ބަންގްލަދޭޝްގައި ހޫނު މަޑުވުމުން ސްކޫލްތައް އަލުން ހުޅުވައިފި

ބަންގްލަދޭޝްގައި ހޫނު މަޑުވުމުން މިދިޔަ ހަފްތާއިން ބަންދުކޮށްފައިވާ ސްކޫލްތައް އަލުން ހުޅުވައި ކިޔެވުން އިއްޔެ ފަށައިފި އެވެ.

ބަންގްލާދޭޝްގެ ވެރިރަށް ޑާކާގައި މިދިޔަ ހަފްތާގައި ވަނީ މިދިޔަ 30 އަހަރާ އަޅާބަލާއިރު އެވްރެޖް ހޫނުމިން 4-5 ޑިގްރީ ސެލްސިއަސް އަށް މަތިވެފަ އެވެ.

އެއާ އެކު މިދިޔަ ހަފްތާގައި ސްކޫލްތައް ބަންދުކުރީ އެގޮތަށް ހައި ކޯޓުން އަމުރުކުރުމުންނެވެ.

ސަރުކާރުން މިދިޔަ ހަފްތާގައި ބުނެފައިވާ ގޮތުގައި މި މަހު ވަނީ ގަދަ ހޫނުގެ ސަބަބުން ހަތް މީހަކު މަރުވެފަ އެވެ. އަދި މިދިޔަ ބުރާސްފަތި ދުވަހާ ހަމަޔަށް ހޫނުމިން 43 ޑިގްރީ ސެލްސިއަށް ވުރެ ވަނީ މަތިވެފަ އެވެ.

އެކަމަކު އިމްތިހާނާ ދިމާކޮށް 33 މިލިއަނެއްހާ ދަރިވަރުން ކިޔަވަމުންދާ ސްކޫލްތައް ބަންދުކުރުމުން ގިނަ ބެލެނިވެރިން ވަނީ ކަންބޮޑުވުންފާޅުކޮށްފައި އެވެ.

ބަންގްލާދޭޝްގެ މީޓިއޮރޮލޮޖިސްޓެއް ކަމަށްވާ މުހައްމަދު އަބްދުލްކަލާމް މާލިކް އޭއެފްޕީ އަށް ވިދާޅުވީ ބަންގްލާދޭޝް އަށް މިހާ ހޫނު ދުވަސްވަރެއް ދުވަހަކު 1948 ވަނަ އަހަރު ހިސާބުތައް ބަލަހައްޓަން ފެށި ފަހުން ތަޖުރިބާކުރަން ޖެހިފައި ނުވާ ކަމަށެވެ. -- އޭއެފްޕީ