ރާއްޖޭން ބޭރުގެ ކޮމްޕިއުޓަރު ޑޭޓާއަށް ހުއްދަ ނެތި އެކްސެސްވުމުގެ ބާރު ފުލުހުންނަށް ދެނީ

ބޭރު ގައުމެއްގެ ހުއްދަ ހޯދުމަކާ ނުލައި، އެ ގައުމެއްގެ ހުންނަ ކޮމްޕިއުޓަރު ސިސްޓަމެއްގައި ރައްކާކޮށްފައި ހުންނަ ޑޭޓާ ލިބިގަތުން ނުވަތަ އެ ޑޭޓާއަށް އެކްސެސްވުމުގެ ބާރު ރާއްޖޭގެ ތަހުގީގީ އިދާރާތަކަށް ދިނުމަށް ގާނޫނަށް އިސްލާހެއް ހުށަހަޅައިފި އެވެ.

މިގޮތަށް އޮތީ، 2015 ވަނަ އަހަރު ފާސްކޮށްފައިވާ، ޖިނާއީ މައްސަލަތަކުގައި ގާނޫނީ އެހީތެރިކަން ބަދަލުކުރުމުގެ ގާނޫނަށް ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހެޅުއްވި އިސްލާހެއްގަ އެވެ.

މި އިސްލާހަކީ އެންމެ ފުރަތަމަ ނިމިދިޔަ ސަރުކާރުން ޑްރާފްޓްކޮށް މިދިޔަ އަހަރު މަޖިލީހަށް ހުށަހެޅި ބިލެކެވެ. ނަވާރަވަނަ މަޖިލިސް ނިމުނުއިރު ބިލާ މެދު އެއްވެސް ގޮތެއް ނިމިފައިނުވާއިރު، އާ މަޖިލީހަށް ބިލް ހުށަހެޅީ ހަމަ ކުރިން ވެސް ބިލް އޮތް ގޮތަށް އެއްވެސް ބަދަލެއް ނުގެނެހެވެ.

ބަންޑާރަ ނައިބުގެ އޮފީހުން ބުނި ގޮތުގައި މި އިސްލާހަކީ ސައިބާ ކްރައިމްތައް ހުއްޓުވުމަށް ގާނޫނަށް ގެންނަން ބޭނުންވާ އިސްލާހެކެވެ.

އެ އިސްލާހުގައި ބުނެފައިވާ ގޮތުގައި ކޮމްޕިއުޓަރު ސިސްޓަމެއް މެދުވެރިކޮށް ކުރާ ކުށަކާ ގުޅިގެން ނުވަތަ ކޮމްޕިއުޓަރު ޑޭޓާއާ ގުޅޭ ކުށަކާ ގުޅިގެން ނުވަތަ އިލެކްޓްރޯނިކް ހެކި ހޯދަންޖެހޭ ފަދަ އެ ނޫން ވެސް ކުށަކާ ގުޅިގެން ޝަރީއަތަށް ނުވަތަ ތަހުގީގަކަށް ބޭރު ގައުމެއް ނުވަތަ އެޖެންސީއަކާ އެކު ނުވަތަ 24/7 ނެޓްވޯކަކާ އެކު ރާއްޖޭގެ އިދާރާތަކަށް މަސައްކަތް ކުރެވިދާނެ ކަމަށެވެ.

ޖިނާއީ ތަހުގީގު ހިންގުމުގެ ބާރު ލިބިފައިވާ އިދާރާއަކަށް ބޭރު ގައުމެއްގެ ހުއްދަ ހޯދުމަކާ ނުލައި މައުލޫމާތު ހޯދުމުގެ ބާރު ވެސް އިސްލާހުގައި ދީފައިވެ އެވެ. އެގޮތުން، ރާއްޖޭން ބޭރުގައި ހުރި ކޮމްޕިއުޓަރު ސިސްޓަމެއްގައި ރައްކާކޮށްފައިހުރި ކޮމްޕިއުޓަރު ޑޭޓާ ހާމަކުރުމުގެ ގާނޫނީ ބާރު ލިބިފައިވާ ފަރާތުގެ ރުހުން، ގާނޫނާ އެއްގޮތަށް ހޯދުމަށްފަހު ރާއްޖޭގައި ހުރި ކޮމްޕިއުޓަރު ސިސްޓަމެއް ބޭނުންކޮށްގެން އެ ޑޭޓާ ލިބިގަނެވޭނެ ކަމަށާއި ނުވަތަ އެ ޑޭޓާއަށް އެކްސެސްވެވޭނެ ކަމަށް އިސްލާހުގައިވެ އެވެ.

ބޭރުގައި ހުރި ކޮމްޕިއުޓަރު ސިސްޓަމެއްގައި ރައްކާކޮށްފައިހުރި ޑޭޓާއަށް އެކްސެސްވެވޭނީ ދެ ހާލަތެއްގަ އެވެ. އެއީ؛

- އަމިއްލަ ފަރުދުންގެ ފުރާނައަށް ނުވަތަ ސަލާމަތަށް ގާތް މުސްތަގުބަލެއްގައި ބޮޑު ނުރައްކަލެއް ކުރިމަތިވުމުގެ ފުރުސަތު އޮތުން

- ރާއްޖޭގައި ގެއްލުން ލިބުނު މީހުންގެ އަދަދަށް ބަލާއިރު ނުވަތަ ގެއްލުމުގެ މިންވަރަށް ބަލާއިރު އިގުތިސާދީ ގޮތުން ބޮޑު ގެއްލުމެއް މެދުވެރިވުން.

ބޭރު ގައުމެއްގެ ކޮމްޕިއުޓަރު ޑޭޓާއަށް އެކްސެސްވުމަށް ފަހު، އެކަށީގެންވާ މުއްދަތެއްގެ ތެރޭގައި އެކަން ކަމާ ގުޅޭ ބޭރު ގައުމަކަށް އެ ޑޭޓާ ލިބިފަތް ނުވަތަ ޑޭޓާއަށް އެކްސެސްވި އިދާރާއަށް އަންގަންވާނެ ކަމަށް ވެސް އިސްލާހުގައިވެ އެވެ.

އިސްލާހުގައިވާ ގޮތުން ރާއްޖޭގެ ތަހުގީގަކަށް ނުވަތަ ޝަރީއަތަކަށް ހޯދާފައިވާ އެއްވެސް މައުލޫމާތަކީ ބޭރު ގައުމަކަށް ނޫނީ އެޖެންސީއަކަށް ބޭނުންވާ މައުލޫމާތެއް ނަމަ، އެ މައުލޫމާތެއް ޕްރޮސިކިއުޓާ ޖެނަރަލަށް ބޭރު ގައުމަކާ ނުވަތަ އެޖެންސީއަކަށް އެއްވެސް ފަރާތަކަށް ހުށަހެޅުމަކާ ހިއްސާ ކުރެވިދާނެ ކަމަށް ވެސް އިސްލާހުގައިވެ އެވެ.

އެ މައުލޫމާތެއް ރައްކާތެރިކޮށްދީ، ރާއްޖޭގެ ކޮމްޕިޓަރެއްގައި ހުރި ޑޭޓާއަށް އެކްސެސްވެ، އެ މައުލޫމާތެއް ހޯދުމަށް އެދި ޕްރޮސިކިއުޓާ ޖެނަރަލަށް ބޭރު ގައުމަކުން ނުވަތަ އެޖެންސީއަކުން ހުށަހެޅުމުގެ އިހްތިޔާރު ވެސް އިސްލާހުގައި ވަނީ ދީފަ އެވެ. އަދި މި ހާލަތުގައި ޕްރޮސިކިއުޓާ ޖެނަރަލް އަމަލު ކުރަން ޖެހޭ ގޮތް ވެސް އިސްލާހުގައި ހިމަނާފައިވެ އެވެ.

މީގެއިތުރުން ކޮމްޕިއުޓަރު ޑޭޓާއާ ގުޅޭ ކުށްތަކާ ގުޅިގެން ހިންގާ ތަހުގީގާއި ޝަރީއަތްތަކަށް އެހީތެރިކަން ވަގުތުން ފޯރުކޮށްދިނުމަށް 24 ގަޑިއިރު މުއާމަލާތް ކުރެވޭނެ ފަރާތެއް، ފުލުހުންގެ ހިދުމަތުގައި ގާއިމް ކުރަން ވެސް އިސްލާހުގައި ވަނީ ލާޒިމްކޮށްފަ އެވެ.

24/7 ނެޓްވޯކް އިން ފޯރުކޮށްދޭން ޖެހޭ އެހީތެރިކަން:

- ޑޭޓާ ޕްރިޒާވްކުރުން

- އިލެކްޓްރޯނިކް ހެކި ހޯދުން

- ގާނޫނީ މައުލޫމާތު ދިނުން

- ކުށުގެ ތުހުމަތު ކުރެވޭ ފަރާތްތައް ވީތަނެއް ހޯދުން

- ފަންނީ ލަފާ ދިނުން.