރުކާރުން ޒުވާނުންނާ ހަމައަށް އައިއިރު، "ވާނެ އެއްޗެއް އޮތީ ވެފަ" އެވެ. އެކަމަކު ފަސް އަހަރު ދައުރުގައި ޒުވާނުން ތަރުބިއްޔަތު ކުރެއްވިއްޖެނަމަ، ދެން ބިނާކުރާ ޖީލަކީ އަމާން ޖީލަކަށް ވެގެންދާނެ ކަމަށް ވެސް ރައީސް ވިދާޅުވި އެވެ.

"މަސްލަހަތު ނަގާލައި ޒުވާނުންތަކެއް އުފައްދާކަށް ބޭނުމެއް ނުވޭ، ބަދު ނަސީބުން ޖަލުތަކުގެ ތޭރިތަކުގައި ތިބި ޒުވާނުން އެ ތަނުން ނުކުމެވޭނެ ގޮތެއް ހަދަން ޖެހޭ. ދީނަށް ލޯބިކުރާ، ގައުމަށް ލޯބިކުރާ ޒުވާން ޖީލެއް ބިނާ ކުރުމަކީ ރާއްޖެއަށް އޮތް އެންމެ އަމާން ގޮތް،" ރައީސް ވިދާޅުވި އެވެ.

ރައީސްގެ ވާހަކަފުޅުގައި ސަރުކާރުން ހިންގަވާ ބައެއް ބޮޑެތި މަޝްރޫއުތަކާ ސަރުކާރުން ހާސިލްކުރައްވަމުން ގެންދަވާ ބައެއް ކަންކަމުގެ މައްޗަށް އަލިއަޅުއްވާލައްވައި ވާހަކަފުޅު ދެއްކެވި އެވެ. ހާއްސަކޮށް މާލެ އާއި ހުޅުލެ އާ ދެމެދު އަޅަމުން އަންނަ ބްރިޖާއި ސިއްހީ ދާއިރާއަށް ގެންނަ ބަދަލުތައް ފާހަގަކުރެއްވި އެވެ. އަދި ސަރުކާރުން މިހާތަނަށް 64،000 އަށްވުރެ ގިނަ ވަޒީފާ އުފެއްދި ކަމާއި ތައުލީމީ ދާއިރާއަށް ގެންނަމުން އަންނަ ހެޔޮ ބަދަލުތައް އެމަނިކުފާނު ފާހަގަކުރެއްވި އެވެ.

ޕީޕީއެމްއާ ބެހޭ ގޮތުން ވާހަކަފުޅު ދައްކަވަމުން ރައީސް ވިދާޅުވި ގޮތުގައި އަސުރުމާ ކުލައަކީ ހުރިހާ ބައްޔަށް އޮތް ޝިފާއެކެވެ. ދިވެހި އުދަރެހުން އުޖާލާކަމާއެކީ ފަވާލާނީ އަބަދުވެސް އަސުރުމާ ކުލަކަން ރައްޔިތުންނަށް ކަށަވަރުކޮށް ދޭން ބޭނުންވާ ކަމަށް ރައީސް ވިދާޅުވި އެވެ.

ޕީޕީއެމްގެ ޓިކެޓުގައި ކުރިއަށް އޮތް ލޯކަލް ކައުންސިލް އިންތިހާބުގައި ވާދަކުރައްވާ ބައެއް ކެންޑިޑޭޓުންނާ މަޖިލިސް ބައެއް މެމްބަރުން ވެސް މިރޭ ވާހަކަ ދެއްކެވި އެވެ. އެބޭފުޅުންގެ ވާހަކައިގައި ރައީސް ޔާމީންގެ ވެރިކަމުގެ ވޭތުވެދިޔަ ތިން އަހަރު ދުވަހު ގައުމަށް ގެނެސްދެއްވި ތަރައްގީގެ މައްޗަށް އަލިއަޅުުއްވާލެއްވި އެވެ.