އެނަމާ ބޯޓުގެ ހާދިސާ: ހަތަރު މަހުގެ ކުއްޖަކު ސަލާމަތްވީ ހައިރާން ކުރުވަނި ގޮތަކަށް

ފަހުގެ ތާރީހުގައި ރާއްޖޭގައި ހިނގި ކަނޑުމަތީގައި އެންމެ ބޮޑު ހިތާމަވެރި ހާދިސާ ކަމަށް އެނަމާ ބޯޓު ބަންޑުން ޖަހާލި ހާދިސާ އަށް މިއަދު 20 އަހަރު ފުރުނުއިރު، އެ ހާދިސާގައި އެންމެ ހަތަރު މަހުގެ ކުއްޖަކު ސަލާމަތްވުން ވީ ހައިރާން ކުރުވަނިވި ކަމެކެވެ.

އެނަމާ ބޯޓު 122 މީހުންނާ އެކު ދަތުރު ކުރަމުން ދަނިކޮށް 2004 ވަނަ އަހަރު އެ ބޯޓު ބަންޑުން ޖަހާލި ހާދިސާގައި 22 މީހުން މަރުވެ، ދެ މީހަކު ގެއްލުނެވެ. ރޭގަނޑުގެ ކަނު އަނދިރީގައި ބޯޓު ބަންޑުން ޖަހާލައި، އެންމެން ކަނޑުވެގެން އެތައް ބައެއްގެ ފުރާނަ ގެއްލި، މުޅި ގައުމު ރޮއްވާލި އެ ހިތާމަވެރި ހާދިސާގައި އޭރު އެންމެ ހަތަރު މަހުގެ ޒައިން އަހުމަދުގެ ފުރާނަ ސަލާމަތްވި ގޮތް އެއީ ޖަވާބު ނުލިބޭ ސުވާލެކެވެ.

ގއ. ވިލިނގިލިން ފުރައިގެން ތިނަދު އަށް ދިއުމަށް އެނަމާ ބޯޓު ފެށި ދަތުރުމަތީގައި ޒައިން ގެންގުޅުނީ ބޯޓުގައި ތިބި އޭނާގެ އާއިލާގެ މީހުންނާއި އެ ރަށުގެ ބައެއް ދަންނަ މީހުންނެވެ. ބޯޓު ބަންޑުން ޖަހާލި ވަގުތު ޒައިން އިނީ އެ ހާދިސާގައި ނިޔާވި ތިނަދު އަށް ނިސްބަތްވާ ފިލްމީތަރި އަމީޒާ އަހުމަދުގެ އުނގުގަ އެވެ. ބޯޓު ބަންޑުން ޖަހާލުމާ އެކު، ޒައިން ސަލާމަތް ކުރުމަށްޓަކައި އޭނާގެ އަތުގައި އެންމެ ފުރަތަމަ ހިފީ ޒައިންގެ މާމަ މަރިޔަމް ފާއިޒާ އެވެ.

ޕަބްލިކް ސާވިސް މީޑިއާ (ޕީއެސްއެމް) އަށް ފާއިޒާ ކުރިން ދިން އިންޓަވިއުއެއްގައި ބުނެފައިވާ ގޮތުގައި ބޯޓު ބަންޑުން ޖަހާލުމުން ޒައިންގެ އަތުގައި ހިފައިގެން ހުއްޓާ ޒައިން ހަވާލުކުރަން ކޮންމެވެސް މީހަކު ގޮވި އެވެ. އޭނާ އަތުން ޒައިން އަތުލީ ވެސް އެ މީހާ ކަމަށް ބެލެވެ އެވެ. އެ ހިސާބުން ލޯމަތިން ޒައިން ގެއްލުނީ އެވެ.

ޒައިންގެ ބައްޕަ އަހުމަދު ދީދީ އޭރު ބުނެފައިވާ ގޮތުގައި ޒައިން ސަލާމަތްވި ގޮތެއް "ހިތަށް ވެސް ނުގެނެވެ" އެވެ. ބޯޓު ބަންޑުން ޖަހާލުމާ އެކު ޒައިންގެ ބައްޕަ ބޯޓުގެ ޗެންޗޭނު މަތިން ފުންމާލުމަށްފަހު އެންމެ ފުރަތަމަ އޭނާ ބެލީ އެ ބޯޓުން ދަތުރުކުރި ޒައިން އާއި ޒައިންގެ މަންމަ އާއި މާމަ ހޯދާށެވެ.

"ގޮވަން ފެށިން ދަރިފުޅު ކޮބައިހޭ. އެ އަޑަށް ކޮންމެވެސް މީހަކު ގޮވާލި ދަރިފުޅު ހެޔޮ ހާލުގައި އެބައޮތޭ." ޒައިންގެ ބައްޕަ އޭރު "ހަވީރު" ނޫހަށް ދިން އިންޓަވިއުއެއްގައި ބުނެފައިވެ އެވެ.

އެ ހިސާބުން އޭނާ މިސްރާބު ޖެހީ އެ އަޑު އައި ދިމާލަށެވެ. އެ ހިސާބުން ދެން އިވުނު އަޑަކީ ތިނަދޫން މީހުން ސަލާމަތް ކުރަން އައި ދޯންޏަކަށް ޒައިން އެރުވި ހަބަރެވެ. އެހެންވެ، އަވަހަށް ފަތާފައި ގޮސް ދޯންޏަށް އެރިއިރު ޒައިން އިނީ މީހެއްގެ އުނގުގަ އެވެ.

ނަމަވެސް ޖަވާބު ނުދެވޭ ސުވާލަކީ ޒެއިން ސަލާމަތްވި ގޮތެއް އަދި ސަލާމަތްކުރި މީހަކީ ކާކު ކަމެވެ.

"ދަރިފުޅު ކަނޑު ތެރޭގައި އޮއްވައެއް ނުދެކެން. ކަނޑުން ނެގި މީހެއް ވެސް، ނެގީ ކިހިނެއް ކަމެއް ވެސް ނޭނގޭ. އަހަރެންނަށް ފެނުނީ ދޯންޏަށް އަރުވާފައި އިންދާ." އެތައް ބަޔަކާއި އެތައް ކުދިންނެއް މަރުވި އެ ހާދިސާއާ ގުޅިގެން ޒެއިންގެ ބައްޕަ އޭރު "ހަވީރު" ނޫހަށް ދިން އިންޓަވިއުއެއްގައި ބުނެފައިވެ އެވެ.

މަންޒަރު ދުށް ބައެއް މީހުންނާ ހަވާލާދީ އަހުމަދު ދީދީ އޭރު ބުނެފައިވާ ގޮތުގައި ޒައިން ސަލާމަތްކުރީ ކަނޑުވެފައި އޮތް އަންހެނެއްގެ ގައިމަތީގައި އޮއްވަ އެވެ. ނަމަވެސް އެއީ ކާކު ކަމެއް ވެސް އެނގޭ މީހަކު ނެތް ކަމަށް އޭނާ ބުނެފައިވެ އެވެ.

"އެތަން ދުށް މީހަކު އަދިވެސް ދިމަލެއް ނުވޭ." އޭރު ޒައިންގެ ބައްޕަ ބުނެފައިވެ އެވެ.

އެ ހާދިސާގައި ޒައިންގެ އިތުރުން އޭނާގެ މަންމަ އާއި މާމަ ވެސް ސަލާމަތް ވި އެވެ. ނަމަވެސް ފުއްޕާމެއަށް ލޮނު އެޅުމުގެ ސަބަބުން ޒައިން އިތުރު ފަރުވާއަށް މާލެ ގެނެސް އައިޖީއެމްއެޗްގައި ފަރުވާ ދިނެވެ. ކުޑަކުދިންނާއި އަންހެނުން ވެސް ހިމެނޭ ގޮތަށް އެތައް ބައެއްގެ ފުރާނަ ގެއްލުނު އެ ހާދިސާއަށް 20 އަހަރު ފުރުނުއިރު ވެސް އެންމެ ހަތަރު މަހުގެ ކުއްޖަކު އެ ބިރުވެރި ހާދިސާއިން ސަލާމަތްވުން އެއީ ގިނަ ބަޔަކު ހައިރާން ކޮށްލި ކަމެކެވެ.