ބަންގްލާދޭޝްގައި ދަރިވަރުންގެ މުޒާހަރާތަކުގައި ހަ މީހަކު މަރުވުމުން ސްކޫލްތައް ބަންދުކޮށްފި

ބަންގްލާދޭޝްގައި ދަރިވަރުން ކުރަމުންގެންދާ މުޒާހަރާތައް ހޫނުވެ އިއްޔެ ހަމަނުޖެހުންތައް ހިނގައި ހަ މީހަކު މަރުވުމާ އެކު މުޅި ގައުމުގެ ސްކޫލްތައް މުއްދަތެއް ނެތް ގޮތަށް ބަންދުކުރަން ސަރުކާރުން އަންގައިފި އެވެ.

ސިވިލް ސާވިސް ވަޒީފާއަށް މީހުން ނެގުމުގެ ސިޔާސަތުތަކާ ދެކޮޅަށް ހަފްތާތަކެއް ވަންދެން ކުރި މުޒާހަރާތައް އިތުރުވެ ހޫނުވުމުން ބަންގްލާދޭޝް ސަރުކާރުން ވަނީ ހުރިހާ ހައި ސްކޫލްތަކާއި އިސްލާމީ ތައުލީމު ދޭ މަރުކަޒުތަކާއި ވޮކޭޝަނަލް އެޑިއުކޭޝަން އިންސްޓިޓިއުޓްތައް ވެސް ވަކި ގޮތަކަށް އަންގަންދެން ބަންދުކުރަން އަންގައިފަ އެވެ.

މުޒާހަރާތައް އިއްޔެ ހޫނުވީ ސަރުކާރާ ދެކޮޅަށް މުޒާހަރާކުރި ދަރިވަރުންނާއި ސަރުކާރަށް ތާއީދުކުރާ ދަރިވަރުން އެއްބަޔަކު އަނެއް ބަޔަކަށް ގަލާއި ލަކުޑިބުރި އާއި ދަގަނޑުން ހަމަލާދޭން ފެށުމާ އެކު އެވެ. އެއާ އެކު ފުލުހުން ނުކުމެ ކަރުނަގޭހާއި ރަބަރު އުންޑަ ޖަހައި މުޒާހަރާތައް ރޫޅާލި އެވެ.

އެޑިއުކޭޝަން މިނިސްޓްރީގެ ތަރުޖަމާނު އެމް.އޭ. ޚައިރު ވިދާޅުވީ ސްކޫލްތައް ބަންދުކުރަން އެންގީ ދަރިވަރުންގެ ރައްކަލަކަށް ކަމަށެވެ.

އެކަމަކު ބަންދުކުރަން އެންގި ތަންތަނުގެ ތެރޭގައި، މުޒާހަރާތަކުގައި ގިނައިން ބައިވެރިވާ ދަރިވަރުން އުޅޭ ޔުނިވަސިޓީތަކެއް ނުހިމެނެ އެވެ. އެއީ ޔުނިވަސިޓީތަކަށް މިފަދަ އެންގުންތައް އެންގުމުގެ ބާރު އެޑިއުކޭޝަން މިިނިސްޓްރީއަށް ނޯންނާތީ އެވެ.

ދަރިވަރުން އިއްޔެ މުޒާހަރާއަށް ނުކުތީ މުޒާހަރާތައް ހުއްޓާލުމަށް ފަހު ދަރިވަރުން ކްލާސްތަކަށް ގޮސް އަލުން ކިޔަވަން ފެށުމަށް ބޮޑުވަޒީރު ޝައިހް ހަސީނާ އާއި ސުޕްރީމް ކޯޓުން ވެސް ގޮވާލާފައި ވަނިކޮށެވެ.

އިއްޔެ މުޒާހަރާތަކުގައި މަރުވި މީހުންގެ ތެރެއިން ތިން މީހަކު މަރުވީ ޗިޓަގޮން ސަރަހައްދުންނެވެ. އެ މީހުންގެ ހަށިގަނޑުގައި ބަޑީގެ އުންޑަ އެރިކަމުގެ ނިޝާންތައް ހުރި ކަމަށް ހޮސްޕިޓަލްތަކުން ވަނީ ބުނެފަ އެވެ. މި ސަރަހައްދުން އިތުރު 35 މީހަކު ޒަހަމްވެފައިވެ އެވެ.

އަނެއް ދެ މީހުން މަރުވީ ވެރިރަށް ޑާކާގަ އެވެ. ޑާކާގައި ސަރުކާރާ ދެކޮޅު އަދި ތާއީދުކުރާ ދަރިވަރުން އެއްބަޔަކު އަނެއް ބަޔަކަށް ހަމަލާ ދިނުމުގެ ތެރޭގައި އެކަކު މަރުވީ ބޮލަށް ލިބުނު އަނިޔާއަކުން ކަމަށާއި އިތުރު 60 މީހަކު ޒަހަމްވި ކަމަށް ފުލުހުން އޭއެފްޕީއަށް ބުންޏެވެ.

މުޒާހަރާކުރާ ދަރިވަރުން ބުނަމުން އަންނަނީ އެ މީހުން މުޒާހަރާކުރަނީ ހަމަނުޖެހުން އުފައްދަން ނޫން ކަމަށާއި އެހެން ބަޔަކު ހަމަނުޖެހުން އުފައްދަނީ ކަމަށެވެ.

މުޒާހަރާތަކާ ގުޅިގެން ހިނގަމުންދާ ކަންކަމާ ހެދި އެމްނެސްޓީ އިންޓަނޭޝަނަލް އާއި އެމެރިކާ އާއި އެހެން ބައެއް އިދާރާތަކާއި ގައުމުތަކުން ވެސް ވަނީ ކަންބޮޑުވުން ފާޅުކޮށްފަ އެވެ. --އޭއެފްޕީ