ބޮޑުވަޒީރު ހަސީނާ އިސްތިއުފާ ދެއްވައި ފިއްލަވައިފި، ރައްޔިތުން ރިޔާސީ ގަނޑުވަރަށް ވަދެގެންފި

ބަންގްލާދޭޝްގައި ސަރުކާރާ ދެކޮޅު މުޒާހަރާގެ ބައިވެރިން ބޮޑުވަޒީރު ޝައިޚް ހަސީނާގެ ގަނޑުވަރު ކައިރިއަށް ޖަމާވާން ފެށުމާ އެކު އޭނާ އިސްތިއުފާ ދެއްވައިފި އެވެ.

އޭއެފްޕީން ބުނި ގޮތުގައި ގަނޑުވަރު މިހާރު ވަނީ މުޒާހަރާކުރާ މީހުންގެ ބާރުގެ ދަށުގަ އެވެ. އަދި ސިފައިންގެ ވެރިޔާ ގައުމާ މުޚާތަބު ކުރައްވައި، ވިދާޅުވީ ހަސީނާގެ އިސްތިއުފާއާ އެކު، ވަގުތީ ސަރުކާރެއް އެކުލަވާލުމުގެ މަސައްކަތް ކުރަމުންދާ ކަމަށެވެ.

ބީބީސީން ބުނިގޮތުގައި ހަސީނާ ހެލިކޮޕްޓަރެއްގައި ވަޑައިގަތީ އިންޑިއާގެ އަގާޓަލާ ސިޓީއަށެވެ. ހަސީނާގެ އަރިސް ބޭފުޅަކު އޭއެފްޕީ އަށް ބުނި ގޮތުގައި ހަސީނާ ގައުމު ދޫކޮށް ވަޑައިގަތީ ރައްކާތެރިކަން ކަށަވަރުކުރެއްވުމަށެވެ.

ސިވިލް ސާވިސް ވަޒީފާއަށް މީހުން ނަގާ ގޮތާ މެދު ހިތްހަމަނުޖެހުން މިދިޔަ މަހު ފެށި މުޒާހަރާތަކުގައި އެތައް ބަޔަކު މަރުވުމުން މުޒާހަރާ މެދުކަނޑާލުމަށް ފަހު މި ހަފްތާގައި އަލުން ފެށުމަށް ފަހު އިއްޔެ އަކީ މުޒާހަރާގައި އެންމެ ގިނަ މީހުން މަރުވި ދުވަހެވެ. އެއާ އެކު ހަސީނާގެ އިސްތިއުފާ އަށް ގޮވައި، މުޒާހަރާގެ މިސްރާބު އެއްކޮށް ބަދަލުވި އެވެ.

މިއަދު މުޒާހަރާ ވަރުގަދަކޮށް މިއަދު މިއީ ފަހު ދުވަސް ކަމަށް އިއްޔެ އޮތީ މުޒާހަރާގެ ލީޑަރުން އިއުލާނުކޮށްފަ އެވެ. އެހެންވެ ވެރިރަށް ޑާކާއަށް އެންމެން ޖަމާވާން ގޮވާލާފައިވެ އެވެ.

މުޒާހަރާގެ ބައިވެރިން ބޮޑުވަޒީރުގެ ގަނޑުވަރަށް ވަދެ އެތަނުގައި ހުރި ތަކެތި ނެރެގެން ގެންދާ މަންޒަރު ފެންނަ ވީޑިއޯތައް ވެސް ވަނީ އާންމުވެފަ އެވެ.

މިދިޔަ މަހު މުޒާހަރާކުރި އިރު ސިފައިންނާއި ފުލުހުން ވެސް މުޒާހަރާގެ ބައިވެރިންނަށް އެއްވެސް ފުރުސަތެއް ނުދީ ކުރިމަތިލި ނަމަވެސް އިއްޔެ ކިތަންމެ ސަރަހައްދެއްގައި ވަނީ މުޒާހަރާގެ ބައިވެރިން ކުރިއަށް ދާން ދޫކޮށްލާފައި ކަމަށް މީޑިއާގައި ރިޕޯޓްކޮށްފައިވެ އެވެ.