ވިއްސާރައާ ގުޅިގެން ފުލުހުންގެ އޮޕަރޭޝަނަލް ލެވެލް 3 އަށް ބަދަލުކޮށްފި

ރާއްޖެއަށް މިހާރު ކުރަމުންދާ ގަދަ ވިއްސާރައާ ގުޅިގެން، ރައްޔިތުންނަށް ރައްކާތެރިކަން ކަށަވަރުކޮށް އެހީތެރިކަން ފޯރުކޮށްދިނުމަށް ކުރަމުންދާ މަސައްކަތުގެ ތެރެއިން ފުލުހުންގެ އޮޕަރޭޝަނަލް ލެވެލް ތިނަކަށް ބަދަލުކޮށް، ހާއްސަ މަސައްކަތެއް ފަށައިފި އެވެ.

މިދިޔަ އާދިއްތަ ދުވަހުން ފެށިގެން މުޅި ރާއްޖެ އަށް މިހާރު ކުރަމުންދާ ވިއްސާރާގައި މާލެ އާއި އަތޮޅުތެރޭގެ ރަށްތަކުގައި ވަނީ މިއަދު ވަނީ ވަރަށް ބޮޑަށް ފެންބޮޑުވެ، ހާއްސަ އެހީތެރިކަމަށް ބޭނުންވެފަ އެވެ.

ފުލުހުން މިރޭ ބުނީ، ރާއްޖޭގެ ހުރިހާ ސަރަހައްދެއްގައި ވެސް ރައްޔިތުންނަށް އެހީތެރިކަން ފޯރުކޮށް ދިނުމުގައި ފުލުހުން މިހާރު ހަރަކާތްތެރިވަމުން އަންނަ ކަމަށެވެ.

ރައްޔިތުންނަށް އެހީތެރިކަން ފޯރުކޮށްދިނުމަށް ރާއްޖޭގެ އެކި ހިސާބުތަކުގައި ފުލުހުން ކުރަމުން އަންނަ މަސައްކަތް:

- މާލޭގެ 55 ތަނެއްގައި މިއަދު ވެލި ބަސްތާ ޖެހި.

- މާލޭގެ ފަސް ތަނަކުން ފެން ހިއްކުމާއި ފެން ހިންދާ ޕަންޕު ފަސް ތަނެެއްގައި ޖެހުމަށް އެހީތެރިވި

- ފާހާނާ ޖަންކްޝަނުން ފެން ބޭރުވާތީ ދެ ތަނަކަށް އެހީތެރިކަން ފޯރުކޮށްދިން.

- އެއްގަމު ދަތުރުފަތުރުގެ އެހީތެރިކަން ދެ މީހަކަށް ފޯރުކޮށްދިނުން

އޭގެ އިތުރުން ހުޅުމާލޭގެ މުހައްމަދު ގާސިމް ޕްރީ ސްކޫލަށް ފެންވަންނާތީ ވެލިބަސްތާ ޖަހައި ރައްކާތެރިކަމުގެ ފިޔަވަޅުތައް އެޅުމުގެ މަސައްކަތް ކޮށްފައިވާ ކަމަށާއި ނެއިބަހުޑް އޮފިސަރުން ގޭބިސީތަކަށް ޒިޔާރަތްކޮށް، ރައްކާތެރިވުމަށް މައުލޫމާތު ހިއްސާކުރުމުގެ މަސައްކަތް ވެސް ފުލުހުން ކުރަމުން އަންނަ ކަމަށް ބުންޏެވެ.

އަތޮޅު ތެރޭގެ ރަށްރަށުގައި ފުލުހުން ކުރަމުންދާ މަސައްކަތުގައި ހދ. ނެއްލައިދު އާއި ކުޅުދުއްފުޓާއި ނޮޅިވަރަމާއި ނޮޅިވަރަންފަރާއި ދިއްދު އާއި ތުރާކުނާއި އުލިގަމު ބައެއް ގޭގެއަށް ފެން ވަދެ، މަގުތަކުގައި ފެންބޮޑުވެފައިވާތީ ފުލުހުން ވަނީ އެހީތެރިކަން ފޯރުކޮށްދީފަ އެވެ.

އަދި އިހަވަންދޫގެ 40 ގެ އާއި ކެލާ 22 ގޭގެ އިތުރުން ބާރަށު 55 ގެއަކަށް ފެނުގެ އަސަރުކޮށްގެން އެހީތެރިކަން ވަނީ ފޯރުކޮށްދީފައި އެވެ. އޭގެ އިތުރުން:

- ނ. މަނަދޫ އަދި ރ. ވާދޫ ގެއަކަށް ފެން ވަދެފައިވާތީ އެހީތެރިކަން ފޯރުކޮށްދީ، ބ. މާޅޮހުގެ މަގުތަކުން ފެން ހިންދުމުގެ މަސައްކަތް ކޮށްފައިވޭ

- ދ. ހުޅުދެލި އަދި މ. މުލަކުގައި ފެންބޮޑުވެފައިވާތީ ގެތަކާއި ސަރުކާރުގެ އިދާރާތައް ހިމާޔަތްކުރުމުގެ މަސައްކަތުގައި ފުލުހުން އެހީތެރިވެދީފައިވޭ

- އައްޑޫ، ހުޅުމީދޫ ގެއަކަށް ފެންވަދެފައިވާތީ އެހީތެރިކަން ފޯރުކޮށްދީ، ގަމުގެ ގެއެއްގެ ފުރާޅު އެއްލައިލުމާއި ގެއެއްގެ ފުރާޅު މައްޗަށް ބަނބުކެޔޮ ގަހެއް ވެއްޓިފައިވާތީ ފުލުހުން ވަނީ އެ ގަސް ނެގުމަށް އެހީތެރިވެފައި.

މުޅި ރާއްޖެއަށް މިހާރު ކުރަމުންދާ ވިއްސާރާގައި ފެންބޮޑުވެ ގެއްލުންވަމުންދާތީ މާދަމާއަކީ ސަރުކާރު ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު މިރޭ ވަނީ ކަނޑައަޅުއްވައިފަ އެވެ. އަދި ހާއްސަ ޓާސްކްފޯހެއް ވެސް އެ މަނިކުފާނު މިރޭ އުފެއްދެވި އެވެ.