ބަންގްލަދޭޝްގެ ވަގުތީ ސަރުކާރާ ހަވާލުވެވަޑައިގެންނެވި ޔޫނުސްއަށް ރައީސް މަރުހަބާ ވިދާޅުވެއްޖެ

ބަންގްލާދޭޝްގެ ދަރިވަރުން ފެށި މުޒާހަރާތައް ވަރުގަދަވެ ބޮޑުވަޒީރު ޝައިޚް ހަސީނާ އިސްތިއުފާ ދެއްވައި ފިއްލެވުމުމުގެ ސަބަބުން އެކުލަވާލާ ވަގުތީ ސަރުކާރުގެ ވެރިއެއްގެ ގޮތުގައި މިއަދު ހުވާ ކުރެއްވި ނޮބެލްގެ އިނާމު ހާސިލްކުރައްވާފައިވާ މުހައްމަދު ޔޫނުސްއަށް ރައީސް ޑރ. މުހައްމަދު މުއިއްޒު މަރުހަބާ ވިދާޅުވެއްޖެ އެވެ. އެކްސްގައި ރައީސް ކުރެއްވި ޕޯސްޓެއްގައި ވިދާޅުވީ ވަގުތީ ސަރުކާރުގެ އިސް މުޝީރުގެ ގޮތުގައި ހުވާ ކުރެއްވުމުން ޔޫނުސްއަށް މަރުހަބާ ވިދާޅުވާ ކަމަށާއި ދުވަސްވީ، ގާތް ރަހުމަތްތެރި ގައުމެއްގެ ހައިސިއްޔަތުން ރާއްޖެ އިން ބަންގްލަދޭޝްއަށް އަބަދުވެސް އެދެނީ ފާގަތިކަމާއި ސުލްހަ އާއި ކާމިޔާބީއަށް ކަމަށެވެ.

ބަންގްލާދޭޝްގައި 2009 ވަނަ އަހަރުން ފެށިގެން ވެރިކަމުގައި ހުންނެވި ހަސީނާ އިސްތިއުފާ ދެއްވައި ގައުމު ދޫކޮށް ވަޑައިގެންފައިވާ ކަމަށް ހޯމަ ދުވަހު އިއުލާނުކުރީ އަސްކަރިއްޔާއިންނެވެ. އަދި ވަގުތީ ސަރުކާރެއް އެކުލަވައިލުމުގެ މަސައްކަތް ކުރީ ވެސް އަސްކަރިއްޔާއިންނެވެ.

ސިފައިންގެ ވެރިޔާ ޖެނެރަލް ވާކިރުއްޒަމާން ވަނީ ހަމަނުޖެހުންތައް ހުއްޓާލައި، ވަގުތީ ސަރުކާރަށް ފުރުސަތު ދިނުމަށް އެދިވަޑައިގެންފަ އެވެ. އަދި ރައީސް ވަނީ ދަރިވަރުންގެ ޑިމާންޑާ އެއްގޮތަށް، ގާނޫނު ހަދާ މަޖިލިސް ވެސް އިއްޔެ އުވާލައްވައިފަ އެވެ.

ފަގީރުންނަށް ކުދި ލޯނުތައް ދީގެން އެތައް ބައެއްގެ ދިރިއުޅުން ބަދަލުކޮށްދިން އުމުރުން 84 އަހަރުގެ ޔޫނުސް އަށް ވަގުތީ ސަރުކާރު ހަވާލުކުރީ މުޒާހަރާކުރި ދަރިވަރުން އެގޮތަށް ޑިމާންޑްކުރުމުންނެވެ.

އިންޑިއާގެ "ދަ ޕްރިންޓް" ނޫޙަށް ދެއްވި އިންޓަވިއުއެއްގައި، ހަސީނާގެ ވެރިކަން ނިމުމުން ރައްޔިތުންނަށް މިނިވަންކަމުގެ އިހްސާސްކުރެވޭ ކަމަށް ޔޫނުސް ވިދާޅުވެފައިވެ އެވެ.

ވެރިކަމުން ވެއްޓުނު ހަސީނާ ކުރިން ވަނީ ޔޫނުސްއަށް ވަރަށް ބޮޑަށް ފާޑު ވިދާޅުވެފަ އެވެ. މިދިޔަ ޖެނުއަރީ މަހު ޔޫނުސްގެ މައްޗަށް ވަނީ ވަޒީފާއާ ބެހޭ ގާނޫނާ ހިލާފްވި ކަމަށް ބުނެ ހަ މަސް ދުވަހަށް ޖަލަށްލުމާ އެކު 5،000 ޓާކާއިން ޖޫރިމަނާކުރުމަށް ވެސް ހުކުމްކޮށްފަ އެވެ. އެކަމަކު ހަސީނާގެ ވެރިކަން ވެއްޓުމާ އެކު އެ ހުކުމް ވަނީ ކޯޓުން ބާތިލްކޮށްފަ އެވެ.