ޕެވިލިއަން ލަސްވަނީ ފްރެންޗައިޒްތަކުގެ މިންގަނޑަށް ތަން ހަދާތީ: ބްރަދާޒް ކޭޓަރިން

ރަސްފަންނުގައި ދުނިޔޭގެ މަޝްހޫރު ފާސްޓް ފުޑް ރެސްޓޯރަންޓްތަކާ އެކު ހުޅުވަން ހަމަޖައްސާފައިވާ ޕެވިލިއަންގެ މަސައްކަތް ލަސްވަނީ އެތަނުގައި ހުޅުވާ ރެސްޓޯރަންޓުތަކުން ބޭނުންވާ މިންގަނޑުތަކަށް ފައްތަން އިތުރު މަސައްކަތްތަކެއް ކުރާތީ ކަމަށް ޕެވިލިއަން ތަރައްގީ ކުރަމުން އަންނަ ބްރަދާސް ކޭޓަރިން އިން މިއަދު ބުނެފި އެވެ.

ޕެވިލިއަންގައި ނޫސްވެރިންނާ ވާހަކަ ދައްކަވަމުން، ބްރަދާސް ކޭޓަރިންގެ ފަރާތުން ވާހަކަ ދެއްކެވި ހުސެއިން ހިލްމީ ވިދާޅުވީ ކޮންމެ ފްރެންޗައިޒެއްގައި އަމިއްލަ މިންގަނޑުތަކެއް ހުންނައިރު، އެ ބަޔަކު ބޭނުންވާ ފެންވަރަށް ޕެވިލިއަން އިމާރާތްކޮށް ނިންމަން ބޭނުންވާ ކަމަށެވެ.

އެ ގޮތުން އިމާރާތުގެ އޮނިގަނޑު ހަދާފައި، މަސައްކަތް އެއްކޮށް ނިންމާލުމުގެ ކުރިން އެއްވެސް ބަދަލެއް ގެންނަން ޖެހޭތޯ ފްރެންޗައިޒްތަކާ ވާހަކަ ދައްކަމުން އަންނަ ކަމަށް ވެސް އޭނާ ވިދާޅުވި އެވެ. އަދި އަންނަ މަސް ނިމުމުގެ ކުރިން ކުރެހުންތައް ލިބޭނެ ކަމަށް އޭނާ ވިދާޅުވި އެވެ.

"މިތަނުގައި އެއްވެސް މަސައްކަތެއް ނުކުރިޔަސް، މީގެ މަސައްކަތްތަކެއް ހިނގަމުން ދަނީ، ޕްލޭނިން އާއި ކުރެހުންތައް ހޯދުމުގެ ކަންކަން ކުރަމުން މިދަނީ،" ހިލްމީ ވިދާޅުވި އެވެ.

ހިލްމީ ވިދާޅުވި ގޮތުގައި ޕެވިލިއަން އިމާރާތް ކުރުމުގެ މަސައްކަތް މާޗު މަހުގެ ފަހު ކޮޅު ފަށައި، ތިން މަސް ތެރޭގައި ނިންމާލުމަކީ އެ ކުންފުނީގެ އުންމީދެކެވެ. އަދި ޕެވިލިއަން ހުޅުވާއިރު، މަޝްހޫރު ދެ ރެސްޓޯރަންޓް ކަމަށްވާ ޕިއްޒާ ހަޓާއި ކޭއެފްސީގެ ހިދުމަތް ލިބޭނެ ކަމަށް އޭނާ ވިދާޅުވި އެވެ.

"އިތުރު ފްރެންޗައިޒްތައް ގެންނަން މަސައްކަތް ކުރަމުން މިދަނީ، އަޅުގަނޑުމެން ފައްޓާނީ ކޭއެފްސީ އާއި ޕިއްޒާ ހަޓާ އެކު،" ރާއްޖެއަށް ފްރެންޗައިޒްތައް ގެންނަން މަސައްކަތް ކުރާ ގެމަ ކާސްޓަވޭ ޕްރައިވެޓް ލިމިޓެޑްގެ ޗެއާމަންކަން ވެސް ކުރައްވާ ހިލްމީ ވިދާޅުވި އެވެ.

އެމްޑަބްލިއުއެސްސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ވިދާޅުވި ގޮތުގައި މަޝްހޫރު ރެސްޓޯރަންޓުތަކުގެ ހިދުމަތް ލިބުމަށް ގިނަ ބަޔަކު އެދެ އެވެ. އަދި މަސައްކަތް ކުރަމުން އަންނަނީ ވީހާވެސް ފެންވަރު ރަނގަޅު ޕްރޮޑަކްޓެއް ގެންނަން ކަމަށް އޭނާ ވިދާޅުވި އެވެ.

ފަޒުލް ވެސް ވިދާޅުވީ ޕެވިލިއަން ނުނިމި ދިގުލައިގެން ދިޔައީ ޑިޒައިނަށް ބަދަލު ގެނެސް، ރެސްޓޯރަންޓުތަކުން ބޭނުންވާ މިންގަނޑުތަކަށް ފައްތަންޖެހޭތީ ކަމަށެވެ.

"މަސައްކަތް ދިގުލައިގެން ދިޔަ ކަމަށް ގަބޫލުކުރަން، އެކަމަކު މީގެ ނަތީޖާއަކަށްވާނީ ރައްޔިތުންނަށް ވީހާވެސް ފެންވަރު ރަނގަޅު ޕްރޮޑަކްޓެއް ގެނައުން،" ފަޒުލް ވިދާޅުވި އެވެ.

މިދިޔަ ފެބްރުއަރީ މަހު ރަސްފަންނު ހުޅުވިއިރު ޕެވިލިއަންގެ މަސައްކަތެއް ނުނިމެ އެވެ. ދެ ބުރި އަށް ހަދާ ޕެވިލިއަން ރޭނުގެ ބޮޑު ބައެއް މިހާރު ވަނީ ނިމިފަ އެވެ. އެމްޑަބްލިއުއެސްސީއާ ހަވާލުކޮށްގެން ހަދާ އެ ތަން ހަ މަސްދުވަހުގެ ތެރޭގައި ނިމޭނެ ކަމަށް ސަރުކާރުން އޭރު ލަފާކުރި ނަމަވެސް އެ ތަން ތަރައްގީ ކުރާނެ ރަނގަޅު ބަޔަކު ހޯދުމަށް އެމްޑަބްލިއުއެސްސީން އެކި ފަހަރުމަތިން އިއުލާނުކުރި އެވެ. ޕެވިލިއަން ތަރައްގީކޮށް 10 އަހަރު ދުވަހަށް ހިންގަން ބްރަދާސް ކޭޓަރިންއާ ހަވާލުކުރީ މިދިޔަ އަހަރުގެ އޮކްޓޯބަރު މަހު އެވެ.