މާލޭގައި ޕިއްޒާ ހަޓް އަންނަ ބުރާސްފަތީގައި ހުޅުވަނީ، ކޭއެފްސީ ވެސް ވަރަށް އަވަހަށް ހުޅުވާނެ

ދުނިޔޭގެ މަޝްހޫރު ފާސްޓް ފުޑް ޗެއިންތަކުގެ ތެރޭގައި ހިމެނޭ ޕިއްޒާ ހަޓާއި ކެންޓަކީ ފްރައިޑް ޗިކަން (ކޭއެފްސީ)ގެ ރެސްޓޯރަންޓެއް ފުރަތަމަ ފަހަރަށް ރާއްޖޭގައި ހުޅުވަން ތައްޔާރުވެއްޖެ އެވެ.

ޕިއްޒާ އުފެއްދުމުގައި ދުނިޔޭގެ އެންމެ މަޝްހޫރު އެއް ކުންފުނި، އެމެރިކާގެ ޕިއްޒާ ހަޓާއި ތެލުލި ކުކުޅުން މަޝްހޫރުކަން ހޯދާފައިވާ ކޭއެފްސީގެ ރެސްޓޯރަންޓެއް ހުޅުވަނީ އަމީނީމަގުގައި ހުންނަ މާލޭ ސްކެއާ (ގާކޮށި)ގަ އެވެ.

ޕިއްޒާ ހަޓާއި ކޭއެފްސީ ރެސްޓޯރަންޓް ރާއްޖޭގައި ހިންގާ ކުންފުނީގެ އިސް އޮފިޝަލަކު މިއަދު ވިދާޅުވީ މާލޭ ސްކެއާގައި އަމީނީ މަގަށް ވާ ގޮތަށް ހަދާ ޕިއްޒާ ހަޓްގެ ހުރިހާ މަސައްކަތެއް މިހާރު ނިމިފައިވާ ކަމަށެވެ. އޭނާ ވިދާޅުވީ އެ ރެސްޓޯރަންޓް އަންނަ ބުރާސްފަތި ދުވަހު ހުޅުވާނެ ކަމަށެވެ.

އޮފިޝަލް ވިދާޅުވީ 70 މީހުންގެ ޖާގައިގެ ރެސްޓޯރަންޓުން ވެސް ދުނިޔޭގެ އެހެން ޕިއްޒާ ހަޓް ރެސްޓޯރަންޓްތަކުން ވެސް ލިބެހުންނަ ރަހަތައް ލިބޭނެ ކަމަށެވެ.

"އަޅުގަނޑަށް އެނގޭ ރާއްޖޭގައި މީގެ ކުރިން މި ދެ ބްރޭންޑް ހުޅުވާފައި ނެތް ނަމަވެސް ދިވެހިންނަށް އާ ބްރޭންޑްތަކެެއް ނޫންކަން. މި ދެ ބްރޭންޑަކީ ވެސް ދިވެހިންގެ މެދުގައި ވަރަށް މަގުބޫލް ދެ ބްރޭންޑެއް. އެހެންވެ އަޅުގަނޑުމެން ރާއްޖެ އަންނަން ޝައުގުވެރިވީ ވެސް،" އޭނާ ވިދާޅުވި އެވެ.

އޮފިޝަލް ވިދާޅުވި ގޮތުގައި، ޕިއްޒާ ހަޓް ހުޅުވުމަށްފަހު ހަމަ އެ އިމާރާތުގައި ކޭއެފްސީގެ ރެސްޓޯރަންޓް ވެސް ވަރަށް އަވަހަށް ހުޅުވާނެ އެވެ.

"ކޭއެފްސީގެ ރެސްޓޯރަންޓް މަސައްކަތް ވެސް މިހާރު ވަނީ ގާތްގަނޑަކަށް ނިމިފައި. ހުޅުވާނެ ދުވަހެއް ވަރަށް އަވަހަށް އިއުލާންކުރާނަން،" އޭނާ ވިދާޅުވި އެވެ.

މާލޭގައި ޕިއްޒާ ހަޓާއި ކޭއެފްސީ ހުޅުވާއިރު، ވެލާނާ އިންޓަނޭޝަނަލް އެއާޕޯޓުގައި ވެސް އެ ދެ ބްރޭންޑްގެ ރެސްޓޯރަންޓެއް ހުޅުވަން ވަނީ ނިންމައިފަ އެވެ. އެކަމަކު އެ އެއާޕޯޓުގައި ރެސްޓޯރަންޓް ހުޅުވާ ކުންފުންޏާއި މާލޭގައި ހުޅުވާ ކުންފުންޏާ އެއްވެސް ގުޅުމެއް ނެތެވެ.

ވެލާނާ އެއާޕޯޓުގެ ވޯޓާ ފްރަންޓްގައި އަލަށް ހަދާފައިވާ ރެސްޓޯރަންޓް ބިލްޑިންގައި މޯލްޑިވްސް އެއާޕޯޓްސް ކޮމްޕެނީ (އެމްސީއެލް) އިން ޕިއްޒާ ހަޓާއި ކޭއެފްސީ ހުޅުވަނީ އިޓަލީގެ އެޗްއެމްއެސް ހޮސްޓް އިންޓަނޭޝަނަލްއާ ގުޅިގެންނެވެ. ނަމަވެސް އެއާޕޯޓުގައި ހަދާ އެ ދެ ރެސްޓޯރަންޓް ހުޅުވާނެ ދުވަހެއް އަދި ނުބުނު އެވެ.