"ދަ ވައިޓް ލޮޓަސް"ގެ އާ ސީޒަންގެ ޓީޒާއެއް، "ދަ ލާސްޓް އޮފް އަސް" އަންނަ އަހަރު

އެޗްބީއޯގެ ސްޓްރީމް ޕްލެޓްފޯމް މެކްސްގެ ކާމިޔާބު ސީރީޒްތައް ކަމަށްވާ "ދަ ވައިޓް ލޮޓަސް" އާއި "ދަ ލާސްޓް އޮފް އަސް"ގެ އާ ސީޒަންގެ ޓީޒާއެއް އާންމުކޮށްފި އެވެ.

މެކްސް އިން މި އަހަރާއި އަންނަ އަހަރު ގެނެސްދޭ ބައެއް ފިލްމާއި ސީރީޒްތަކުގެ ޓީޒާއެއް އިއްޔެ ވަނީ އާންމުކޮށްފަ އެވެ. އޭގެ ތެރޭގައި "ދަ ވައިޓް ލޮޓަސް"ގެ ތިންވަނަ ސީޒަނާއި "ދަ ލާސްޓް އޮފް އަސް"ގެ ދެވަނަ ސީޒަން ވެސް ހިމެނެ އެވެ.

"ދަ ވައިޓް ލޮޓަސް" ކިޔާ ހޮޓަލަކަށް ޒިޔާރަތްކުރާ ގެސްޓުންނާއި އެތަނުގައި މަސައްކަތްކުރާ މުވައްޒަފުންނަށް ދިމާވާ ތަފާތު އެކި ކަންތައްތައް ދައްކާ މި ސީރީޒްގެ ތިންވަނަ ސީޒަން ގެނެސްދެނީ މި އަހަރު ފަހުކޮޅުގަ އެވެ. ކޮންމެ ސީޒަނެއް ވަކި ގައުމަކުން ގެނެސްދޭ އިރު، މިފަހަރު މި ސީރީޒް ގެނެސްދެނީ ތައިލެންޑުންނެވެ.

ބޮޑު ބަލިމަޑުކަމެއް ފެތުރި އިންސާނުން ޒޮންބީސް އަށް ބަދަލުވާ ދުނިޔެއްގައި ފިރިހެނަކު ކުޑަ އަންހެން ކުއްޖަކު ސަލާމަތްކުރަން އުޅުމުގެ ތެރޭގައި ދިމާވާ ތަފާތު ކަންތައްތައް ދައްކާ "ދަ ލާސްޓް އޮފް އަސް"ގެ ދެވަނަ ސީޒަން ގެނެސްދެނީ އަންނަ އަހަރު އެވެ.

ޕެޑްރޯ ޕަސްކަލް ލީޑު ރޯލު ކުޅޭ މި ސީރީޒްގެ ފުރަތަމަ ސީޒަނަށް ވެސް ބޮޑު ތަރުހީބެއް ލިބުނެވެ.