މަޖުބޫރު ކައިވެންޏަކުން ދަރިފުޅު މަރުވުމުން މަންމަ ޖަލަށް

އޮސްޓްރޭލިއާއަށް އަފްޣާނިސްތާނުން ހިޖުރަކުރި އާއިލާއެއްގެ 21 އަހަރުގެ އަންހެން ކުއްޖަކު ގަދަކަމުން މީހަކާ ކައިވެނިކުރުވި ފަހުން ފިރިމީހާގެ އަނިޔާގައި މަރުވުމުން މަންމަގެ މައްޗަށް ކުރި ދައުވާ ސާބިތުވެ އޭނާ ޖަލަށް ލާން ހުކުމްކޮށްފި އެވެ.

މިއީ އޮސްޓްރޭލިއާގައި އަމަލުކުރަން ފަށާފައިވާ، މަޖުބޫރުން ކައިވެނިކުރުވުން މަނާކުރާ ގާނޫނުގެ ދަށުން މީހަކަށް ހުކުމް އިއްވި ފުރަތަމަ ފަހަރެވެ.

އުމުރުން 40 އިން މައްޗަށް ގޮސްފައިވާ ސަކީނާ މުހައްމަދު ޖާން އޭނާގެ ދަރިފުޅު ރުގިއްޔާ ހައިދަރީ 2019 ވަނަ އަހަރު ކައިވެނިކުރުވީ އުމުރުން 26 އަހަރުގެ މުހައްމަދު އަލީ ހަލީމީ ކިޔާ މީހަކާ އެވެ.

ދައުވާގައި ބުނެފައިވާ ގޮތުގައި ޝަކީނާ މި ކައިވެނި ކުރުވީ އޭނާއަށް ލިބޭ ކުޑަ ފައިސާކޮޅެއްގެ ބޭނުމުގަ އެވެ.

ކައިވެންޏަށް ހަ ހަފްތާ ފަހުން ހަލީމީ ވަނީ އަނބިމީހާ ރުގިއްޔާ މަރާލައިފަ އެވެ. އެ ކުށާ ގުޅިގެން ހަލީމީ މިހާރު ވަނީ އުމުރަށް ޖަލަށް ލައިފަ އެވެ.

ސަކީނާ ޖަލަށް ލާން ހޯމަ ދުވަހު ހުކުމް ކުރީ ދައުވާ އަށް އިންކާރުކޮށްފައި ވަނިކޮށެވެ. އެކަމަކު ފަނޑިޔާރު ވިދާޅުވީ ދަރިފުޅު ކައިވެނިކުރީ މަންމަގެ ޕްރެޝަރަށް ކެތް ނުވެގެން ކަމަށެވެ.

މަޖުބޫރުން ކައިވެނިކުރުން މަނާކޮށް 2013 ވަނަ އަހަރު އޮސްޓްރޭލިއާގައި އަމަލުކުރަން ފެށި ގާނޫނުގެ ދަށުން ކުށްވެރިވާ މީހުން ހަތް އަހަރަށް ޖަލަށް ލެވިދާނެ އެވެ. އެކަމަކު ސަކީނާ ޖަލުގައި ހޭދަކުރަން ޖެހޭނީ އަހަރެއްހާ ދުވަހު ކަމަށް ގާނުނީ ބޭފުޅުން ލަފާކުރައްވަ އެވެ.

ސަކީނާގެ ގާނޫނީ ވަކީލް ކޯޓުގައި ވިދާޅުވި ގޮތުގައި ދަރިފުޅުގެ މަރާ ގުޅިގެން ސަކީނާ ހުރީ ވަރަށް ދެރަވެފަ އެވެ. އެ މަރަކީ ސަކީނާގެ ކުށެއް ނޫން ކަމަށް ވަކީލް ވިދާޅުވި އެވެ.

ކޯޓުގައި އިއްވި ދައުވާގައިވާ ގޮތުން ރުގިއްޔާ އެންމެ ފުރަތަމަ ނުރަސްމީކޮށް، 15 އަހަރުގައި ވަނީ "ދީނީ ކައިވެންޏެއް" ކުރުވައިފަ އެވެ. މި ކައިވެނި ދެ އަހަރަށް ދެމިގެން ދިޔަ ކަމަށާއި ރަސްމީކޮށް ކައިވެނި ނުކޮށް ތިބީ ރުގިއްޔާ 27 ނުވަތަ 28 އަހަރު ނުވަނީސް ކައިވެނިކުރަން ބޭނުން ނުވުމުން ކަމަށް ވެސް ބުނެފައިވެ އެވެ.

"އޭނާ ބޭނުންވީ އިތުރަށް ކިޔަވައިގެން ރަނގަޅު ވަޒީފާއެއް ހޯދަން،" ފަނޑިޔާރު ވިދާޅުވި އެވެ.

ދަރިފުޅަށް ރަނގަޅު ގޮތް ހޯދައިދޭން ކަމަށް ސަކީނާ މަސައްކަތްކުރި ކަމަށް ބުންޏަސް ދަރިފުޅުގެ އާދޭސްތައް އަޑުނާހައި "މައެއްގެ ބާރު ނަހަމަ ގޮތުގައި ހިފައި" ދަރިފުޅު ކައިވެނިކުރުވީ ކަމަށް ފަނޑިޔާރު ވިދާޅުވި އެވެ. ދަރިފުޅަށް ވިސްނިފައި އޮތީ ކައިވެނި ނުކޮށްފި ނަމަ މުޖުތަމައުގައި މަންމަ އަށް ކުރިމަތިވާނެ މަލާމާތާއި އާއިލާގެ ތެރެއިން އުފައްދާނެ ސުވާލުތައް ކަމަށާއި އެ ކަންކަމުގެ އިތުރުން މަންމަގެ ރުޅި އާއި ނަފްރަތު ދެކެ ވެސް ބިރުގަތީ ކަމަށް ހުކުމް އިއްވަވަމުން ފަނޑިޔާރު ވިދާޅުވި އެވެ.