ފޮރިން މިނިސްޓަރު ޒަމީރު އަންނަ ހަފުތާގައި އިންޑިއާ އަށް

ފޮރިން މިނިސްޓަރު މޫސާ ޒަމީރު ރަސްމީ ދަތުރެއްގައި އަންނަ ހަފުތާގައި އިންޑިއާ އަށް ވަޑައިގަންނަވާ ގޮތަށް ހަމަޖައްސަވައިފި އެވެ.

އިންޑިއާގެ ބައެއް ނޫސްތަކުން ރިޕޯޓްކޮށްފައިވާ ގޮތުގައި، ރާއްޖޭގައި އާ ސަރުކާރެއް އެކުލަވައިލި ފަހުން ފުރަތަމަ ފަހަރަށް ރާއްޖޭގެ ފޮރިން މިނިސްޓަރު ޒަމީރު އަންނަ ހަފުތާގައި ވެރިރަށް ނިއު ދިއްލީ އަށް ވަޑައިގަންނަވާނެ އެވެ. ޒަމީރު އިންޑިއާގެ ނިއު ދިއްލީ އަށް ފުރާވަޑައިގަންނަވާނީ މި މަހުގެ ނުވަ ވަނަ ދުވަހު އެވެ.

މިއީ ރައީސް ޑރ. މުހައްމަދު މުއިއްޒު މިދިޔަ ނޮވެމްބަރު މަހުގެ 17 ވަނަ ދުވަހު މަގާމުގެ ހުވާކުރެއްވި ފަހުން މި ސަރުކާރުގެ އިސްބޭފުޅަކު އިންޑިއާ އަށް ކުރައްވާ ފުރަތަމަ ރަސްމީ ދަތުރެވެ.

މީގެ ކުރިން ކޮންމެ ފަހަރަކު ވެސް ރާއްޖޭގެ ވެރިކަމަށް ވަޑައިގަންނަވާ ރައީސަކު އެންމެ ފުރަތަމަ ފުރަމާނަ ދަތުރުފުޅު ކުރައްވަނީ އިންޑިއާ އަށެވެ. ނަމަވެސް ރައީސް މުއިއްޒު އެ މަނިކުފާނުގެ ފުރަތަމަ ފުރަމާނަ ދަތުރުފުޅު ކުރެއްވީ ޗައިނާ އަށެވެ.

އާ ސަރުކާރުން ޗައިނާއާ މާ ގާތް ގުޅުމެއް ބާއްވާ ކަމަށް ބުނެ އިންޑިއާގެ ފާޑުކިޔުން ވަނީ ވަރަށް ބޮޑަށް ރާއްޖެ އަށް އަމާޒުވެފަ އެވެ.

މި ސަރުކާރުގެ އެންމެ ބޮޑު ވައުދަކަށް ވީ އިންޑިއާ އިން ރާއްޖޭގެ އަސްކަރިއްޔާ އަށް ހަދިޔާކުރި ހެލިކޮޕްޓަރާއި މަތިންދާބޯޓު ދުއްވަން ރާއްޖޭގައި ތިބި އިންޑިއާގެ ސިފައިން ބޭލުމެވެ. އެ ވައުދާ އެއްގޮތަށް އިންޑިއާގެ ސިފައިން ބާލައި އެ އުޅަނދުތައް ދުއްވުމަށް އިންޑިއާގެ މަދަނީ މީހުން ގެންނަން ދެ ގައުމުން މިހާރު ވަނީ އެއްބަސްވެފަ އެވެ.

އެ އެއްބަސްވުމުގެ ދަށުން ރާއްޖޭގައި ތިބި އިންޑިއާގެ ސިފައިންގެ ދެ ބެޗެއް މިހާރު ވަނީ އަނބުރާ އެ ގައުމަށް ފޮނުވާލައިފަ އެވެ. އިންޑިއާ ސިފައިންގެ އެންމެ ފަހު ބެޗު މި މަހު 10 ގެ ކުރިން ރާއްޖެއިން ފުރާނެ ކަމަށް ވެސް ދިވެހި ސަރުކާރުން ކުރިން ބުނެފައި ވެ އެވެ.

ރާއްޖޭގައި ގާއިމްވެ ތިބި އިންޑިއާގެ ސިފައިން ރާއްޖެ އިން ބާލަނީ ދެ ގައުމުން އެއްބަސްވުމެއްގައި ސޮއިކޮށް، އޭގައި ބަޔާން ކޮށްފައިވާ ގޮތުގެ މަތިންނެވެ.

ބެލެވޭ ގޮތުގައި މިނިސްޓަރު ޒަމީރުގެ މި ދަތުރުގައި ވެސް މިކަމާ ގުޅޭ އިތުރު މަޝްވަރާތައް ކުރައްވާނެ އެވެ.